Səbail – Şamaxı 2:0 (1:0)
1. Hüseynəli Quliyev – 6,0
74. Yusif Nəbiyev – 5,0
(14. Suleyman Alluş, 80) – qiymətsiz
20. Mərt Çəlik – 5,5
44. Amir Bilali (k) – 5,5
18. Süleyman Əhmədov – 5,0
8. Qorka Laruçça – 6,5
7. Madi Queta – 6,0
(15. Vüsal Məsimov, 73) – 5,5
5. Gitay Sofir – 5,5
77. Fərid Nəbiyev – 5,5
(17. Gülağa Əsədov, 45+3) – 5,5
11. Rüfət Abdullazadə - 6,0
(10. David Qomis, 80) – qiymətsiz
21. Ayman Bouali – 6,0
(19. Samir Abdullayev, 73) – 5,5
Ehtiyat oyunçular
12. Əlirza Müştəbazadə
25. Nicat Məmmədzadə
6. Cabir Əmirli
83. Nihad Quliyev
16. Emin Rüstəmov
Baş məşqçi: Şahin Diniyev
Komandanın ən yaxşısı: Qorka Laruçça

1. Rikardo Fernandes – 5,0
82. Rüfət Abbasov – 4,5
5. Arsen Ağcabəyov – 4,5
(10. Emin Zamanov, 73) – 5,0
32. Vasiliye Radenoviç – 4,5
4. Adil Nağıyev (k) – 4,5
17. Rafael Məhərrəmli – 5,5
(22. Qurban Səfərov, 73) – 4,5
93. Brahim Konate – 4,5
7. Georgi Kantariya – 5,0
(13. Ramin Əhmədov, 85) – qiymətsiz
8. İlkin Muradov – 5,0
(6. Rauf Rüstəmli, 73) – 5,0
20. Leroy Mikels – 5,0
9. Belajdi Pusi – 5,0
(11. Conatan Benteke, 73) – 5,0
Ehtiyat oyunçular
85. Kamal Bayramov
62. Abdulla Seydəhmədov
60. Səbayıl Bağırov
80. Zahid Mərdanov
24. Edqar Adilxanov
19. Fəxri Məmmədli
Baş məşqçi: Ayxan Abbasov
Komandanın ən yaxşısı: Rafael Məhərrəmli

Qollar: Q.Laruçça, 27 (1:0, R.Abdullazadə). M.Queta, 69 (2:0, A.Bouali).
Vərəqələr: İ.Muradov, 19 (qeyri-idman hərəkəti). Q.Laruçça, 29 (qeyri-idman hərəkəti). B.Pusi, 34 (qeyri-idman hərəkəti). V.Radenoviç, 45+3 (hakimin qərarına etiraz). B.Konate, 45+4 (qeyri-idman hərəkəti). M.Çəlik, 53 (qeyri-idman hərəkəti). Y.Nəbiyev, 62 (oyunun bərpasının ləngidilməsi). A.Nağıyev, 81 (qeyri-idman hərəkəti) – sarı. B.Konate, 63 (qeyri-idman hərəkəti) – qırmızı (ikinci sarı).
Hakimlər: ƏLİYAR AĞAYEV, Zeynal Zeynalov, Akif Əmirəli, Elvin Bayramov (hamısı Bakı).
VAR hakimi: İnqilab Məmmədov (Bakı).
VAR hakiminin köməkçisi: Namiq Hüseynov (Bakı).
Hakim-inspektor: İmanxan Sultani (Bakı).
AFFA nümayəndəsi: Kifayət Mustafayeva (Bakı).
5 oktyabr. Bakı. “ASCO Arena”. 300 tamaşaçı (? yerlik).
Hər hissəyə 4 dəqiqə əlavə olunub.
Oyunun qiyməti: 6,0.

4-cü turda “Kəpəz”i darmadağın edəndən sonra keçirdiyi bütün oyunlarda uduzan “Səbail”in artıq geriyə yolu qalmamışdı. Ciddi tənqidlə üzləşən Şahin Diniyev hər məğlubiyyətdən sonra komandasından razı qaldığını deyir, futbol ictimaiyyəti isə bunu, yumşaq desəm, ironiya ilə qarşılayırdı. Son iki oyunla bağlı daha bir maraqlı tendensiya var idi. “Səbail” hər dəfə hesabı açır, ancaq sonda məğlubiyyətlə barışırdı. Odu ki, Laruçça 27-ci dəqiqədə Rüfət Abdullazadənin ötürməsindən sonra gözəl zərbə ilə qapıya yol tapanda “Şamaxı”nın gücünü də nəzərə alanlar yenə tendensiyanın təkrarlanacağını düşünməyə başladı.

