Şamaxı – Araz-Naxçıvan 0:1 (0:0)
1. Rikardo Fernandes – 5,0
60. Səbayıl Bağırov – 5,0
4. Adil Nağıyev (k) – 5,5
10. Emin Zamanov – 5,5
(24. Edqar Adilxanov, 84) – qiymətsiz
17. Rafael Məhərrəmli – 5,5
(22. Qurban Səfərov, 70) – 5,0
5. Arsen Ağcabəyov – 5,5
6. Rauf Rüstəmli – 5,0
(13. Ramin Əhmədov, 84) – qiymətsiz
82. Rüfət Abbasov – 5,5
(19. Fəxri Məmmədli, 84) – qiymətsiz
11. Conatan Benteke – 5,5
20. Leroy Mikels – 6,0
7. Giorgi Kantariya – 5,0
Ehtiyat oyunçular
85. Kamal Bayramov
62. Abdulla Seydəhmədov
80. Zahid Mərdanov
Baş məşqçi: Ayxan Abbasov
Komandanın ən yaxşısı: Leroy Mikels

12. Kristian Avram – 5,5
3. Bəxtiyar Həsənalızadə - 6,0
2. Slavik Alxasov – 5,5
(34. Urfan Abbasov, 60) – 5,0
6. Vadim Abdullayev (k) – 5,5
(24. Mustafa Əhmədzadə, 67) – 5,5
26. Ömər Buludov – 6,0
16. Ramon Maçado – 6,5
29. Vanderson Melo – 6,0
23. Nuno Rodriqes – 6,0
(21. Sezar Meza Kolli, 84) – qiymətsiz
4. İqor Ribeyro – 6,0
97. Felipe Santos – 7,0
(7. Ülvi İsgəndərov, 84) – qiymətsiz
10. Bernardo Dias – 5,5
(14. Miço Kuzmanoviç, 60) – 5,5
Ehtiyat oyunçular
94. Tərlan Əhmədli
22. Elçin Mustafayev
20. Turan Vəlizadə
88. Tuqay Əlizadə
11. Bayraməli Qurbanov
71. Sənan Ağalarov
17. İssuf Paro
Baş məşqçi: Elmar Baxşıyev
Komandanın ən yaxşısı: Felipe Santos

Qol: F.Santos, 72 (R.Maçado).
Vərəqə: C.Benteke, 27 (qeyri-idman hərəkəti) – sarı.
Hakimlər: FƏRİD HACIYEV, Kamran Bayramov, Teymur Teymurov, Kamran Əliyev (hamısı Bakı).
VAR hakimi: Nicat İsmayıllı (Bakı).
VAR hakiminin köməkçisi: Akif Əmirəli (Bakı).
Hakim-inspektor: Feyzulla Feyzullayev (Bakı).
AFFA nümayəndəsi: Elgiz Abbasov (Masallı).
19 oktyabr. Şamaxı, şəhər stadionu. 500 tamaşaçı (2200 yerlik).
Birinci hissəyə 1, ikinci hissəyə 4 dəqiqə əlavə olunub.
Oyunun qiyməti: 6,0.

Yəqin turun ən cansıxıcı oyunu Şamaxıda baş tutdu. Halbuki gözləntilər tam fərqli idi. Ən azı ona görə ki, avrokuboklar uğrunda mübarizə aparan, “Qarabağ”dan başqa bütün rəqiblərindən xal qoparan “qırmızı-ağlar” hələ evdə məğlub olmayan “Şamaxı”nın qonağı idi. Lakin nə Elmar Baxşıyevin, nə də Ayxan Abbasovun komandasının rəngarəng hücumlarının, dinamik oyununun şahidi olduq. Bölgə təmsilçilərinin qarşılaşmasında bir qol vuruldu. Əslində “Araz-Naxçıvan” hesabı açmağa hələ 9-cu dəqiqədə yaxınlaşdı. Sadəcə, Santosun ötürməsi sürətli alındığından Fernandes topa Maçadodan əvvəl çatıb komandasını qoldan xilas etdi.

