Aprelin 17-dən İtaliyanın Rozeto-deli-Abrutsi şəhərində start götürəcək gənc boksçular arasında Avropa birinciliyində iştirak edəcək millimizin heyəti açıqlanıb. Vaqif Şirinovun baş məşqçisi olduğu komanda 9 gün davam edəcək yarışda 11 idmançı ilə təmsil olunacaq. Qitə birinciliyində Maqsud Xasmətov (49 kq), Həsən İbrahimov (52 kq), Nəbi İsgəndərov (56 kq), Nurlan Səfərov (60 kq), Səbuhi Abışov (64 kq), Nicat Həsənov (69 kq), Məhəmməd Yusifov (75 kq), Zaur Musayev (81 kq), İsmayıl Yaqubov (91 kq) və Vüqar Səmədov (+91 kq) mübarizə aparacaq. Qızların yarışında isə yalnız Ruhanə Məmmədova (60 kq) iştirak edəcək.
Yığma artıq Apennin yarımadasına yollanıb. Rozeto-deli-Abrutsidə baş tutacaq ikihəftəlik təlim-məşq toplanışı boksçuların çempionata yüksək səviyyədə hazırlaşması məqsədi daşıyır. Qeyd edək ki, bu turnir oktyabrda Argentinanın paytaxtı Buenos Ayresdə keçiriləcək yeniyetmə və gənclərin Yay Olimpiya Oyunlarına lisenziya xarakteri daşıyacaq. Oğlanların yarışında 49 kq istisna olmaqla, bütün kateqoriyalarda 2000-2001 təvəllüdlü idmançılar arasında ən yaxşı nəticə göstərən əlcək ustası Olimpiadaya vəsiqə əldə edəcək. Qızların yarışında isə 4 çəkidə (51 kq, 57 kq, 60 kq, 75 kq) titul sahibləri okeanın o tayına yollanacaq.