Millətlər Liqası
qrup mərhələsi, 3-cü tur
C liqası,
Estoniya - Azərbaycan 3:1 (2:1)
12. Karl Yakob Heyn
3. Mihael Syonninq-Larsen
18. Karol Mets (k)
16. Yoonas Tamm
13. Maksim Paskoçi
(6. Rasmus Peetson, 29)
5. Rokko Şeyn
(21. Martin Vetkal, 84)
11. Mixkel Aynsalu
23. Vlasi Sınyavski
4. Mattias Kayt
(20. Markus Poom, 84)
15. İoan Yakovlev
(10. Sergey Zenyov, 68)
8. Henri Anier
(9. Erik Sorqa, 68)
Ehtiyat oyunçular
1. Matvey İqonen
22. Karl Andre Vallner
2. Myarten Kuusk
7. Robi Saarma
14. Patrik Kristal
17. Martin Miller
19. Mihael Lilander
Baş məşqçi: Yurgen Henn

1. Mehdi Cənnətov
5. Anton Krivotsyuk
15. Bədavi Hüseynov
13 Rahil Məmmədov
22. Abbas Hüseynov (k)
(21. Qismət Alıyev, 76)
3. Elvin Cəfərquliyev
7. Coşqun Diniyev
(18. Ceyhun Nuriyev, 64)
20. Aleksey İsayev
(8. Emin Mahmudov, 76)
11. Ramil Şeydayev
9. Renat Dadaşov
(14. Rüstəm Əhmədzadə, 82)
17. Toral Bayramov
(10. Mahir Emreli, 64)
Ehtiyat oyunçular
12. Aydın Bayramov
23. Rza Cəfərov
2. Şəhriyar Əliyev
4. Zamiq Əliyev
6. Ozancan Kökçü
16. Vadim Abdullayev
19. Xəyal Nəcəfov
Baş məşqçi: Fernando Santuş

Qollar: İ.Yakovlev, 32 (1:0). T.Bayramov, 45+1-p. (1:1). V.Sınyavski, 45+2 (2:1). R.Şeyn, 71 (3:1).
Vərəqələr: R.Şeyn, 37. H.Anier, 72 - sarı.
Hakimlər: ROB HARVİ, Robert Klark, Ueyn Makdonnell, Rob Hennessi (hamısı İrlandiya).
VAR hakimi: Mihael Salisburi (İngiltərə).
VAR hakiminin köməkçisi: Nik Hopton (İngiltərə).
Hakim-inspektor: İqor Satçi (Moldova).
UEFA nümayəndəsi: Donaldas Urniezius (Litva).
11 oktyabr. Tallinn. “A. Le Kok Arena” stadionu. 6034 tamaşaçı.
Birinci hissəyə 3, ikinci hissəyə 4 dəqiqə əlavə olunub.

8 (4) qapıya ("çərçivə"yə) zərbə 10 (5)
0 künc zərbəsi 8
2 ofsayd 2
18 qayda pozuntusu 3
2 (0) sarı (qırmızı) vərəqə 0 (0)
37 topa sahibolma (faizlə) 63

Qrupda keçirdiyi hər iki oyunda uduzan yığmamız bu dəfə meydana ən azı heç-heçə ümidi ilə çıxdı. Rəqib də güclü İsveç və ya Slovakiya yox, qalib gələ biləcəyimiz Estoniya idi. Oyun bizimkilərin təzyiqiylə başladı.

Qısa ötürmələrlə irəliləməyə çalışan, boşluqlardan dərhal yararlanıb topu irəli göndərən qonaqlar ilk təhlükəli vəziyyəti 6-cı dəqiqədə yaratdı. Amma Heyn Abbasın cərimə meydançası daxilinə ötürdüyü topa yiyələndiyindən hücum bəhrə vermədi. Ardınca yığmamızın topu qarşı tərəfə verməməklə oyuna nəzarəti əla almağa çalışmasına şahidlik etdik. Santuşun komandasının bu niyyəti meydan sahiblərinin sərt oyuna üstünlük verməsiylə müşayiət olunurdu. Estonlar xoşbəxtliyi qapı önünə uzun ötürmələrdə axtarsa da, gah Rahil, gah da Elvin cəld davranıb təhlükəni sovuşdururdu. Har halda, bunun matç ərzində dəfələrlə baş verdiyini deməkdə fayda var. 
13-cü dəqiqədə Mehdi Anierin qapı önünə ötürməsinə müdaxilə etməklə rəqibi dayandırdı.

Ardınca Ramilin hücum cəhdi uğursuz alındı. Daha doğrusu, Kayt hücumçunun əlverişli mövqeyə çatdırdığı topu meydandan çıxardı. Bir qədər sonra Şeynin qapıya qeyri-dəqiq zərbəsini izlədik. Millimiz hesabı açmaq üçün ideal fürsəti 16-cı dəqiqədə tapdı. Təəssüf ki, Coşqunun cərimə meydançasına göndərdiyi "kürə"ni tora qovuşdurmaq istəyən Renat dirəyi nişan aldı. Çox keçmədən Dadaşovun qol arzusunu yenə qeyri-dəqiqlik gözündə qoydu. 22-ci dəqiqədə isə ötürmə etmək əvəzinə zərbəyə üstünlük verən Toral Heyni məyus edə bilmədi. Ardınca Bayramovun növbəti uğursuzluğunu izlədik. O, bu dəfə Elvinin ötürməsini "çərçivə"yə yönəltsə də, qolkiper yerində idi. 

