Qarabağ (Ağdam) - Neftçi (Bakı) 4:0 (3:0)
99. Mateuş Koxalski - 6,0
55. Bədavi Hüseynov (k) - 6,0
(30. Abbas Hüseynov, 85) - qiymətsiz
13. Bəhlul Mustafazadə - 6,0
44. Elvin Cəfərquliyev - 6,0
27. Toral Bayramov - 5,5
(15. Leandro Andrade, 65) - 6,0
10. Abdulla Zubir - 5,5
(11. Emmanuel Addai, 71) - 5,0
66. Patrik Andrade - 6,5
7. Yassin Benzya - 7,5
(8. Marko Yankoviç, 85)
18. Olavio Juninyo - 7,0
(90. Nəriman Axundzadə, 65) - 6,0
2. Mateus Silva - 7,0
6. Julio Romao - 6,0
Ehtiyat oyunçular
97. Fabian Buntiç
20. Riçard Almeyda
24. Aleksey İsayev
22. Musa Qurbanlı
81. Kevin Medina
19. Redon Cica
21. Aleksey Kaşuk
Baş məşqçi: Qurban Qurbanov
Komandanın ən yaxşısı: Yassin Benzya
93. Rza Cəfərov - 6,0
3. Höccət Haqverdi - 5,0
90. Ramil Şeydayev (k) - 5,0
13. Emil Səfərov - 5,5
14. Edvin Kuç - 5,0
(6. Rafael Quzzo, 87) - qiymətsiz
44. Yuri Matias - 5,5
23. Robert Bauer - 4,5
24. Mustafa Sek - 5,0
9. Andre Şinyaşiki - 5,0
(99. Ervin Koffi, 60) - 5,0
22. Dembo Darbo - 5,0
88. Andrey Ştoqrin - 4,5
(11. Kilan Lebon, 46) - 5,0
Ehtiyat oyunçular
1. Emil Balayev
30. Rustam Samiqullin
8. Emin Mahmudov
17. Rəhman Hacıyev
19. Azər Salahlı
91. Ağadadaş Salyanski
47. Murad Məmmədov
4. Mark Tamaş
77. Yeqor Boqomolski
Baş məşqçi: Roman Qriqorçuk
Komandanın ən yaxşısı: Rza Cəfərov

Qollar: R.Bauer, 18-öz qapısına (1:0). O.Juninyo, 29 (2:0, M.Silva). Y.Benzya, 45+2 (3:0, P.Andrade). L.Andrade, 90+1 (4:0, N.Axundzadə).
Vərəqələr: M.Silva, 44 (qeyri-idman hərəkəti). J.Romao, 84 (oyun qaydalarının sistematik şəkildə pozulması) - sarı.
Hakimlər: ƏLİYAR AĞAYEV, Zeynal Zeynalov, Akif Əmirəli, Əli Əliyev (hamısı Bakı).
VAR hakimi: İnqilab Məmmədov (Bakı).
VAR hakiminin köməkçisi: Namiq Hüseynov (Bakı).
Hakim-inspektor: Ramil Diniyev (Bakı).
AFFA nümayəndəsi: Zaur Hacıməhərrəmov (Bakı).
20 sentyabr. Bakı. “Azərsun Arena”. 3000 tamaşaçı (5800 yerlik).
Hər hissəyə 2 dəqiqə əlavə olunub.
Oyunun qiyməti: 6,5.

Matçın önəmi kiçikdən böyüyə hər kəsə bəlliydi. "Qarabağ" nəinki Azərbaycan derbisinin qalibi olmaq, həm də liderliyə yüksəlmək niyyəti ilə meydana çıxdı. "Neftçi" isə əzəli rəqibi məğlub etməklə böyük psixoloji üstünlük qazanmaq istəyirdi. Bu, xüsusilə, Roman Qriqorçukun sürətlə korlanmaqla olan karyerası üçün "nəfəslik" sayılacaqdı. Matçın "Neftçilər Günü”ndə keçirilməsi də mümkün qələbəyə rəmzi xarakter verəcəkdi. Və belə bir önəmli oyunda Emin Mahmudov ehtiyatda qalmışdı. Deməli, onun klub daxilində artıq dağıdıcı fiqura çevrilməsi haqqında yayılan söz-söhbət əbəs deyil.
İlk dəqiqələrdə meydanda bərabər mübarizəyə şahidlik etdik. Komandalar qapı önünə qədər olan məsafəni qısa ötürmələr sayəsində qət etməyə çalışırdı. Lakin nə "Qarabağ", nə də "Neftçi" hədəfinə çata bilirdi. Gah qayda pozuntusu, gah da müdafiə xəttinin müdaxiləsi təhlükəli vəziyyətin yaranmasına mane olurdu. Bu sırada yalnız Patrikin zərbəsini qeyd edə bilərik ki, Rza topa asanlıqla yiyələndi. Yenə də hesabın açılması üçün çox gözləmək lazım gəlmədi. 18-ci dəqiqədə Juninyo Zubirin göndərdiyi topu qəbul edib Elvinə çatdırdı. Sonuncunun qapıya paralel ötürdüyü top Bauerin yöndəmsiz müdaxiləsiylə tora qovuşdu. VAR-ın uzun-uzadı sürən incələməsindən sonra qol qeydə alındı. Bir qədər sonra "Qarabağ"ın növbəti hücum cəhdini izlədik. Bu dəfə Matias özünü Benzyanın "çərçivə"yə göndərmək istədiyi topa sipər etdi.

