Əvvəlki saylarımızın birində “Bakcell Arena”nın təmirə bağlanmaq ehtimalı haqda xəbər vermişdik. Hər il avrokubok matçlarından öncə örtüyə əl gəzdirmək ənənəsi bu dəfə də davam etdiriləcək. Yayda 99 faiz Avroliqada iştirak edəcək “Qəbələ”nin rəqiblərini bu arenada qəbul edəcəyi dəqiqdi. “Neftçi” vəsiqə qazana bilsə, “ağ-qaralar”da orda oynayacaq. Odu ki, stadion rəhbərliyi, başqa cür desək, AFFA-da oturub “Bakcell Arena”ya nəzarət edənlər avrokubok mövsümündə biabır olmamaq üçün iki ay əvvəldən hərəkətə keçməyi lazım bilib.
“Bakcell Arena”nın təmirə bağlanması “Neftçi”ni çətin duruma salıb. Belə ki, bakılılar mayın 12-də “Səbail”i ev sahibi kimi məhz bu stadionda qəbul etməliydi. Məlum qərardan sonra isə matçın “Dalğa Arena”da keçirilməsi gündəmə gəlib. Lakin ehtimal var ki, tərəflər öz aralarında razılaşsın və oyun “Səbail”ə doğma olan “Bayıl Arena”da baş tutsun. Hər halda, qərarı gözləyək.
HƏBİB