Sumqayıt - Qarabağ (Ağdam) 0:1 (0:0)
1. Mehdi Cənnətov – 5,5
6. Vüqar Mustafayev (k) – 5,5
14. Elvin Bədəlov – 5,5
2. Sərtan Taşkın – 5,5
(7. Rövlan Muradov, 57) – 5,0
17. Murad Xaçayev – 5,5
8. Səbuhi Abdullazadə - 6,0
19. Roy Kehat – 5,5
(30. Kamran Quliyev, 88) – qiymətsiz
99. Silvanus Nimeli – 5,0
(9. Nikola Vuynoviç, 57) – 5,0
5. Alan Dias – 4,5
23. Cordan Rezabala – 5,5
60. Tresor Mossi – 5,0
(12. Georgi Karaişvili, 79) – qiymətsiz
Ehtiyat oyunçular
94. Rəşad Əzizli
36. Xəyal Fərzullayev
10. Rəhim Sadıxov
20. Ayxan Süleymanlı
11. Fernando Medeyros
18. Kristian Velinovski
Baş məşqçi: Samir Abasov
Komandanın ən yaxşısı: Səbuhi Abdullazadə

99. Mateus Koxalski – 6,0
55. Bədavi Hüseynov (k) – 6,0
30. Abbas Hüseynov – 5,5
(44. Elvin Cəfərquliyev, 73) – 6,5
24. Aleksey İsayev – 5,5
27. Toral Bayramov – 6,0
22. Musa Qurbanlı – 5,0
(7. Yassin Benzya, 61) – 5,5
90. Nəriman Axundzadə - 5,5
(18. Olavio Juninyo, 73) – 5,0
81. Kevin Medina – 6,0
8. Marko Yankoviç – 5,5
(10. Abdulla Zubir, 73) – 5,0
21. Aleksey Kaşuk – 5,5
(15. Leandro Andrade, 61) – 5,0
11. Emmanuel Addai – 6,0
Ehtiyat oyunçular
97. Fabian Buntiç
12. Sadiq Məmmədzadə
20. Riçard Almeyda
66. Patrik Andrade
6. Julio Romao
19. Redon Cica
Baş məşqçi: Qurban Qurbanov
Komandanın ən yaxşısı: Elvin Cəfərquliyev

Qol: E.Cəfərquliyev, 74.
Vərəqələr: T.Mossi, 31 (qeyri-idman hərəkəti). M.Yankoviç, 35 (qeyri-idman hərəkəti). M.Xaçayev, 88 (qeyri-idman hərəkəti). O.Juninyo, 90+3 (qeyri-idman hərəkəti), C.Rezabala, 90+4 (qeyri-idman hərəkəti) - sarı.
Hakimlər: ELÇİN MƏSİYEV, Kamran Əliyev, Elşad Abdullayev, Pərvin Talıbov (hamısı Bakı).
VAR hakimi: Tural Qurbanov (Bakı).
VAR hakiminin köməkçisi: Eyyub İbrahimov (Bakı).
Hakim-inspektor: Asim Xudiyev (Bakı).
AFFA nümayəndəsi: Azər Əsgərov (Bakı).
6 oktyabr. Sumqayıt. Mehdi Hüseynzadə adına şəhər stadionu. 7000 tamaşaçı (9502 yerlik).
Birinci hissəyə 2, ikinci hissəyə 4 dəqiqə əlavə olunub.
Oyunun qiyməti: 6,5.

Son 5 turda qələbəyə həsrət qalan “Sumqayıt” bu dəfə çempionatın ən güclüsüylə qarşılaşdı. Əslində “Qarabağ”ın “Malmö”yə məğlubiyyəti, premyer-liqada olmasa da, avrokuboklarda uğursuz seriya yaxalaması meydan sahiblərinin azı 1 xal uğrunda döyüşməsi üçün əla motivasiya idi. Azarkeşlər də sevimli komandalarını nəhəng rəqib qarşısında tək qoymamışdı. Lakin “kimyaçılar”ın məlum çatışmazlıqları, Qurban Qurbanovun start heyətində fərqli oyunçulara, xüsusilə Musa ilə Kaşuka yer verməsinə baxmayaraq, işi yenə çətinə saldı.

