Ayşən Abduləzimova zədəsini sağaldıb
Qadın voleybolçulardan ibarət millimiz Qızıl Avropa Liqasına hazırlığı davam etdirir. Aprelin 15-dən baş məşqçi Faiq Qarayevin rəhbərliyi altında Dərnəgül Voleybol Mərkəzində gündə iki dəfə məşq edən yığmamız dünən Sloveniyaya yollanıb. Mariborda baş tutacaq təlim-məşq toplanışı mayın 16-dək davam edəcək. Hazırlıq prosesi çərçivəsində bir neçə yoxlama oyununun keçirilməsi də planlaşdırılır. Rəqiblər sırasında Slovakiya, Sloveniya, Avstriya və Xorvatiya var. Təcrübəli mütəxəssisin Maribora apardığı “14-lük” belədi:
toppaylayıcılar - Şəfaqət Alışanova, Yana Əzimova; blokçular - Aynur İmanova, Ayşən Abduləzimova, Kseniya Pavlenko, Alyona Həsənova; hücumçular - Odina Bayramova, Yelizaveta Səmədova, Yekaterina Jidkova, Anastasiya Bessonova, Marqarita Əzizova; liberolar - Ceyran İmanova, Bəyaz Əliyeva, Yuliya Kərimova.
Qeyd edək ki, Avroliqa mayın 19-da start götürəcək. Yığmamız A qrupunda Portuqaliya, Bolqarıstan və Ukrayna ilə münasibətləri aydınlaşdıracaq.
Bu arada millinin sabiq kapitanı və toppaylayıcısı Oksana Kurt Voleybol Federasiyasının mətbuat xidmətinə müsahibə verib. Hazırda yığmanın meneceri kimi fəaliyyət göstərən veteran voleybolçu əsas komanda, milli üzvləri və çempionat haqda sualları cavablayıb.
- Son ölkə çempionatını necə dəyərləndirirsən?
- Hamımız üçün kifayət qədər asan keçməyən mövsüm oldu. Avropa çempionatında üzücü, eyni zamanda fəxri 4-cü yeri tutduq. Əlbəttə, medal da qazana bilərdik. Lakin görünür, nəsə çatmadı. Ölkə çempionatına gec başladıq. Amma yarışı yüksək səviyyədə keçirdik. Superliqada əsas müsbət məqam o idi ki, yarışda əsasən gənc oyunçular iştirak etdi. Onlar üçün təcrübə toplamaq və böyüklərə yaxınlaşmaq baxımından yaxşı şans idi.
- Gənclərdən kim müsbət mənada səni təəccübləndirdi?
- Kimisə fərqləndirmək istəməzdim. Bütün oyunçular çox çalışırdı. Tam gənc oyunçulardan ibarət olan “Lokomotiv”in üzvləri də çalışqanlıq nümayiş etdirdilər. Çempionatda sonuncu yeri tutsalar da, onlara “afərin” düşür. Onlar oyun təcrübəsi qazandılar.
- Ölkə xaricində legioner həyatı yaşayan yığma üzvlərinin çıxışı haqda nə deyə bilərsən?
- Daim ölkə xaricində çıxış edən oyunçularımızı diqqət mərkəzində saxlayır, matçlarını izləyirdik. Onların çıxış etdikləri komandalar böyük uğur əldə etməsələr də, voleybolçularımızın hər biri ayrı-ayrılıqda yaxşı oynadılar.
- Zədəli voleybolçularımızın son durumu necədi?
- Təəssüf ki, komandamız uzun müddətdi zədədən əziyyət çəkir. Hazırda Ayşən Abduləzimova əməliyyatdan sonra, demək olar ki, tam bərpa olunub. O hətta əsas komanda ilə toplanışa yollanacaq və məşqlərə orda başlayacaq. Kristina Yaqubova da qrafik üzrə bərpa olunur. Lakin fikrimcə, Qızıl Avropa Liqasına qədər tam hazır vəziyyətə gələ bilməyəcək. Çünki çox vaxt itirib. Oksana Kiselyova isə hələ ayyarım bərpa prosesi keçməlidi.
- Karyeranı bitirdikdən sonra yığmada toppaylayıcı mövqeyində problem yaranıb. Kimi özünə layiqli davamçı sayırsan?
- Bütün qızlar bu mövqe üçün çox çalışır. Təəssüf ki, bəzən zədələr maksimuma nail olmağa mane olur. Amma yenə də ümid edək ki, ilin əsas turnirinə – dünya çempionatına zədələrsiz yollana biləcəyik.
- Avropa Liqasında gənclərlə təcrübəlilərin sintezi olacaq, yoxsa əsas heyət oynayacaq?
- Baş məşqçi Faiq Qarayev hələ heyəti açıqlamayıb. Ancaq Sloveniya toplanışına yollanan heyətə əsasən, demək olar ki, nisbətən yaşlı oyunçulara bərpa üçün çox vaxt veriləcək. Lakin onların həlledici görüşlərdə komandaya qoşulacaqlarını istisna etmirəm.