Almaniyanın paytaxtı Berlində şahmat tacına İddiaçıların Turniri davam edir. Dünən 6-cı tur arxada qalıb. Şəhriyar Məmmədyarov (2809) ağ fiqurlarla favoritlərdən sayılan Vladimir Kramniklə (Rusiya, 2800) münasibətləri aydınlaşdırıb. Sabiq dünya çempionu 34-cü gedişdə C xanasında topları qoşalaşdırmaqla kobud səhvə yol verib. Bundan yararlanan həmyerlimiz təşəbbüsü tam ələ keçirib. 48-ci gedişdə yığmamızın lideri səhvə yol versə də, oyuna nəzarəti əldən verməyib. G xanasındakı piyadanın üstünlüyü yekun nəticəyə təsirsiz ötüşməyib. 56-cı gedişdə Kramnikin növbəti qeyri-dəqiq gedişi sumqayıtlı qrossmeysterin əl-qolunu tam açıb. Böyük fiqur üstünlüyü qazanan Məmmədyarov 64-cü gedişdə qələbəni bayram edib.
Digər oyunlara gəlincə, Dinq Liren (Çin, 2769) bu dəfə Sergey Karyakinlə (Rusiya, 2763) heç-heçə edib. 6-cı oyununu da “sülh”lə başa vuran çinli zəka sahibi bu baxımdan əlçatmazdı. Fabiano Karuana (ABŞ, 2784) – Aleksandr Qrişuk (Rusiya, 2767) görüşündə də qalib müəyyənləşməyib. Levon Aronyan (Ermənistan, 2794) isə gözlənilmədən yarışa bərbad başlayan Uesli So (ABŞ, 2799) qarşısında aciz qalıb. Bu, Sonun turnirdə ilk qələbəsi olub.
Xal durumu: Karuana, MƏMMƏDYAROV – 4, Liren, Qrişuk, Kramnik – 3, So, Aronyan – 2,5, Karyakin – 2.
Bu gün yarışda növbəti istirahət günü olacaq. 7-ci turun oyunları sabah baş tutacaq: Qrişuk – MƏMMƏDYAROV, Kramnik – Liren, Karyakin - So, Aronyan – Karuana.
Bu arada Şəhriyar Lirenlə oyundan sonra keçirilən mətbuat konfransında da maraqlı açıqlamalarla diqqəti cəlb edib. Bu dəfə Məmmədyarov daha çox futboldan danışıb: “Barselona” məndən güclüdü. Onlar çox yaxşı oynadı. Fikrimcə, “Çelsi” üzərində layiqli qələbə qazandılar. Hazırlıqla yanaşı, futbola necə vaxt ayırıram? Çox sadə. Çalışıram ki, Çempionlar Liqasının oyunlarını buraxmayım. “Barselona” və “Mançester Yunayted”i sevirəm. Futbol mənim hobbimdi. Bu yarışa gəlincə, Karyakin və Karuana ilə görüşlərim çox maraqlı keçdi. Ancaq So ilə qarşılaşmanın darıxdırıcı olduğunu qəbul edirəm. Belə partiyaları sevmirəm. Bu gün səliqəli oynamağa çalışırdım. Fikrimcə, heç-heçə “qaralar” üçün pis nəticə deyil. Xüsusən də Dinq kimi rəqibə qarşı oynayırsansa”.
Yeri gəlmişkən, rusiyalı qrossmeyster Daniil Yuffa “İzvestiya” qəzetinə verdiyi açıqlamada həmyerlimizin çıxışını belə şərh edib: “Şəhriyar hələ ki “ağlar”la səliqəli oynayır. Sevimli mövqeyi üçün G2-dəki filindən yetərincə istifadə etmir. Güman etmək olar ki, o, ən yaxşı taktikalarını ikinci dövrəyə saxlayıb. İlk dövrədə ortaya qoyduğu Nimtsoviç müdafiəsi aldadıcı manevrdi. İkinci dövrədə tam fərqli oyun anlayışına keçəcəyini düşünürəm. Mən bunun ingilis, Retya debütləri və ya Katalanın bir neçə variantı olacağını istisna etmirəm”.

Maraqlıdı...
Şəhriyarın Kramnik üzərində qələbəsinə ən çox sevinənlərdən biri yığmadakı komanda yoldaşı Rauf Məmmədovdu. Bu gün Batumidə start götürəcək fərdi Avropa çempionatında mübarizəyə başlayacaq həmyerlimiz sosial şəbəkədə bunları yazıb: “Şahın qələbəsindən sonra AÇ-yə yaxşı əhval-ruhiyyədə başlamaq olar”.
SƏRXAN