Səbirə və Tatyana isə bürünc medal qazandı
Rusiyanın Kaspiysk şəhərində keçirilən güləş üzrə Avropa çempionatı davam edir. Dünən 53, 57, 62, 65 və 72 kq-da çıxış edən qadınlar mübarizəyə qoşulub. Anjela Doroqan (53 kq) startda yunan Mariya Preovolarakiyə (4:10), Elmira Qəmbərova (62 kq) isə belarus Veronika İvanovaya (4:6) uduzub. Alyona Kolesnik (57 kq) ilk mərhələdə türk Melika Öztürkə “tuşe”ylə qalib gəldikdən sonra norveçli Qreys Yakob Bulleni vaxtından əvvəl üstələyib – 10:0. Ancaq təmsilçimiz finalın biraddımlığında rus İrina Oloqonovaya yenilib – 2:3. Kolesnik bu gün bürünc medal uğrunda görüşə çıxacaq. Elis Manolova (65 kq) macar Qabriella Sleyş (3:0), çex Adela Hanliçkova (4:1) və isveçli Henna Katarina Yohanssonu (6:1) məğlub edərək karyerasında ilk dəfə qitə birinciliyinin finalına çıxıb. Yığma üzvü bu gün Avropa çempionu olmaq üçün finlandiyalı Petra Ollini məyus etməlidi.
Dünən həm də bir gün əvvəl mübarizəyə qoşulmuş güləşçilərimiz həlledici görüşlərə çıxıb. Finaladək bütün görüşlərini vaxtından əvvəl qələbəylə yekunlaşdıran Mariya Stadnik (50 kq) rumın Emiliya Vuka da eyni aqibəti yaşadıb. Cəmi 32 saniyəyə rəqibinin (10:0) işini bitirən Stadnik növbəti dəfə Avropada tayı-bərabəri olmadığını isbatlayıb. Bu, millimizin kapitanının qitə arenasında 7-ci qızıl medalı olub. Digər yığma üzvləri də fəxri kürsüyə qalxıb. Tatyana Omelçenko (59 kq) belaruslu Yekaterina Yanuşkeviçdən (12:2), Səbirə Əliyeva (76 kq) isə ukraynalı İrina Pasiçnukdan (6:3) güclü olaraq, “bürünc”ü hesabına yazıb.

Reaksiyalar
Mariya Stadnik: “Final görüşündən əvvəl makaron yemişdim. Niyə rahat qalib gəldim? Çünki çox yaxşı komandam var. Yüksək səviyyədə hazırlıq keçmişdim. İşimi çox sevirəm. Ən yaxşısına nail olmaq üçün əlimdən gələni edirəm. Rumıniyalı güləşçiylə dəfələrlə qarşılaşmışam. Həmişə onunla görüşlərim belə asan keçir. Avropa çempionatında rahat qalib gəlsəm də, bu turnirə qatılmaq lazımdı. Məşqin öz yeri var, yarışın öz yeri. İlk Avropa Oyunlarını da saysaq, bu qitədə 8-ci çempionluğumdu. 8-i yan qoysaq, bu, sonsuzluq edir (gülür). Bu, ən qısa vaxtda başa gələn çempionluğum oldu. İndi daha da böyümüşəm və tez qalib gələ bilirəm. Dünya çempionatına isə hələ vaxt var. Sonuncu belə nüfuzlu yarışım ötən il Bakıda keçirilən 4-cü İslam Həmrəyliyi Oyunları olmuşdu. Belə yarış adrenalininə ehtiyacım vardı. Bəlkə də bu üzdən istəyim çox idi və belədə qısa vaxtda qələbə qazandım”.
Səbirə Əliyeva: “İstənilən medalı qazanmaq sevindiricidi. Düzdü, hamı çempion olmaq istəyir. Məncə, 3-cü yer də böyük uğurdu. Hədsiz çox sevinirəm. Bu medalı mənim üçün həyatda ən dəyərli olan insanlara – ailəmə həsr edirəm. İlk qarşılaşdığım macar güləşçini yaxşı tanıyırdım. Çünki daha öncə qarşılaşmışdıq. 9:6 hesabıyla qalib gəldim. Ancaq Rusiya idmançısıyla qarşılaşmada psixoloji gərginlik var idi. Son görüşdə medal üçün bütün var gücümü qoydum ki, təki bayrağımız qalxsın. Bundan sonra növbəti yarışlarda çempionluq uğrunda mübarizə aparacam”.