Misli premyer-liqasında 1-ci dövrənin sonuncu turunun ilk oyunu bu gün Tovuzda keçiriləcək.

Əzəli rəqiblərin qarşılaşması "CBC Sport"un efirində canlı yayınlanacaq.

Misli premyer-liqası
1-ci dövrə, 9-cu tur
4 oktyabr
Kəpəz – Neftçi 4:3
Orxan Əliyev, 24, 32. Məhəmməd Ba, 41. Viktor Braqa, 48. - Ervin Koffi, 4. Ramil Şeydayev, 31. Ağadadaş Salyanski, 90+5.
“Kəpəz”in bu rəqiblə ev oyunlarının balansı: 28:+13=5-10, 32:37.
1992 - 1:0; 1992/93 - 2:0; 1993/94 – 1:0; 1994/95 – 2:1; 1995/96 – 0:0, 2:1; 1996/97 – 1:1; 1997/98 – 2:0; 1998/99 – 2:0, 1:0; 1999/00 – 1:0; 2000/01 – 1:3; 2001/02 – 2:1; 2003/04 – 1:2; 2004/05 – 0:1; 2005/06 – 0:5; 2010/11 – 0:4; 2011/12 – 1:1; 2012/13 – 0:3; 2015/16 – 1:1, 1:2; 2016/17 – 2:0, 2:0; 2017/18 – 0:1, 1:2; 2022/23 – 0:2, 1:3; 2023/24 – 1:0, 3:3.
Cəzalı: yoxdu.
"Futbol+"in proqnozu: 30-30-40.
Tovuz, şəhər stadionu. Saat 17.00.

Yuxarıdakı statistikadan da göründüyü kimi, "Kəpəz" - "Neftçi" duelləri 30 ildən çox tarixə malikdi. Rəqəmlər də demək olar ki, eynilik təşkil edir. Sadəcə, bəzi cəhətlərdə bakılıların, bəzilərində isə gəncəlilərin cüzi üstünlüyü var.

Komandaların indiki vəziyyəti də bir-birinə bənzəyir. Hər ikisi tarixi fiasko yaşamaqdadı. Mövsüm başlayandan bəri qələbəyə həsrət qalan "sarı-göylər" 10-cu, eyni taleni bölüşən "ağ-qaralar" 8-ci pillədə qərarlaşıb. Bu üzdən oyunu derbi, yoxsa autsayderlərin dueli adlandırmaqda çətinlik çəkdik. O başqa məsələ ki, hər iki ifadə rəqiblərin “əyninə biçilib”. 

"Yaşlılara çomaq verin!" sərlövhəli köşə yazısında "Kəpəz"lə "Neftçi"nin tarixindən, özünəməxsus ənənələrindən və zəngin təcrübəsindən bəhs etmiş, indiki durumda "çomağ"ın vacibliyini vurğulamışdıq. 8-ci turda "Zirə" Gəncə təmsilçisinə aman vermədi və rəqibini meydandan əli ətəyindən uzun yola salmaqla belini bir az da bükdü. Hamı uğursuz seriyanın davamında klubu hansı fəlakətin gözlədiyini dərk edir. İndi "sarı-göylər" hər matça final səviyyəsində yanaşmağa məcburdu. Ona görə ki, rəqibləri xal ehtiyatını artırır. Bu üzdən komanda meydana qələbədən başqa məqsədlə çıxa bilməz. Qısası, buna haqqı yoxdu! Daha doğrusu, mövsümün yenicə başlamasına baxmayaraq, limit tükənir. Qorxuducu psixoloji təzyiq özünü göstərdiyi anda gəncəli azarkeşlər yalnız quru ümidə bel bağlamalı olacaq. Bunun üçün döyüşmək mütləqdi. Amma və lakin...

"Neftçi"nin də durumunu fərqli saya bilmərik. "Ağ-qaralar"ın premyer-liqanı tərk edəcəyi yönündə təhlükəni hələ heç kim ciddi qəbul etmir. Bu dəlil daha çox lağ məqsədi ilə dilə gətirilir. İş orasındadı ki, müasir futbolda istisna yoxdu, sürprizlər var. Heç kim belə təhlükədən "sığortalanmayıb". Düzdü, bu barədə danışmaq üçün çox tezdi. Amma zaman komandaların əleyhinə işləyir və qələbə qazanılmayan hər oyun növbəti dəfə cəhd etmək üçün lazım olan motivasiyaya ciddi zərbə vurur.

Şənbə günü "doğma divarlar" arasında,  4 minə yaxın azarkeşinin önündə "Sumqayıt"ı yenə bilməyən komanda səfərdən qələbəylə qayıtmasa, baş məşqçi Roman Qriqorçukun istefası da gündəmdədi. Bəli, reallığa əsaslanan proqnozlar "Neftçi"nin derbidən üzüağ ayrılacağına işarə edir. Yenə də "sarı-göylər"in qələbəsi sürpriz sayılmayacaq. Necə deyərlər, itirəcək bir şeyi olmayanlardan qorx!

Bu komandalar indiyə qədər 59 oyunda qarşılaşıb. Bunların 19-da "Kəpəz", 29-da "Neftçi" qələbə qazanıb, 11-də qalib müəyyənləşməyib. Topların nisbətində "ağ-qaralar" öndədi - 95:56.

KƏNAN BAHADIR