Dünən AFFA İcraiyyə Komitəsinin növbəti iclası keçirildi. Gündəlikdəki məsələlərin müzakirəsindən əvvəl AFFA-nın prezidenti Rövnəq Abdullayev futbol veteranı, uzun illər SSRİ çempionatının güclülər dəstəsində, həmçinin beynəlxalq oyunlarda hakimlik etmiş Rüstəm Rəhimovu 70 illik yubileyi münasibətilə təbrik edib, ona üzərində “R.Rəhimov 70” yazılmış rəmzi hakim forması təqdim olunub. Rəhimov göstərilən diqqətə görə minnətdarlığını bildirib, müəllifi olduğu “Bu mənim alın yazımdı” avtobioqrafik kitabını AFFA prezidentinə bağışlayıb.
İcraiyyə Komitəsi gündəlikdəki məsələlərin müzakirəsindən sonra aşağıdakı qərarları qəbul edib:
1. Zeynal Zeynalov çimərlik futbolu millisinin baş məşqçisi təyin olunsun.
2. Adları aşağıda göstərilən futbol veteranlarına AFFA-nın təqaüdü verilsin.
Xüsusi təqaüd
Müzəffər Qasımov
Gündüz Cəfərov
Təqaüd
Vaqif Davudov
Nadir Qasımov
İsmayıl Hüseynov
Ağarza Rzayev
3. Zaur Hacı-Məhərrəmov AFFA-nın Klubların Lisenziyalaşdırılması üzrə komissiyasının üzvü təyin olunsun.
4. AFFA yanında Media Komitəsinin yeni formatda fəaliyyəti ilə bağlı müzakirələrin aparılması katibliyə həvalə olunsun və İcraiyyə Komitəsinin növbəti iclasına təkliflər təqdim olunsun.
İclasda futbol oyunlarının nəticəsinin manipulyasiyası məsələləri və nəticəsi şübhə doğuran oyunlarla bağlı geniş müzakirə aparılıb.
Azərbaycan Futzal Federasiyasının prezidenti, İcraiyyə Komitəsinin üzvü Zaur Axundov federasiyanın fəaliyyəti ilə bağlı məruzə edib.