“Düşünürəm ki, onun şərhçiliyi barədə uzun müddət danışılacaq”
Bütün futbolsevərlər üçün bayram sayılan Avropa çempionatı ölkəmizdə də böyük həvəslə izlənilir. Əlbəttə, milli komandamızın belə nüfuzlu turnirdə iştirak edə bilməməsi müəyyən xəyal qırıqlığı yaradır. Ancaq Avropanın nəhənglərinin yarışı olduqca maraqlı keçir. Xüsusən də sürpriz komandalar, gözlənilməz nəticələr mübarizəyə rəng qatır.
Bilindiyi kimi, Azərbaycanda AÇ-2024-ün oyunlarının rəsmi yayın hüququna malik telekanal İctimai Televiziyadı (İTV). Bütün görüşləri İTV və kanalın “yutub” hesabında izləmək mümkündü. Televiziya keyfiyyətinin önəmli olduğu qədər qarşılaşmaya zövq verən nüanslardan biri də şərhçilikdi. Çünki oyunun nə qədər həyəcanlı və ya darıxdırıcı keçməsi müəyyən mənada komandaların mübarizəsindən asılı olsa da, şərhçilərin də üzərinə böyük yük düşür. Artıq iki həftədən AÇ həyəcanı davam edir. Bəs İTV-nin şərhçiləri indiyə qədər işinin öhdəsindən lazımi şəkildə gələ biliblərmi? Həmçinin hansısa şərhçinin adını çəkmək mümkündümü ki, onun şərh etdiyi bütün oyunlar xüsusi zövqlə izlənilir? Bu suallar ətrafında futbol camiəsindən olan, amma fərqli istiqamətlərdə çalışan şəxslərin fikirlərini öyrənməyi lazım bildik.
Asif Bağırov (şərhçi):
“Əvvəla başqa kanallardan baxmaq imkanımız yoxdu. Çünki Rusiya kanallarının yayını oyunlar vaxtı İTV-yə qoşulur. Bu il bir daha əmin oldum. Elə yaxşı ki, kəsilir. Fərqi hiss edirik. Türkiyə variantı da var. Amma türkiyəlilərin şərhi ürəyimə yatmadığı üçün heç vaxt dəyərləndirmirəm. Desəm ki, şərhçilərimiz işlərinin öhdəsindən gəlirlər, heç nə deməmiş olaram. Bunu artıqlamasıyla bacarırlar. Tural Dadaşov isə bu yarışlara möhürün vurdu. Düşünürəm ki, onun şərhçiliyi barədə uzun müddət danışılacaq”.
Aslan Kərimov (təcrübəli mütəxəssis):
“Konkret kiminsə adını çəkmək istəmirəm. Ümumi qiymətləndirmə aparanda və 5-10 il əvvəlki şərhçilərlə müqayisə edəndə indi həqiqətən də canlanma var. Artıq şərhçilər oyuna xüsusi hiss-həyəcan qata bilirlər. Onlar qarşılaşmanı şərh edərkən futboldakı həyəcanı azarkeşlərə ötürmək baxımından bəlli bir səviyyəyə gəlib çatdığımızı düşünürəm. Amma şərhlər qüsursuz deyil. Təbii ki, müəyyən nöqsanlar da var. Bəzən görürsən ki, məsələn, oyunun texniki və üslub tərəfindən çox danışdıqda yanlış məlumatlar verirlər. Hesab edirəm ki, bir şərhçi məsələnin texniki tərəfinə girməməlidi. Mümkün olarsa, bir futbol bilicisiylə bunu şərh edə bilərlər. Fəqət bayaq da qeyd etdiyim kimi, indiki şərhçilik səviyyəsini qənaətbəxş hesab edirəm. Çünki həqiqətən də matçın içindəki həyəcanı səs tembri, cümlələriylə bizə yaşatmağı bacarırlar. Hər şeyin qüsursuz olduğunu da söyləyə bilmərəm. Bəzən hansısa bir informasiyada, sistemdə və ya hansısa bir məşqçinin planı ilə bağlı nöqsanlara yol verdiklərini görürəm. Bu da məlum məsələdi: şərhçilərin mövzunun texniki tərəfini bilməmələri mümkündü”.
KAMAL SƏFƏR
Digər xəbərlər
