Konfrans Liqası
pley-off, ilk oyun
Omoniya (C.Kipr) – Zirə 6:0 (3:0)
40. Fabiano Freytas (k)
2. Alfa Dionku
5. Senu Kulibali
30. Nikolas Panayotu
24. Amin Xammas
80. Novitsa Erakoviç
20. Mateo Mariç
(31. Yannis Kusulos, 73)
11. Evandro
(10. Omer Atsili, 63)
21. Veliko Simiç
(76. Xaralampos Xaralambus, 73)
14. Mariuş Stempinski
(9. Andronikos Kakullis, 73)
7. Villi Semedo
(99. Saydu Alium, 82)
Ehtiyat oyunçular
23. Fransis Uzoho
98. Xaralampos Kiryakidis
4. Filip Helander
17. Yannis Masuras
22. Adam Lanq
33. Mateuş Musialovski
85. Angelos Neofitu
Baş məşqçi: Valdas Dambrauskas

97. Tyaqo Silva
32. Qismət Alıyev (k)
3. Ange Mutsinzi
4. Ruan Renato
11. Rüstəm Əhmədzadə
(18. Junior Martins, 46)
15. Pyer Zebli
7. Məqsəd İsayev
(16. Fuad Bayramov, 46)
21. Hacıağa Hacıyev
(29. Ceyhun Nuriyev, 46)
6. Eldar Quliyev
(28. Abbas İbrahim, 58)
23. Rafael Utziq
90. Davit Volkov
(5. Stefan Aka, 75)
Ehtiyat oyunçular
13. Aydın Bayramov
41. Anar Nəzirov
99. Səlim Həşimov
8. İsmayıl İbrahimli
14. Elçin Əlicanov
19. Salifu Suma
10. Georgi Papunaşvili
Baş məşqçi: Rəşad Sadıqov

Qollar: A.Xammas, 13 (1:0). V.Semedo, 34-p (2:0). M.Stempinski, 45+1 (3:0). M.Stepinski, 54 (4:0). Evandro, 60 (5:0). V.Semedo, 70 (6:0).
Vərəqələr: E.Quliyev, 27. T.Silva, 31. R.Renato, 33. P.Zebli, 70 – sarı.
Hakimlər: YURİ FİŞER, Veyko Motsnik, Sander Saqa, Kristo Kristo Küllyastinen (hamısı Estoniya).
VAR hakimi: Kristo Tohver (Estoniya).
VAR hakiminin köməkçisi: Yonas Yanovits (Estoniya).
UEFA nümayəndəsi: Haris Qvozden (Bosniya və Hersoqovina).
Hakim-inspektor: Xristof Dyerik (Belçika).
22 avqust. Nikosiya. “GSP Arena” satdionu. 16551 tamaşaçı.
Hər hissəyə 2 dəqiqə əlavə olunub.

15 (9) qapıya (“çərçivə”yə) zərbə 5 (3)
5 künc zərbəsi 3
1 ofsayd 0
10 qayda pozuntusu 14
0 (0) sarı (qırmızı) vərəqə 4 (0)
56 topa sahibolma (faizlə) 44

Həm avrokuboklarda, həm də ölkə çempionatında yeni mövsümə uğurlu başlayan “Zirə” futbol ictimaiyyətinin rəğbətini qazana bilmişdi. Doğrusu, komandanın bura qədər gəlib çıxacağı da bir o qədər inandırıcı deyildi. Amma “qartallar” əzmkarlıqla buna nail olmuş, azarkeşlərin qrup ümidini artırmışdı. Əlbəttə, oyundan öncə də favorit “Omoniya” idi. Lakin belə acınacaqlı məğlubiyyətlə qarşılaşmaq... Futboldu, hər şey baş verə bilər. Uduza, darmadağın ola bilərsən. Sadəcə, “Zirə”nin meydanda göstərdiyi oyun futbol deyildi!

