Naycel yeni rekord müəyyənləşdirdi, məşqçi jurnalistlərdən narazı qaldı
Basketbol üzrə Avroliqanın 32-ci turu çox maraqlı məqamla yadda qalıb.
“Football-plus.az” xəbər verir ki, belə ki, “Fənərbaxça”nın amerikalı forvardı Naycel Heys-Devis “Alba” üzərindəki qələbəyə (103:68) 50 xalla töhfə verib. Bu, Avroliqanın yeni rekordudu. Əvvəlki rekord da Türkiyə klubunun oyunçusuna məxsus idi. “Efes”in müdafiəçisi Şeyn Larkin 2019/20 mövsümündə komandasının “Bavariya”ya 104:75 qalib gəldiyi oyunda 49 xal toplamışdı.
32 oyunun 20-də qələbə qazanan “Fənərbaxça” hazırda Avroliqanın turnir cədvəlinin 5-ci pilləsində qərarlaşıb və pley-offa adlamağa yaxındı. Yeri gəlmişkən, məhz Heys-Devis 32-ci turun ən dəyərli oyunçusu sayılıb. “Fənərbaxça” – “Alba” oyunundan sonra keçirilən mətbuat konfransında çox maraqlı hadisə yaşanıb. “Sarı-lacivərdlilər”in litvalı baş məşqçisi Şarunas Yasikyaviçyus türkiyəli həmkarımızın ünvanına ittiham yağdırıb. Onu qəzəbləndirən əsas məqam 50 xal toplamaqla Avroliqanın yeni rekordunu müəyyənləşdirən Naycellə bağlı heç bir sual verilməməsi olub:
“Avroliqadakı 50 xallıq oyundan sonra mənə veriləsi sual yoxdu. Kədərli andı. Türkiyə basketbol jurnalistikası üçün çox kədərlidi. Düzünü desəm, çox qəzəbliyəm. Ötən həftə “Barselona”ya qalib gəldik. Bu, süjetin inkişafı baxımından ən qeyri-adi oyunlardan biri idi. “Fənərbaxça” qeyri-adi oyun göstərir, “Barselona” möhtəşəm geridönüş edir, ancaq komandam sonda qələbə qazanır. Mətbuat konfransında cəmi üç sual oldu. İkisi sosial şəbəkələrdəki dedi-qodu ilə bağlı idi, məndən belə xəbərləri şərh etməyi xahiş etdilər. İndi isə Naycel Heys-Devis rekord müəyyənləşdirib, mətbuat konfransında mənə veriləsi sual yoxdu? Çox təəssüf edirəm, bilirəm ki, Türkiyə basketbol jurnalistikasında olan bəzilərinə dediklərim xoş gəlməyəcək, ancaq yenə də təəssüflər olsun. Hesab edirəm ki, Türkiyə basketbol jurnalistikası üçün çox kədərli gecədi. Sözlərimi tərcümə edə bilərsiz”.
Yasikyaviçyus bu sözləri tərcüməçiyə deyəndən sonra qalxıb və konfrans salonunu tərk edib.
Avroliqa ilə bağlı daha bir maraqlı məqam var. “Real”ın məşhur müdafiəçisi Serxio Lyul 32-ci turda “Srvena Zvezda” qarşısına çıxmaqla bu turnirdə oyun sayını 400-ə çatdırıb. O, Avroliqada 400 oyun keçirən 2-ci basketbolçudu. Lyul yalnız hazırda “Milan”ın şərəfini qoruyan Karl Haynsdan (423) geri qalır. Lyulun komanda yoldaşı Serxio Rodriges (399) isə 400-ün astanasındadı.
