Belə olsa, “Neftçi” “Səbail”i “Dalğa”da qəbul edəcək
Ölkə kuboku uğrunda mübarizəni yarımfinalda dayandırandan sonra Avroliqaya vəsiqə üçün gözünü çempionata dikən “Neftçi”ni qarşıda biri-birindən gərgin dörd oyun gözləyir. Təqvimə əsasən həmin qarşılaşmalardan 3-ü səfərdə baş tutacaq. Bu həftəsonu “Keşlə”nin qonağı olacaq bakılılar növbəti ayın ilk həftəsində “Azərsun Arena”da “Qarabağ”a hesabat verməlidi. Sonuncu turda isə “ağ-qaralar” çətin Gəncə səfəri gözləyir.
Yerdə qalan bir oyun, yəni 27-ci turda “Səbail”lə qarşılaşma əslində “Bakcell Arena”da baş tutmalıdı. Lakin bu oyun da başqa arenada keçirilə bilər. İş burasındadı ki, “8-ci kilometr”dəki stadionun təmirə bağlanmaq ehtimalı var. Yayda təmsilçilərimizin Avroliqadakı iştirakını nəzərə alan “Bakcell Arena”nın rəhbərliyi işini ehtiyatlı tutaraq, iki ay əvvəldən tədarük görmək fikrindədi. Hər il necədisə, bu il də elə.
Lakin məsələ hələ ki açıq qalıb. Təmirlə bağlı yekun qərar verilmədiyindən, “Neftçi” – “Səbail” görüşünün harda keçiriləcəyi dəqiq bilinmir. “Bakcell Arena”nın qapıları bağlansa, komandalar münasibətlərinə “Dalğa Arena”da aydınlıq gətirəcək. Belə ki, “ağ-qaralar” ikinci stadion kimi oranı sifariş edib.
HƏBİB