Dünən AFFA-nın İntizam Komitəsinin növbəti iclası baş tutub. Komitə Topaz premyer-liqasında və əvəzedicilərin yarışında, eləcə də birinci divizionda 21-ci turda baş verən qayda pozuntularını müzakirə edib, hüquqi qiymət verib.
Premyer-liqada “Qarabağ” – “Keşlə” matçının 60-cı dəqiqəsində meydandan qovulan Coşqun Diniyevlə Sezar Meza Kollinin aqibəti eyni olub. Aqressiv davranışa görə birbaşa qırmızı vərəqə alaraq meydandan kənarlaşdırılan futbolçular 3 oyunluq cəzalanıb, klubları 2400 manat (cəmi 4800) cərimə olunub. Ancaq futbolçulara verilmiş 3 oyun cəzanın 1-i şərti kimi tətbiq edilib və 6 ay sınaq müddəti verilib. Yəni sınaq müddəti ərzində yenidən cəzalanacaqları təqdirdə, sanksiyanın növbəti hissəsi qüvvəyə minəcək.
Əvəzedicilərin çempionatında son turda bir-biri ilə qarşılaşan “Qəbələ” və “Sumqayıt” “qarmağa ilişiblər”. “Sumqayıt”da sarı vərəqə alan futbolçuların sayı 4-ə çatıb ki, bu da 400 manat cərimə deməkdi. “Qəbələ”ni isə baş məşqçi Emin İmaməliyev ziyana salıb. Texniki zona qaydalarını pozan mütəxəssis bu gün “Kəpəz”lə təxirə salınmış oyunu tribunadan izləməli olacaq. Klubu onun davranışını 400 manatla “sığortalayacaq”.
Diviziona gəlincə, “Sabah”la matçın 45-ci dəqiqəsində kobud oyuna görə birbaşa qırmızı vərəqə alaraq meydandan kənarlaşdırılan “Zaqatala”lı Roini İsmayılov 2 oyun cəza çəkəcək, klubu 160 manat cərimə ödəyəcək. “Zaqatala”nın digər oyunçusu Nəsib Əliyev isə texniki zona qaydalarını pozub. O, 1 oyun və 20 manat cərimə ilə canını qurtara biləcək.
Beləliklə, İK-nın son iclasında klublara 5780 manat cərimə kəsilib. Nəticədə mövsümün əvvəlindən cərimə sanksiyaları üzrə nəzərdə tutulan məbləğ 93840 manata çatıb.