Səbail – Sabah 2:4 (1:3)
1. Hüseynəli Quliyev – 4,5
20. Mərt Çəlik – 4,5
74. Yusif Nəbiyev (k) – 5,0
3. Dmitri Litvin – 4,5
44. Amir Bilali – 5,5
77. Fərid Nəbiyev – 5,0
7. Madi Queta – 4,5
(14. Suleyman Alluş, 67) – 4,5
11. Rüfət Abdullazadə - 5,0
8. Qorka Laruçça – 4,5
(83. Nihad Quliyev, 83) – qiymətsiz
5. Gitay Sofir – 4,5
(10. David Qomis, 77) – qiymətsiz
21. Ayman Bouali - 5,0
(19. Samir Abdullayev, 67) – 4,5
Ehtiyat oyunçular
12. Əlirza Müştəbazadə
25. Nicat Məmmədzadə
6. Cabir Əmirli
18. Süleyman Əhmədov
15. Vüsal Məsimov
16. Emin Rüstəmov
Baş məşqçi: Şahin Diniyev
Komandanın ən yaxşısı: Amir Bilali
55. Nicat Mehbalıyev – 5,5
2. Amin Seydiyev – 5,5
7. Boyan Letiç – 6,0
40. İqor Noqeyra – 5,0
(44. Sofian Çakla, 87) – qiymətsiz
3. Con İrasabal – 5,5
4. Elvin Camalov (k) – 5,5
(9. Anatoli Nuriyev, 55) – 5,0
20. Coy-Lens Mikels – 5,5
(88. Xəyal Əliyev, 81)
10. Namik Ələskərov – 5,0
(77. Şakir Seyidov, 81) – qiymətsiz
13. İvan Lepinitsa – 5,0
70. Cesse Sekidika – 5,5
18. Pavol Şafranko – 5,5
Ehtiyat oyunçular
1. Yusif İmanov
94. Rəvan Mirzəmmədov
17. Tellur Mütəllimov
5. Rəhman Daşdəmirov
6. Abdulax Xaybulaev
22. Abdulla Rzayev
99. Neqoş Kupusoviç
Baş məşqçi: Krunoslav Renduliç
Komandanın ən yaxşısı: Boyan Letiç

Qollar: A.Bilali, 4 (1:0, Q.Laruçça). C-L.Mikels, 8 (1:1, B.Letiç). İ.Lepinitsa, 21 (1:2). C.Sekidika, 27 (1:3, B.Letiç). R.Abdullazadə, 39 (2:3, A.Bouali). P.Şafranko, 76-p. (2:4).
Vərəqələr: D.Litvin, 40 (qeyri-idman hərəkəti). D.Qomis, 45+2 (hakimin qərarına etiraz). Q.Laruçça, 45+2 (hakimin qərarına etiraz). A.Seydiyev, 59 (qeyri idman hərəkəti). M.Çəlik, 62 (qeyri idman hərəkəti). İ.Lepinitsa, 65 (qeyri-idman hərəkəti). İ.Noqeyra, 68 (qeyri-idman hərəkəti). R.Abdullazadə, 73 (qeyri-idman hərəkəti). P.Şafranko, 76 (hakimin qərarına etiraz). Y.Nəbiyev, 80 (qeyri-idman hərəkəti). S.Abdullayev, 88 (qeyri-idman hərəkəti) – sarı.
Hakimlər: KAMAL UMUDLU, Vüsal Məmmədov, Eyyub İbrahimov, Kamran Əliyev (hamısı Bakı).
VAR hakimi: Fərid Hacıyev (Bakı).
VAR hakiminin köməkçisi Şirmamed Mamedov (Bakı).
Hakim-inspektor: Rəhim Həsənov (Bakı).
AFFA nümayəndəsi: Elçin Məmmədov (Bakı).
22 sentyabr. Bakı. “ASCO Arena”. 600 tamaşaçı (3200 yerlik).
Birinci hissəyə 2, ikinci hissəyə 4 dəqiqə əlavə olunub.
Oyunun qiyməti: 5,5.

