Qadın həndbolçuların ardından kişilərin ölkə çempionatına da yekun vurulub. Bazar günü “ABU Arena”da həlledici oyunlar keçirilib. Daha böyük maraqla gözlənilən “Məhsul” - “Bakı” matçı gərgin mübarizə şəraitində keçib. Qızıl medallara iddialı rəqiblərin oyununda əsas vaxt 32:32 hesabı ilə bitdiyindən qalib penalti seriyasında müəyyənləşib. Yeddi metrlik zərbələri daha dəqiq yerinə yetirən “Bakı" 35:32 hesablı qələbə ilə ölkə çempionu olub. Digər qarşılaşmada “Təhsil” Respublika İxtisaslaşdırılmış Olimpiya Ehtiyatları Uşaq-Gənclər İdman Məktəbinin (RİOEUGİM) yetirmələrini 45:28 hesabıyla darmadağın edərək, bürünc medala yiyələnib.
Bundan sonra iki yarışın medalçıları təltif edilib. Həmçinin fərdi mükafatlandırma baş tutub. Elnur Cahangirov (Bakı) və Yelizaveta Qilyazəddinova (Azəryol) ən yaxşı qapıçı, Dmitri Çaplıgin (Təhsil) və Valentina Yankovskaya (Azərsu) isə ən yaxşı oyunçu nominasiyası üzrə fərqlənib.
Çempionatın bağlanış mərasimində çıxış edən Həndbol Federasiyasının vitse–prezidenti Orxan Abbasov əvvəlki ölkə çempionatı ilə müqayisədə başa çatan mövsümün daha gərgin və maraqlı mübarizə ilə yadda qaldığını, növbəti çempionata yeni komandaların qatılması və rəqabətin artması üçün bütün qüvvələrin səfərbər olunacağını bildirib.