Buna qədər isə meydanda qarşılıqlı hücumlarla müşayiət olunan oyun gedirdi. 3-cü dəqiqədə Rüfət Abbasov, 18-ci dəqiqədə Radenoviç topa məsuliyyətsizcəsinə zərbə vurmasaydı, hesab açılacaqdı. Qonaqlar topa nəzarət etməyə çalışır, amma “dənizçilər” sərt pressinq hesabına rəqibə göz açmağa imkan vermirdi. Meydan sahibləri “hücuma hücum” prinsipi ilə oynayırdı, sadəcə, real qol vəziyyətləri yox idi. 27-ci dəqiqədə oyunun bütün sonrakı axarına təsir edən qol vuruldu. Məntiqlə “şirlər” fəallaşmalı, cavab qolu üçün irəli atılmalıydı. Amma belə olmadı. Daha dəqiqi, qonaqların hücumları bir mərhələyə qədər irəliləyir, Hüseynəli Quliyev və müdafiəçilər üçün ciddi təhlükə yaratmırdı. Yalnız Pusi ilə Rüfət Abbasovun 40-cı dəqiqədəki ardıcıl iki zərbəsini qeyd etmək olar.

Şəxsən mən komandasının təşəbbüsü ələ keçirməkdə çətinlik çəkdiyini görən Ayxan Abbasovun 2-ci hissəyə dəyişikliklərlə başlayacağını gözləyirdim. Maraqlıdı ki, o, oyuna start heyəti ilə davam etməyi lazım bildi. Hər halda, hissə “Şamaxı”nın hücumlarıyla başladı. Pusi, Konate, Mikels vaxtaşırı cərimə meydançasına daxil olur, ancaq son nöqtəni qoymaq heç cür alınmırdı. 59-cu dəqiqədə isə Adil Nağıyevin baş zərbəsinin qarşısını Hüseynəli çətinliklə aldı. Bəlkə də “şirlər” hesabı bərabərləşdirə biləcəkdi. Konatenin 63-cü dəqiqədəki “qırmızı”sı olmasaydı. Oyunboyu əsəbi görünən fransalı yarımmüdafiəçi mərkəz xətti yaxınlığında Yusif Nəbiyevin üzünə zərbə vurduğuna görə meydandan qovuldu. Belədə “Şamaxı”nın xal ümidi istər-istəməz azaldı. Üstəlik 6 dəqiqə sonra “dənizçilər” fərqi artırdı. Sürətli əks-hücum zamanı Bouali Quetaya ötürmə verdi, o isə bir qədər də irəliləyib qapıya zərbə vurdu – 2:0. Bu artıq oyunun taleyinin həll olunması demək idi. Düzdü, Ayxan bəy 73-cü dəqiqədə birdən-birə dörd yeni oyunçunu meydana buraxmaqla oyunun axarını dəyişməyə çalışdı. Amma “şirlər”in təsəlli qolunu vurmağa da gücü çatmadı. Əksinə, meydan sahibləri son 15 dəqiqədə dəfələrlə fərqlənməyə yaxın oldu. Hətta uzatma dəqiqələrində vurulan 3-cü qol ofsayd üzündən sayılmadı.

Beləliklə, “Şamaxı”nın məğlubiyyətiz oyunlar seriyası qırıldı. “Səbail” isə bu qələbə ilə bir qədər özünə gəldi.

Gözdən qaçmadı
* Bu oyundan Amir Bilali ilk dəfə “Səbail”in kapitan sarğısını daşıdı.
* 37-ci dəqiqədə qapıçı Hüseynəli Quliyev topu səhvən media tribunasına vurdu. Həmkarımızın qoluna dəyən topa görə üzrxahlıq kimi Hüseynəli oyundan sonra kiçik hədiyyə təqdim etdi.
* Oyunun əvvəlində Ayxan Abbasov hakimə etiraz bildirdi. Dördüncü hakim Elvin Bayramov onu sakitləşdirə bilmədiyinə görə Əliyar Ağayevi xəbərdar etdi. Referinin xəbərdarlığı işə yaradı.
* Oyunu izləyənlər arasında Alluşun Amsterdamdan gələn dostları da var idi.
* “Şamaxı”, adətən, ev oyunlarında daha yaxşı dəstəklənir. Bu dəfə komandası səfərdə irəli səsləyənlərin sayı heç 20-yə çatmırdı.
* 37-ci dəqiqədə Bouali yerdə qalanda qonaqlar “feyr-pley” prinsipinə əməl etmədi.
* Əliyar Ağayev Mərt Çəliyi 53-cü dəqiqədə sarı vərəqə ilə cəzalanırsa da, o, cərimə meydançasında Pusiyə qarşı qırmızı vərəqəlik hərəkətlər etmişdi.

ORXAN