Qonaqların ikinci təhlükəli vəziyyətinin müəllifi də Ramon oldu. O, bu dəfə də Rikardonun öhdəsindən gələ bilmədi. “Şamaxı”nın qol imkanını Mikels boşa verdi. Rafaelin sağ cinahdan göndərdiyi topu düzgün qəbul edə bilməyən Leroy qeyri-dəqiq zərbə ilə yadda qaldı. 26-cı dəqiqədə Ribeyronun başla zərbəsi işə yaramadı. Daha doğrusu, futbolçu Diasın ötürməsini qarşılasa da, “çərçivə”ni nişan ala bilmədi. Ardınca “Şamaxı” irəli atıldı ki, bu dəfə Emin Rafaelin cərimə meydançası daxilinə göndərdiyi topu qapının üzərindən vurdu. 37-ci dəqiqədə Santos qeyri-dəqiqlik üzündən istəyinə çatmadı. Ümumiyyətlə, bu ərəfədə komandalar istədiklərini edə bilmirdi. 39-cu dəqiqədə Səbayıl da ənənəyə sadiq qaldı. O, Eminin ötürməsini qəbul edib zərbə imkanı tapsa da, top tirin üzərindən keçdi. Elə Ribeyro da rəqibinin səhvini təkrarladığından oxşar epizodda komandasını sevindirə bilmədi. 45-ci dəqiqədə Adil mərkəzdən “çərçivə”ni nişan almaq istəsə də, Avram yerində idi. Beləcə birinci hissə qolsuz bərabərliklə başa çatdı.

İkinci yarı qonaqların təzyiqiylə başladı. Əvvəl Arsen özünü vaxtında çatdırıb Diasın cərimə meydançası daxilinə ötürmə etməsinə imkan vermədi. 63-cü dəqiqədə Benteke qol imkanını qaçırdı. Halbuki Bəxtiyarın topu itirməsindən sonra əla şans yaranmışdı. Sadəcə, o, fürsəti dəyərləndirə bilmədi. Çox keçmədən, demək olar ki, birəbir eyni epizod təkrarlandı ki, bu dəfə də Avram Bəxtiyarın itirdiyi topu Bentekenin qapıdan keçirməsinə mane oldu. Ardınca Slavikin zərbəsi tirdən qayıtdı. “Araz-Naxçıvan”ın qol axtarışı 73-cü dəqiqədə nəticə verdi. Santos Ramonun yumşaq toxuşla önünə atdığı topu dəqiq zərbəylə tora qovuşdurdu. Bir qədər sonra Mikels uzaqdan bəxtini sınadı ki, Avram zərbəni çətinliklə zərərsizləşdirdi. 90+2-ci dəqiqədə isə Ayxan Abbasovun hakimlikdən narazı qaldığı epizod yaşandı. Belə ki, Mikels cərimə meydançası daxilində ötürmə verərkən topun Ribeyronun əlinə dəyib-dəymədiyi müzakirə mövzusuna çevrildi. Hər halda, Fərid Hacıyev nə VAR-a ehtiyac duydu, nə də penalti qərarı verdi. Və matçın final fitiylə “Şamaxı”nın ilk ev, ardıcıl ikinci məğlubiyyəti rəsmiləşdi. “Araz-Naxçıvan” isə hələ ki “Qarabağ”dan başqa rəqib tanımır.

Gözdən qaçmadı
* Tribunalarda nə “Şamaxı”nın, nə də “Araz-Naxçıvan”ın fanklubları var idi.
* Azarkeşlər Elmar Baxşıyevlə Ayxan Abbasova ünvanlanmış “Azərbaycan millisi məhv olub gedir. Futbolçu yetişdirin” kimi şüarlar səsləndirdilər.
* Şamaxılı azarkeşlər “saxtakar VAR bizə lazım deyil” qışqırdılar. Onlar həm qonaq komandanı, həm də hakimləri təhqir etdi.
* Tərəfdarlardan biri “Azərbaycan futboluna yaraşıqdı “Şamaxı”. İstəməyənlər bilsinlər” sözləri yazılan pankart açmışdı.
* Matçı tribunadan izləyənlər arasında Ceyhun Sultanov da var idi.
* Media sektorunun üzərindəki “sky-box”larda “Şamaxı” azarkeşləri əyləşmişdi. Bunun qayda pozuntusu olması öz yerində. Onlar media nümayəndələrini “Şamaxı”nın haqqının yeyilməsinə göz yummaqla suçladı və həmkarlarımızdan biriylə münaqişə yaşadı.

KƏNAN BAHADIR