Almaniyanın paytaxtı Berlində dünya şahmat tacına İddiaçıların Turniri start götürüb. Martın 10-da ilk turun oyunları keçirilib. Şəhriyar Məmmədyarov (2809) qara fiqurlarla bu yarışın son qalibi Sergey Karyakinlə (Rusiya, 2763) qarşılaşıb. Bu görüş ən gec bitən partiya olub. 6 saatdan artıq davam edən qarşılaşmanın 71-ci gedişində Məmmədyarov qələbəni qeyd edib. Vladimir Kramnik (Rusiya, 2800) Aleksandr Qrişuku (Rusiya, 2767), Fabiano Karuana (ABŞ, 2784) isə Uesli Sonu (ABŞ, 2799) üstələyib. Levon Aronyan (Ermənistan, 2794) – Dinq Liren (Çin, 2769) oyunu heç-heçə başa çatıb.
Şəhriyar qələbədən sonra bunları deyib: “Zalda səs var idi? Əlbəttə. Ancaq mənə daha çox xoş olmayan seytnotda Yudit Polqarın monitorda partiyanın heç-heçə başa çatacağını söyləməsi idi. Mən şok yaşadım. Mənə hakimə bunun normal olmadığını söyləməkdən başqa yol qalmadı. 1-2 dəqiqə sonra bu nöqsan aradan qaldırıldı. Belə şeylərə icazə verilməməlidi. Otel lazımı səviyyədə deyil və zalda da çoxlu səs var. Bilirdim ki, Sergeyin yaxşı debütü var. G6 xətti mənim üçün yaxşı başlanğıc deyildi. Oyunun gedişində partiyanın təhlilini də unutdum. Sonra sürpriz gedişlər haqda fikirləşməli oldum”.
Dünən isə 2-ci turun görüşləri baş tutub. Məmmədyarov – Aronyan görüşü erkən yekunlaşıb. Tərəflər 24-cü gedişdə “sülh”ə razılaşıb. Liren – Karuana və Kramnik – Karyakin qarşılaşmalarında da qalib müəyyənləşməyib. Qrişuk isə Sonu məyus edib.
Xal durumu: Kramnik, MƏMMƏDYAROV, Karuana – 1,5, Aronyan, Liren, Qrişuk – 1, Karyakin – 0,5, So – 0.
Bu gün 3-cü turun oyunları reallaşacaq: Karyakin – Qrişuk, Aronyan – Kramnik, Karuana – MƏMMƏDYAROV, So – Dinq.
SƏRXAN