“Bunun üçün nəsə etmək lazımdı”
Almaniyanın paytaxtı Berlində keçirilən dünya şahmat tacına İddiaçıların Turnirində mübarizə yarılanıb. Dünən ilk dövrəyə yekun vurulub. Ancaq dünənki oyunlara keçməzdən öncə Şəhriyar Məmmədyarovun (2809) 6-cı turda Vladimir Kramnik (Rusiya, 2800) üzərindəki qələbəsinə qayıdaq. Görüşdən sonra keçirilən mətbuat konfransında rusiyalı şahmatçı topları qoşalaşdırarkən sanki hallüsünasiya gördüyünü söyləyib. Kramnikin 28-ci gedişdə heç-heçədən imtina etməsi də diqqəti çəkməyə bilməz. Məmmədyarovun fikirləri isə belə olub: “Rəqib gedişləri 3 dəfə təkrarlamaqdan imtina etdikdən sonra vəziyyət bir qədər “qaralar”ın xeyrinə idi. 24-cü gedişdən sonra Kramnik qələbəyə oynaya bilərdi. Ancaq mən təhlükəni hiss etmədim. Karuana ilə oyunda da belə olmuşdu. İndi fikirləşirəm ki, bu cür vəziyyətdə belə oynamaq olmaz. Əmin idim ki, Vladimir heç-heçədən imtina edəcək. Daha sonra o həddən artıq aqressiv oynadı. Mənə e4-e5 gedişini etməyə imkan verdi. Bəlkə də mən yanılıram. Ancaq mənə elə gəlir ki, qələbə üçün şansım var idi. Kramnik isə əksini düşünürdü. Hələ ki ilk dövrənin sonuna çatmışıq. Ümid edirəm ki, ikinci dövrədə vəziyyəti düzgün qiymətləndirə biləcəm. Hər zaman vəziyyətimin yaxşı olduğunu düşünürəm. Ancaq sonra heç də belə olmadığını görürəm. Bunun üçün nəsə etmək lazımdı”.
Nüfuzlu “Sport-Ekspress” qəzeti həmin qarşılaşmanı belə şərh edib: “Kramnikin bundan əvvəlki iki partiyasında olduğu kimi, sakit debütlə start verdiyini gördük. Vəzirləri dəyişdikdən sonra şah xəttinə maksimum təzyiq göstərdi. İlk 30 gedişdən sonra görüş heç-heçəyə doğru gedirdi. Məmmədyarov da bu nəticəyə razı idi. Ancaq Kramnik fərqli qərar qəbul etdi. Əvvəlcə nədənsə o bir piyadaya hücum etmək qərarına gəldi. 34-cü gedişdə isə səhvə yol verdi. Atları dəyişdikdən sonra vəziyyət ağırlaşdı. Bundan sonra rəqib nəzərəçarpan üstünlük əldə etdi. Azərbaycanlı qrossmeyster piyadasını vəzirə çevirdikdən bir neçə gediş sonra Kramnik təslim oldu”.
İndi isə keçək 7-ci turun oyunlarına. Dünən Məmmədyarov qara fiqurlarla Aleksandr Qrişuka (Rusiya, 2767) qarşı oynayıb. Buna qədər tərəflər klassik şahmatda 15 dəfə münasibətləri aydınlaşdırmışdı. Bunların 4-də Aleksandr, 3-də Şəhriyar qələbə qazanmışdısa, 8 görüş heç-heçə yekunlaşmışdı. Bu dəfə də populyar hesab qeydə alınıb. Tərəflər özünü çox yormayıb. Artıq 16-cı gedişdə “sülh” qeydə alınıb. Bu günün ən erkən bitən qarşılaşması olub. Düzdü, vaxta görə Məmmədyarovun təxminən 1 saatlıq üstünlüyü var idi. Rəqib seytnota düşə və bu zaman səhv gedişlər edə bilərdi. Ancaq Şəhriyar riskdən qaçıb. Vəziyyətin heç-heçəlik olduğunu düşünərək gücünü qorumağa üstünlük verib. Görünür, yığmamızın lideri gücünün böyük hissəsini ikinci dövrə üçün saxlayıb. Nəzərə alaq ki, sumqayıtlı qrossmeyster qalan 7 partiyanın 4-də “ağlar”la oynayacaq.
Ancaq bu heç-heçə daha çox Fabiano Karuananın (ABŞ, 2784) işinə yarayıb. İtalyan əsilli şahmatçı “qaralar”la oynamasına baxmayaraq, Levon Aronyanı (Ermənistan, 2794) məğlub edərək, praktiki olaraq rəqibinin titul şansını heçə endirib. Bununla da Karuana ilk dövrəni vahid lider kimi bitirib. “Ağlar”la oynayan Sergey Karyakin (Rusiya, 2763) 35-ci gedişdə kobud səhvə yol verən Uesli Sonu (ABŞ, 2799) bağışlamayıb. Yarışın “sülh carçısı” Dinq Liren (Çin, 2769) yenə ənənəsinə sadiq qalıb. 6 saatdan artıq Kramniklə gedən savaşın sonu “atəşkəs” olub.
Xal durumu: Karuana - 5, MƏMMƏDYAROV – 4,5, Liren, Qrişuk, Kramnik – 3,5, Karyakin – 3, So, Aronyan – 2,5.
Bu gün 8-ci turun görüşləri keçiriləcək: Qrişuk – Kramnik, MƏMMƏDYAROV – Karyakin, Liren – Aronyan, So – Karuana.
SƏRXAN