Bu gün Mərakeşin paytaxtı Rabatda karate üzrə “1 Premyer Liqa” turnirinə start veriləcək. 75 ölkədən 545 karateçinin qatılacağı yarışda ölkəmizi 18 idmançı təmsil edəcək. Kumitedə Firdovsi Fərzəliyev (60 kq), Tural Ağalarzadə, Rafiz Həsənov (hər ikisi 67 kq), Rafael Ağayev (75 kq), Turqut Həsənov, Pənah Abdulayev (hər ikisi 84 kq), Asiman Qurbanlı, Şahin Atamov, Əli Cəfərov (hamısı +84 kq), Nuranə Əliyeva, Fidan Teymurova (hər ikisi 50 kq), İlahə Qasımova (55 kq), Fəridə Abiyeva (61 kq) və İrina Zaretska (68 kq) mübarizə aparacaq. Katada Roman Heydərov fərdi, Rövşən Əliyev, Tural Balcanlı və İsmayıl Quliyevdən ibarət heyət isə komanda yarışında qüvvəsini sınayacaq. Turnir 3 gün davam edəcək.