Topaz premyer-liqasında 23-cü tur kubokun yarımfinalının cavab görüşləri ərəfəsində baş tutdu. Bu səbəbdən kubokda iştirak etməyən, daha doğrusu, mübarizədən kənarlaşdırılan “Qarabağ”la “Kəpəz” bir gün tez – şənbə günü meydana çıxdı. Ağdamlılar yenə nəticə baxımından “sürüşkən” görünən hesabla, əslində isə çətinlik çəkmədən qələbə qazandı. Qurban Qurbanovun komandasına qələbəni Ramil Şeydayev qazandırdı ki, millinin üzvü, nəhayət, “Qarabağ”da qol hesabını açdı. Son illərin dəyişməz çempionunu növbəti “qızıl”dan bir addım ayırır. Bu, növbəti turda da baş verə bilər. Komanda hətta şənbə günü “Sumqayıt”a uduzsa belə, əsas rəqibi “Qəbələ” üçün əlçatmaz ola bilər. Dünən “Səbail”lə görüşdə büdrəyən Roman Qriqorçukun komandası onsuz da möcüzəyə bağlı olan şansını minimuma endirdi. Bölgə təmsilçisini növbəti turda “Neftçi” ilə çətin oyun gözləyir. “Qırmızı-qaralar” qələbə qazanmağa məhkumdu, əks halda sona 4 tur qalmış “ağ bayraq qaldırmış” olacaq. İstənilən halda, “Qəbələ”nin növbəti xal itkisi “Qarabağ”ı çempionluğa qovuşduracaq.
Son bir həftədə 3 dəfə qarşılaşmaq məcburiyyətində olan “Sumqayıt”la “Keşlə”nin çempionat oyunu yarımfinalın cavab görüşünün məşqi sayılırdı. İlk dueldə 0:1 uduzan “gənclik şəhəri” təmsilçisi göstərməliydi ki, cavab görüşündə istədiyi nəticəni qazana bilər. Düzdü, Samir Abasovun komandası “Keşlə”ni məğlub etməyi bacardı. Ancaq 2:1-lik qələbə iki gün sonra kubokda da təkrarlansa, finala bakılılar çıxacaq.
Tura Zirədə yekun vuruldu ki, “Neftçi” qəsəbə təmsilçisi ilə premyer-liqa kabusunu darmadağınla bitirdi. Bu, 12-ci dueldə mümkün oldu. Öz meydanındakı bütün görüşlərdə qalib gələn və qol buraxmayan “Zirə” bu dəfə 3 cavabsız qolla yenildi. Əla sürət yığan “Neftçi”ni artıq 4-cü yerdən 1 xal ayırır. Kubokda da finala daha yaxın olan Tərlan Əhmədovun yetirmələri premyer-liqada 7, ümumilikdə isə 8-ci oyundu məğlubiyyətin nə olduğunu bilmir. “Neftçi” kimi komandanın üzvü İqnasio Errera da yüksəlişdədi. Çilili yarımmüdafiəçi darmadağında iştirak etməklə qol sayını 8-ə çatdırdı. Artıq onu susqunluğu ilə diqqəti çəkən Dabodan 4 qol ayırır.
Topaz premyer-liqası
4-cü dövrə, 23-cü tur
14 aprel
Kəpəz – Qarabağ 0:1
15 aprel
Qəbələ - Səbail 1:1
Sumqayıt – Keşlə 2:1
Zirə - Neftçi 0:3
1. Qarabağ 23 17 5 1 33-8 56
2. Qəbələ 23 12 6 5 37-23 42
3. Sumqayıt 23 11 6 6 31-25 39
4. Zirə 23 9 8 6 29-24 35
5. Neftçi 23 10 4 9 31-24 34
6. Səbail 23 5 4 14 15-32 19
7. Keşlə 23 4 6 13 20-36 18
8. Kəpəz 23 3 3 17 14-38 12
Bombardirlər: Baqali Dabo (Qəbələ) – 12, İqnasio Errera (Neftçi), Mahir Mədətov (Qarabağ), Amil Yunanov (Sumqayıt) - 8.
Növbəti turun oyunları: 21 aprel - Keşlə - Zirə, Sumqayıt - Qarabağ; 22 aprel - Neftçi - Qəbələ, Səbail - Kəpəz.