Hər halda, “Sumqayıt” “doğma divarlar” arasında daha çox müdafiə olunmağa, qonaqları əks-hücumlar sayəsində üzməyə çalışdı. Yəqin ki, “gənclik şəhəri”nin təmsilçisinin ümumi durumuna bələd olanlar minimal hesablı məğlubiyyəti həzm etməkdə çətinlik çəkməz. “Qarabağ” isə liderliyi əldən vermədi. Düzü, qonaqlar Sumqayıta məhz bu məqsədlə gəldiklərini ilk dəqiqələrdən büruzə verdi. Əvvəl Abbas Yankoviçin cərimə meydançası daxilinə ötürdüyü topu başla tora qovuşdurmaq istəsə də, qeyri-dəqiq oldu. Ardından Kehat Vüqarın yaratdığı fürsəti boşa verdi. Daha doğrusu, onu Koxalskinin seyvi üzdü. 11-ci dəqiqədə bəxtini sınamaq növbəsi Torala çatdı. Yarımmüdafiəçi Addainin ötürməsindən sonra uzaq məsafədən “çərçivə”ni nişan aldı. Burda Mehdi ayıq-sayıqlığı sayəsində komandasını qoldan xilas etdi. Çox keçmədən Musa fərqlənmək eşqinə düşdü. O, Toralın çatdırdığı topa dabanla zərbə endirdi ki, Cənnətov yerində idi. 23-cü dəqiqədə “Sumqayıt”ın qapısı önündə qarışıqlıq yarandı. Komandaların 5-6 futbolçusunun iştirak etdiyi epizodda qol vurulmadı. Dəqiq desək, Addai, Medina və İsayevin zərbələri müdafiəçilər tərəfindən zərərsizləşdirildi. Təhlükə Sərtanın topu uzaqlaşdırmasıyla sovuşdu.

27-ci dəqiqədə Koxalski yüzfaizlik qol epizodunda səhvə yol vermədi və Rezabalanın qüvvətli zərbəsini dəf etdi. Ardından Addai cərimə meydançası daxilində yaxşı ötürməylə yadda qaldı. Burda Nərimanın başla zərbəsini izlədik ki, top qapının üstündən keçdi. Birinci hissənin qalan dəqiqələrində hansısa önəmli hadisə yaşanmadı. Beləcə komandalar fasiləyə qolsuz bərabərliklə yollandı.

İkinci yarı da “Qarabağ”ın təzyiqiylə başladı. 48-ci dəqiqədə Nimelinin Rezabalaya ötürdüyü topu “oğurlayan” Bədavi Addaiyə çatdırdı. Emmanuel təkbaşına irəli atıldı, rəqibin bir neçə futbolçusunu geridə qoydu və topu Kaşuka ötürdü. Aleksey Musanın qol vurmasına şərait yaratmaq istəyirdi ki, Mehdi cəld davranıb topa rəqibdən əvvəl yiyələndi.

51-ci dəqiqədə “Sumqayıt”ın qapısına penalti təyin edildi. Ona görə ki, Kamran Əliyev Abbasın cərimə meydançası daxilində ötürmə etdiyi epizodda Səbuhinin əllə oynadığını düşündü. Hər halda, ədalət təmsilçisi VAR-a baxandan sonra qərarını dəyişdi. Musa qeyri-dəqiq zərbə ilə Medinanın ötürməsini boşa verdi. Bir qədər sonra Addai Qurbanlının uğursuzluğunu təkrarladı. “Kimyaçılar”ın ikinci hissədəki ən təhlükəli hücum cəhdi 63-cü dəqiqəyə təsadüf etdi. Lakin Rövlanın ötürməsini qəbul edən Kehat Bədavi səddini keçə bilmədi. Topu dərhal ələ keçirib qapını nişan alan Rezabala isə qeyri-dəqiq oldu. Bir qədər sonra Mehdi Addainin hesabı açmaq cəhdinə qarşı çıxdı. Qolkiper Leandronun da qol vurmasına imkan vermədi.

Nəhayət, 74-cü dəqiqədə hesab açıldı. Toralın cərimə meydançasına ötürməsini Dias uğursuz şəkildə qarşıladı, belədə top Elvinin önünə düşdü. Yenicə meydana çıxan futbolçu fürsəti əldən vermədi, sol ayağıyla topu tora göndərdi. Ardınca Benzya ilə Rövlanın fərqlənmək cəhdinə şahidlik etdik. Hər halda, hesab dəyişmədi. Beləliklə, “Qarabağ” adəti üzəri zirvədədi. “Sumqayıt” isə yola autsayderlər qrupunda davam etməlidi.

Gözdən qaçmadı
* Elçin Məsiyev birinci hissənin gedişində əzələsini dartdığı üçün ikinci yarıda ehtiyat hakim Kamran Əliyev iş başında oldu.
* Jurnalistlərin fasilədə çalışması və dincəlməsi üçün ayrılan otaqlarda xeyli kənar şəxslər var idi. Onlar media nüməyəndələrinin həm işinə, həm də qidalanmasına mane oldu.
* “Qarabağ Ordu”, “İmarət Tayfa”, “Kimyaçılar” və “UltraSumqayıt” fanklubları tribunalarda idi. “Qarabağ” qələbəni azarkeşləriylə birgə qeyd etdi. “Sumqayıt”ın tərəfdarları da komandanı yanına səsləyib alqışladı, Mehdi Cənnətova isə şüarlarla xüsusi təşəkkür etdilər.

KƏNAN BAHADIR