Yığmamızın təşəbbüsü ələ aldığı dəqiqələrdə estonların cəmi bir təhlükəli vəziyyətinə şahidlik etdik. Şeynin cərimə meydançası daxilinə çatdırdığı topa sahib çıxan olmadığından hücum cəhdi puç oldu.

Birinci hissənin sonu daha baxımlı epizodlarla yadda qaldı. Dəqiq desək, Heynin Ramilin və Elvinin zərbələrini zərərsizləşdirməsindən sonra dərhal  irəli atılan estonlar 32-ci dəqiqədə hesabı açdı. Burda Anierin irəli göndərdiyi topa çatmaq uğrunda mübarizədə Coşqunu qabaqlayan Yakovlev Mehdinin məsuliyyətsizcəsinə mövqeyini tərk etməsindən də yararlanıb toru silkələdi. Bir qədər sonra həmin vəziyyət rəqib qapısı önündə təkrarlansa da, Ramil Peetsonla təkbətək mübarizədən qalib ayrıla bilmədi. Millimiz hesabı bərabərləşdirmək imkanını 45+1-ci dəqiqədə qazandı. Renat topu özünü cərimə meydançası daxilinə çatdıran Elvinə ötürdü. Belədə Tamm qapıçıyla üz-üzə qalan futbolçunu kobud müdaxiləylə dayandırdı ki, hakim "nöqtə"ni göstərdi. Toralın 11 metrlik cərimə zərbəsini dəqiq yerinə yetirməsiylə tablodakı rəqəmlər eyniləşsə də, sevincimiz uzun çəkmədi. Oyuna mərkəzdən başlayan estonlar dörd ötürmə ilə topu yenidən qapımızdan keçirdi. Bu dəfə Bədavi ilə Rahil “yuxuya getmişdi”, Sınyavski onları qabaqladı. Nəticədə millimiz fasiləyə məyus yollandı.

İkinci hissə Estoniyanın inamlı çıxışıyla başladı. Meydan sahibləri hesabın gətirdiyi arxayınlıqdan və millimizin yorğunluğundan maksimum yararlanmağa çalışırdı. 49-cu dəqiqədə Kayt uzaqdan "çərçivə"ni nişan aldı ki, Mehdi təhlükəni sovuşdurdu. Ardınca Yakovlevin qapı önünə ötürməsi qeyri-dəqiq alındığından hücum yarımçıq qaldı. Aynsalunun zərbəsindən sonra top qapıdan aralı keçdi. Millimizin ikinci yarıdakı ilk təhlükəli hücumu isə 55-cı dəqiqəyə təsadüf etdi. Aleksey Ramilin ötürməsini qəbul edə bilmədiyindən topu itirdi və rəqibin irəliləməsinə səbəb oldu. Xoşbəxtlikdən Rahil qapını nişan almağa çalışan Şeynin qarşısını aldı. Çox keçmədən Elvinin qeyri-dəqiq zərbəsinə şahidlik etdik. 

Məğlubiyyət təhlükəsinin real olduğunu görən Santuş 64-cü dəqiqədə Mahirlə Ceyhunu meydana buraxmaqla oyunun axarını dəyişməyə çalışdı. Təəssüf ki, qol yenə bizim qapımıza vuruldu. 71-ci dəqiqədə Sınyavski topa Şeynə ötürdü. O isə bir neçə futbolçumuzun - Ceyhun, Krivotsyuk və Rahilin cinayətkarcasına məsuliyyətsizliyi fonunda topu qapının uzaq küncünə göndərdi. Mehdi ilk iki qolda olduğu kimi, yenə xilaskar ola bilmədi. Hesab 1:3 olandan sonra bizimkilərin tam ruhdan düşdüyünü görmək çətin deyildi. Santuş Qismət, Emin və Rüstəmi meydana buraxmaqla “ölünü diriltməyə” çalışsa da, heç nə alınmadı.

Beləliklə, qrupdakı 3-cü oyunda da iki top fərqi ilə uduzduq. Həm də bu dəfə hər kəsin aşkar autsayder gözü ilə baxdığı estonlardan üç qol buraxdıq. Belə məğlubiyyətin nə əsası var, nə də izahı! Azərbaycan yığmasının indiki obrazına isə yalnız bir ifadə yaraşır: ayıb olsun!

Turun dünən axşam keçirilən digər oyununda
Beləliklə, ardıcıl üçüncü məğlubiyyətlə barışmalı olduq. Dünən bu qrupda daha bir oyun keçirildi: Slovakiya – İsveç 2:2.

1. İsveç 3 2 1 0 8-3 7
2. Slovakiya 3 2 1 0 5-2 7
3. Estoniya 3 1 0 2 3-5 3
4. Azərbaycan 3 0 0 3 2-8 0

Gözdən qaçmadı
* "Milli dəstə" azarkeş qrupu və təxminən yüz azarkeş yığmamızı stadiondan dəstəklədi. Onlar 44-cü dəqiqədə "Şəhidlər ölməz, vətən bölünməz" şüalarını səsləndirdilər və oyunboyu bayraqlarımızı dalğalandırdılar. 

KƏNAN BAHADIR