Ağdamlılar oyunun axarına diqtə edir, təhlükəli vəziyyətlər sıralanırdı. 29-cu dəqiqədə Sekin yubanmasından yararlanan Silva topu dərhal önə yolladı. Burda topu qəbul edən Juninyo bir qədər irəliləyib "çərçivə"ni dəqiq nişan aldı. Nə müdafiəçilər braziliyalıya mane oldu, nə də Rza onun uzaq küncə göndərdiyi topa çata bildi. Heç yarım saat tamam olmamış hesabda 0:2 geri düşən "Neftçi"ni irəli atılmaqdan başqa çarəsi yox idi. Lakin "Qarabağ"ın müdafiə xətti etibarlı çıxışla rəqibə imkan vermədi. Bu mənada fərqlənən Ramilin canfəşanlığı oldu ki, Bəhlul qapı xəttinin yaxınlığında topu meydandan çıxardı. Birinci hissənin növbəti təhlükəli vəziyyəti qolla nəticələndi. Elvin 45+3-cü dəqiqədə Emilin itirdiyi topu “oğurlayaraq” irəliyə doğru sürət yığdı. O, Patrikə, sonuncu Benzyaya ötürmə etdi ki, Yassin hesabı darmadağın həddinə çatdırdı.

Qriqorçuk ikinci hissənin əvvəlində Ştoqrinin əvəzinə Lebonu meydana buraxdı. Etiraf edək ki, "Neftçi" bundan sonra daha əzmkar oynadı. Əlbəttə, burda "Qarabağ"ın təzyiqi böyük ölçüdə azaltmasının da payı var. "Köhlən atlar" 61-ci dəqiqədə bəxtini sınadı. Matiasın topu itirməsiylə irəli atılan Zubir Benzyaya ötürmə versə də, Rza onun zərbəsini zərərsizləşdirdi. Bir qədər sonra Nərimanın qapını nişan almasına Matiasın müdaxiləsi mane oldu. Onun növbəti cəhdi Rzanın irəli atılaraq topa yiyələnməsiylə boşa çıxdı. Halbuki Nəriman Zubirin ötürməsinə vaxtında çatsaydı, yaxşı fürsət qazanacaqdı. Axundzadə bir qədər sonra yenə komandasını məyus etdi. O, bu dəfə Romaonun çatdırdığı topu qeyri-dəqiqlik üzündən tora qovuşdura bilmədi. Futbolçu özü fərqlənə bilməsə də, 90+1-ci dəqiqədə Leandronun qolu üçün məhsuldar ötürmə verdi. Andradenin müdafiə xəttini yararaq topu tora qovuşdurmasıyla hesab 4:0 oldu! Beləliklə, derbi "Qarabağ"ın parlaq qələbəsiylə yekunlaşdı. Ağdamlılar ən azı bir günlüyə liderliyə yüksəldi.
"Neftçi" isə 7 turdan sonra cəmi 4 xal toplayıb. Doğrudan da, çox acınacaqlı nəticədi. Və bundan da acınacaqlısı Qriqorçukun indiki durumdan heç cür çıxış yolu tapa bilməməsidi.

Gözdən qaçmadı
* Matçdan əvvəl "İmarət Tayfa" ilə "Forza Neftçi" arasında kütləvi dava yaşandı. Polis əməkdaşları dərhal hadisəyə müdaxilə etdi.
* Futbolçular meydana daxil olandan sonra üzərində "20 sentyabr - Azərbaycan Respublikasının Dövlət Suverenliyi Günü" yazılan pankartı qaldırdılar. Ardınca tamaşaçılara əlamətdar günlə bağlı məlumat verildi.
* "Neftçi" azarkeşləri "Qarabağ"ın ilk qolundan sonra dəstəyi birəbeş artırdı. "Köhlən atlar"ın tərəfdarları qollar vurulduqca onlara "Neftçi", ha-ha-ha", "Neftçi" divizion səni gözləyir" "Aşsüzənlər", "Sağ ol, Qriqorçuk" şüarlarıyla qarşılıq verdi.
* Matçdan sonra "Forza Neftçi" ilə fotoqraflardan biri arasında anlaşmazlıq baş verdi. Fanklub "fuck you media" şüarıyla jurnalistləri təhqir etdi. Həmçinin komanda ilə azarkeş qrupu arasında məğlubiyyətlə bağlı ənənəvi müzakirə oldu.

KƏNAN BAHADIR