Konfrans Liqası
3-cü təsnifat mərhələsi, ilk oyun
Osiyek (Xorvatiya) – Zirə 1:1 (1:0)
1. Nikola Çavlina
36. Nail Omeroviç
26. Luka Yeleniç
5. Styopa Mkrtçyan
(3. Andre Duarte, 63)
22. Roko Yurişiç
66. Petar Puşic
(98. Şimun Mikolçiç, 80)
6. Darko Neyaşmiç
7. Vedran Yuqoviç (k)
(14. Marko Soldo, 66)
39. Domaqoy Bukviç
9. Kemal Ademi
(10. Pedro Lima, 80)
34. Anton Matkoviç
Ehtiyat oyunçular
15. Tin Sayko
31. Marko Malenika
4. Kreşimir Vrbanats
11. Risuenio Keval
18. Niko Farkaş
45. İvan Barik
49. İvano Kolarik
55. İvan Sviyanoviç
Baş məşqçi: Federiko Koppitelli

97. Tyaqo Silva
32. Qismət Alıyev (k)
4. Ruan Renato
3. Anje Mutsinzi
70. İssa Cibrila
(7. Məqsəd İsayev, 86)
18. Martins Junior
(16. Fuad Bayramov, 86)
8. İsmayıl İbrahimli
21. Hacıağa Hacıyev
(15. Pyer Zebli, 46)
29. Ceyhun Nuriyev
(6. Eldar Quliyev, 55)
11. Rüstəm Əhmədzadə
(23. Rafael Utziq, 55)
90. Davit Volkov
Ehtiyat oyunçular
13. Aydın Bayramov
41. Anar Nəzirov
5. Stefan Aka
14. Elçin Əlicanov
Baş məşqçi: Rəşad Sadıqov

Qollar: A.Matkoviç, 38 (1:0, D.Bukviç). R.Utziq, 90+4–p. (1:1).
Vərəqələr: H.Hacıyev, 2. C.Nuriyev, 34. P.Pusic, 37. İ.İbrahimli, 57. K.Ademi, 74. N.Çavlina, 85. S.Mikolçiç, 90+5 – sarı.
Hakimlər: ARİSTOTELİS DİAMANTOPULOS, Konstantinas Psarris, Konstantinas Triantafyolli, Konstantinas Perrakis (hamısı Yunanıstan).
VAR hakimi: Stefanos Koymparakis (Yunanıstan).
VAR hakiminin köməkçisi: Spridon Zampalas (Yunanıstan).
Hakim-inspektor: Kostadin Gerginov (Bolqarıstan).
UEFA nümayəndəsi: Sercu Lisnik (Şimali Makedoniya).
8 avqust. Osiyek. “Opus Arena” stadionu. 6432 tamaşaçı.
Birinci hissəyə 1, ikinci hissəyə 4 dəqiqə əlavə olunub.

7 (1) qapıya (“çərçivə”yə) zərbə 9 (2)
1 künc zərbəsi 3
0 ofsayd 3
16 qayda pozuntusu 14
4 (0) sarı (qırmızı) vərəqə 3 (0)
49 topa sahibolma (fazilə) 51

“DAK 1904”ü həm evdə, həm də səfərdə məğlub etməklə Konfrans Liqasının 3-cü təsnifat mərhələsinə yüksələn “Zirə”ni bu dəfə “Osiyek”lə qarşılaşdı. Büdcə, avrokubok təcrübəsi, həmçinin iştirak etdiyi çempionatın səviyyəsinə görə “Osiyek” daha üstün idi. Bu oyunda hər şey meydan sahiblərinin qələbəsinə aparırdı. Ancaq Utziq uzatma dəqiqələrində bir usta hərəkətlə penalti qazandı və komandasını ümidləndirdi.

Hakimin start fitindən sonra meydanda gözlənilən oyunu gördük. Artıq 2-ci dəqiqədə rəqibə qarşı aşkar kobudluğa görə “sarı” alan Hacıağa həm də avrokuboklardakı təcrübəsizliyini göstərdi. Doğrudu, yunan hakiminin istisnasız bütün epizodlara sərt yanaşması da diqqətdən yayınmadı. 3-cü dəqiqədə cərimə zərbəsi zamanı ev tapşırığını yerinə yetirən “ağ-mavilər” qapımız önündə ilk təhlükəli vəziyyəti yaratdı. Bunun cavabında 10 və 12-ci dəqiqələrdə “qartallar”ın əks-hücumu təhlükəli alındı. Birinci hücum zamanı Martinsin zərbəsi bloklansa da, ikincidə Cibrilanın qüvvətli vuruşu qapının üstündən keçdi. “Zirə”nin ən real qol imkanı 17-ci dəqiqədə yarandı. Oyunun fəallarından olan Martinsin dabanla verdiyi ara ötürməsini komandanın ən sürətli futbolçularından sayılan Cibrila qapı önünə göndərdi. “Zirə”nin gürcüstanlı forvardı Volkov topa toxunsa da, “çərçivə”yə yönəldə bilmədi.

25-ci dəqiqədə isə Neyaşmiçin başla zərbəsi dirəyə tuş gəldi. Ancaq bir qədər sonra meydan sahibləri hesabı açmağı bacardılar. Ceyhunun kobud səhvi üzündən topu ələ keçirən Bukviç əks-hücuma çıxaraq, nəzarətsiz qalan komanda yoldaşı Matkoviçi gördü. 18 yaşlı futbolçu bu səhvi Sadıqovun yetirmələrinə bağışlamadı – 1:0. “Qartallar”ın hissə ərzində daha bir neçə əks-hücum şansı olsa da, futbolçuların anlaşmazlığı, ya da Rüstəmin “ləngliyi” buna mane oldu. Ceyhuna gəlincə, səhvini düzəltməyə çalışsa da, bunu bacarmırdı.

İlk yarı ilə müqayisədə ikinci daha sönük keçirdi. Çünki “ağ-mavilər” hesabda öndə olmağın avantajından yararlanır, “Zirə” məğlubiyyətdən qurtulmaq üçün var qüvvəylə irəli can atmırdı. Amma Sadıqovun 2-ci hissədə etdiyi əvəzetmələr oyuna nəzarətin komandanın əlinə keçməsinə səbəb oldu. 73-cü dəqiqədə akrobatik zərbəylə yadda qalan Utziq “çərçivə”ni nişan ala bilmədi. Bir qədər sonra İsmayılın müdafiənin arxasına göndərdiyi ötürmədən sonra qapıçıyla təkbətək çıxan Cibrilanın zərbəsinin qarşısını Ömeroviç aldı. Epizodun davamında künc zərbəsindən sonra Renatonun başla vuruşu qapıdan yan keçdi. Oyuna nəzarəti ələ almağı bacaran “qartallar” sona doğru rəqib üzərindəki təzyiqi daha da artırmışdı. Matça artırılan sonuncu dəqiqədə Utziq Duartenin ayaqları arasından topu atıb qapıya yaxınlaşmaq istəyərkən kobudluqla üzləşdi. Xorvatların etirazına rəğmən, yunan referi penalti qərarını dəyişmədi. Utziq penaltini düzgün yerinə yetirməklə doğum günündə həm özünü, həm də komandasını sevindirdi – 1:1.

Beləliklə, “Zirə” evə sərfəli hesabla döndü. Sadıqovun komandası bu mərhələni keçməyə qadirdi.

KAMAL SƏFƏR