Gözlənildiyi kimi, meydan sahibləri oyuna fəal başladı. Artıq 9-cu dəqiqədə Mariçin qapı önünə ötürməsindən sonra Stempinskinin başla zərbəsi qapıdan azca aralı keçdi. Stempinski... Bu soyadı yadda saxlayaq. Çünki bir qədər sonra bu oyunçunu daha yaxından tanıyacağıq. 11-ci dəqiqədə kobud top qəbulundan sonra qayda pozuntusuna yol verən Hacıağanın sayəsində rəqib cərimə zərbəsi qazandı. Standart vəziyyəti yerinə yetirən Xammas zərgər dəqiqliyi ilə baxımlı qola imza atdı. Qapı çatına dəyən top xətdən içəri düşdü - 1:0. Aşkar dominantlıq edən “Omoniya” 29-cu dəqiqədə qapımız önündə daha bir təhlükəli vəziyyət yaratdı.

Mariçin ötürməsindən sonra ustalıqla çevrilərək Qismətdən sıyrılan Semedonun zərbəsi qapının üstündən keçdi. Bu epizoddan sonra əli qulağına gedən baş hakim VAR incələməsindən sonra “qartallar”ın qapısına penalti təyin etdi. Videotəkrarda künc zərbəsi zamanı Tyaqonun rəqib futbolçunu yerə yıxdığını gördük. Penaltini yerinə yetirən Semedo qapıçı ilə mübarizədən məğlub ayrılsa da, Renatonun zərbə anında vaxtından əvvəl cərimə meydançasına daxil olması zərbənin təkrarlanmasıyla nəticələndi. Semedo 2-ci şansı boşa vermədi.

35-ci dəqiqədə Rüstəmə qarşı kobudluğa görə hakim “Zirə”nin xeyrinə cərimə zərbəsi təyin etdi. Qismət yaxın “doqquzluğ”u hədəf aldı. Zərbə yetərincə təhlükəli alınsa da, rəqib qapıçı üzərinə düşəni etdi. Epizodun davamında künc zərbəsi qazanan “qartallar” daha bir qol vəziyyəti yaratdı. Qismətin ötürməsindən sonra Renatonun başla “çərçivə”yə ünvanladığı topu Stempinski qapı xəttinin üzərindən çıxardı. 1-ci uzatma dəqiqəsində Xammasın ötürməsindən sonra mərkəz müdafiəçilərinin yuxulaması sayəsində Stempinski tək toxunuşla topu tora qovuşdurdu – 3:0. Bununla da artıq oyunun taleyi həll olundu.

Rəşad Sadıqov 2-ci hissəyə üç dəyişikliklə başlamaqla əslində start heyəti ilə bağlı seçiminin səhv olduğunu etiraf etdi. Amma 2-ci hissədə də meydanda təkqapı oyun getdi. 54-cü dəqiqədə Stempinskinin boş qapıya zərbəsinin qarşısını Ceyhun kəsdi. Hücumun davamında Mariçin ötürməsi zamanı nəzarətsiz qalan Stempinskinin qarşısını bu dəfə heç kim ala bilmədi – 4:0. Artıq “qartallar” çox ümidsiz görünürdü. 60-cı dəqiqədə Fuad rəqibə daha bir qol bağışladı. Amma bu da son deyildi. Tam bir xaos yaşayan “Zirə” 10 dəqiqə sonra 6-cı qolu da buraxdı. Cütün taleyini həll edən Kipr yunanları qalan vaxtda oyunun tempini aşağı saldı. “Zirə”nin isə təsəlli qolu vurmağa da gücü çatmadı. 79-cu dəqiqədə Akanın zərbəsi qapının üstündən keçdi, iki dəqiqə sonra Martinsin zərbəsini qapıçı dəf etməyi bacardı.

“Zirə” vətənə darmadağınla döndü. Bir həftə sonra keçiriləcək cavab oyunu artıq formal xarakter daşıyır. Təəssüf ki, “qartallar” ümumilikdə yaxşı təsir bağışladığı avrokubok mövsümünün sonunda acı məğlubiyyətlə üzləşdi.

Gözdən qaçmadı
* Rəşad Sadıqov penalti qərarına etiraz etdiyinə görə “sarı” aldı.
* Oyunu izləyənlər arasında heç bir azərbaycanlı yox idi. “Zirə” tam dəstəksiz qalmışdı.

KAMAL SƏFƏR