Qış fasiləsindən sonra “Zirə”nin işləri qaydasında getmir. “Qartallar” çempionatın ikinci yarısında qələbəyə həsrətdi. Bunun əsas səbəblərindən biri komandadakı itkilərlə bağlıdı. Qış fasiləsindən sonra cəza və zədələr üzündən qəsəbə təmsilçisi, demək olar, yarımcan heyətlə mübarizə aparıb. Hazırda da problem ciddiliyini qoruyur. Tutaq ki, “Qarabağ”la bugünkü qarşılaşmanı Milan Duriç buraxacaq. O vərəqə limitini doldurduğuna görə meydana çıxa bilməyəcək. Zədəlilərə gəlincə, yalnız Aleksandr Dedov “köhlən atlar”a qarşı oynaya bilər. Düzdü, Jozef Bum da zədəsini sağaldıb. Lakin uzun müddət yaşıl meydanlardan uzaq qalan müdafiəçi oyun təcrübəsindən əziyyət çəkir. O üç gündü məqşlərə qoşulub. Oynayıb-oynamaması çalışdırıcının qərarından asılı olacaq. Sadio Tounkara, Riçard Qadze və Yovan Krneta isə hazırda müalicə alır. Aleksandr Şemonayevin mövsümü başa vurduğunu daha öncədən xəbər vermişdik. Belə ki, məşq zamanı xəsarət alan 33 yaşlı müdafiəçinin ayağında çat aşkarlanmışdı. Hələ gələn həftənin ilk günü ayağındakı gips açılacaq. Odu ki, onun tezliklə sıraya dönməsi real görünmür.
FARİZ