Ruslan Abışov Qəbələdə meydana çıxmayacaq
Bu həftə Azərbaycan kubokunda finalçılar müəyyənləşəcək. Belə ki, aprelin 12-də yarımfinal mərhələsinə start veriləcək. Əslində mərhələnin ilk oyunları sabah baş tutmalıydı. Ancaq növbədənkənar prezident seçkisinə görə PFL də təqvimdə dəyişiklik etməli oldu.
Əvvəlcə "Keşlə" ilə "Sumqayıt" üz-üzə gələcək. Bununla da kubokda yeni duelin əsası qoyulacaq. Belə ki, Azərbaycan çempionatlarında dəfələrlə münasibətləri aydınlaşdıran komandalar indiyədək “ikinci cəbhə”də qarşılaşmayıblar. Samir Abasovun yetirmələri bu mövsüm “Keşlə” ilə 3 oyunun ikisində qələbəni bayram edib. İlk dövrədə 1:1-lik heç-heçə qeydə alınıb. Son iki dueli isə “gənclik şəhəri” təmsilçisi qazanıb – 3:1, 2:1. Baxmayaraq ki, ümumi balans bakılıların xeyrinədi - 23:+12=7-4, 35-20.
Hər iki komanda son turda səfər heç-heçəsinə nail olub. “Keşlə” Gəncədən, “Sumqayıt” “Bakcell Arena”dan 1 xalla dönüb. Bu mənada Samir Abasovun yetirmələrinin daha çox güc itirdiyini qeyd etməliyik. Bununla belə, çempionatda 10 oyunluq məğlubiyyətsiz seriya komandada özünəinamı gücləndirib. “Sumqayıt”ın əleyhinə işləyə biləcək əsas çətinlik heyətdəki itki ilə bağlıdı. Belə ki, müdafiənin dayağı sayılan Bəxtiyar Həsənalızadə cəzalı olduğuna görə ilk görüşdə iştirak etməyəcək.
“Keşlə” ilə cütün favoriti “Sumqayıt”dısa, "Qəbələ" – "Neftçi" dueli haqda proqnoz vermək çox çətindi. Tərlan Əhmədovun komandası 6 oyundu yenilgi acısının nə olduğunu bilmir. Bu müddətdə “ağ-qaralar”ın rəqiblərindən biri məhz “Qəbələ” olub və paytaxt təmsilçisi 18-ci turda səfər qələbəsinə sevinib. Elə kubokda da “Neftçi”nin bölgə təmsilçisi üzərində üstünlüyü var - 3:+0=3-0. İndiyədək 2 dəfə yolları kəsişən komandalar öz aralarında üç oyun keçiriblər. Düzdü, hər üç qarşılaşma eyni hesablı heç-heçə ilə nəticələnib. Bu üzdən duellərin ikisindən sonra penaltilərə müraciət olunub. “Neftçi” 4 il öncə finalda, 2 il əvvəl isə yarımfinalda qalib gəlib.
2013/14 final Qəbələ - Neftçi (Bakı) 1:1, p. - 2:3
2015/16 yarımfinal Neftçi (Bakı) - Qəbələ 1:1, 1:1, p. - 4:3
“Neftçi” səfər matçına ciddi itki ilə çıxacaq. Belə ki, komanda Qəbələyə kapitansız yollanıb. Daha doğrusu, Ruslan Abışov matçı kənardan izləməli olacaq. O, cəza səbəbindən komandasına kömək etməyəcək.
Mərhələnin ilk oyunlarını televiziyadan da canlı izləmək mümkündü. Belə ki, cümə axşamı keçiriləcək görüşləri “CBC Sport” canlı yayınlayacaq.
Ölkə kuboku
yarımfinal, ilk oyunlar
12 aprel
Keşlə – Sumqayıt
Cəzalı: Bəxtiyar Həsənalızadə (Sumqayıt).
Bakı. İnter Arena. Saat 16.00
Qəbələ – Neftçi
Cəzalı: Ruslan Abışov (Neftçi).
Qəbələ. Şəhər stadionu. Saat 18.00