“Səbail”in işlərinin bu mövsüm qaydasında getmədiyi artıq heç kimə sirr deyil. “Sabah”la oyuna qədər cəmi bir qələbə qazanan “dənizçilər” təkcə “Kəpəz”i üstələməyi bacarmışdı. Bu səbəbdən də Şahin Diniyevin komandasının “Sabah”la oyunda qələbə üçün meydana çıxacağını təxmin etmək çətin deyildi. Amma qüvvələr nisbəti, bu tura qədər qeydə alınan nəticələr qonaqların bu görüşdə favorit sayılmasını şərtləndirirdi. Elə 90 dəqiqənin tamamında da “Sabah” favorit adını təsdiqlədi. Maraqlıdı ki, hesabı meydan sahibləri açdı. Artıq 4-cü dəqiqədə Nicat Mehbalıyev topu tordan çıxarmalı oldu. Cərimə zərbəsini yerinə yetirən Laruçça topu qapıya doğru havalandırdı. Orda hamıdan yüksəyə tullanan Bilali başıyla topu qapıdan keçirdi. Bu üstünlük cəmi 4 dəqiqə çəkdi. Bayıldan Masazıra xalsız qayıtmaq fikri olmayan “bayquşlar” qolun şokundan tez ayılıb, irəli atıldılar. Çox keçmədi ki, hesab bərabərləşdi. Letiç əla reyd edib, Mikelsi zərbə mövqeyinə çıxardı. Almaniyalı futbolçu soyuqqanlı şəkildə qapı torunu silkələdi.

Hesab bərabərləşəndən sonra da “Sabah”ın hücumları davam edirdi. Səviyyə fərqini ortaya qoyan qonaqların tezliklə hesabda önə çıxacağı aşkar görünürdü. Elə gözlənildiyi kimi də oldu. 21-ci dəqiqədə Namikin elə də qüvvətli olmayan cərimə zərbəsini tutmağa çalışan “Səbail”in qapıçısı kobud səhvə yol verdi. Onun əlindən buraxdığı topu Lepinitsa qapıdan keçirdi. Bundan üç dəqiqə sonra “Sabah” daha bir qol fürsətini qaçırdı. Qapı tiri qonaqların sevinməsinə mane oldu. Həmin epizodda dərindən köks ötürən “Səbail” azarkeşləri 27-ci dəqiqədə daha bir qola üzüldülər. Oyunu yüksək səviyyədə keçirən Letiç bu dəfə Sekidikaya məhsuldar ötürmə verdi. Müdafiəçilərin nəzarətsiz buraxdığı Sekidika başla fərqlənməklə cari mövsümkü beşinci qolunu vurdu.

Topa və meydana nəzarəti əlində saxlayan “Sabah” qoldan doymurdu. 34-cü dəqiqədə Namik Ələskərovun yerinə yetirdiyi künc zərbəsindən sonra Şafranko daha bir dəfə “Səbail”in qapı torunu silkələdi. Hakim Kamal Umudlu əvvəlcə mərkəzi göstərsə də, sonradan VAR monitoruna baxmağa yollandı. VAR-ın müdaxiləsindən sona “Sabah”ın futbolçusunun topa yüksələrkən qaydanı pozduğu təsdiqləndi və qol qeydə alınmadı. Bununla belə, fasiləyə qədər azarkeşlər daha bir qol izlədi. Fərqlənmək növbəsi meydan sahiblərinə çatdı ki, Rüfət Abdullazadə Boualinin əla ötürməsini dəqiq zərbə ilə qapıdan keçirdi. Fərqin minimuma enməsi qalan dəqiqələrdə mübarizənin daha da gərgin keçəcəyindən xəbər verirdi. Rüfətin qolu həm də “Sabah” üçün “həyacan təbili” idi. Hücuma hədsiz aludə olan qonaqlar müdafiədə boşluqlar verirdi ki, bu da qələbənin əldən çıxmasıyla nəticələnə bilərdi. Bunu yaxşı anlayan Renduliç yetirmələri müdafiədə diqqətli oynamağa başladılar. Heç də təsadüfi deyil ki, 39 dəqiqəsinə 5 qol sığan qarşılaşmanın qalan vaxtı ərzində azarkeşlər cəmi bir qola şahid oldular. Həmin qolu da Şafranko 76-cı dəqiqədə penaltidən vurdu. Penalti isə bir qədər kuryoz şəkildə təyin edildi. İrasabal topa doğru qaçarkən Sofirlə toqquşdu və hər iki futbolçu müvazinətini itirdi. VAR-a baxmağa yollanan Kamal Umudlu geri qayıdıb “nöqtə”ni göstərdi. Şafranko penaltini qola çevirməklə yekun hesabı müəyyənləşdirdi.

Gözdən qaçmadı
* Bu dəfə “Səbail”in azarkeş ordusunun tərkibində müəyyən dəyişiklik var idi. Yeni Salyan şossesində yerləşən Jurnalistlər Binasında yaşayanların bir qrupu azarkeşlərə qoşulmuşdu. Onlar arasında məşhur şair Qulu Ağsəs də var idi. Elə hamılıqla stadiona yollanmaq təşəbbüsü də ondan gəlmişdi.

AMAL