Yığmamızın Millətlər Liqasındakı rəqiblərindən olan Kosovo sentyabrın 7-də önümüzə yeni məşqçi ilə çıxacaq. Noyabrda işindən ayrılacağı təsdiqlənən Muharrem Sahitinin boşaltdığı posta isveçrəli Bernar Şalland gətirilib. 66 yaşlı mütəxəssislə martın 2-də 2 illik müqavilə imzalanıb. O, bu ay yeni komandasında debüt edəcək. Belə ki, millimizin rəqibi martın 24-də Madaqaskar, 27-də isə Burkina Faso ilə gücünü sınayacaq.
Belə anlaşılır ki, kosovolular çox çək-çevirdən, yüz ölçüb bir biçəndən sonra qərar veriblər. Şallandın təqdimat mərasimində Kosovo Futbol Federasiyasının prezidenti Fadil Vokri seçimlərini belə izah edib: “Başqa namizədlər də vardı, amma Bernar Şallandı seçməyimizə səbəb yığmamızın bir çox üzvünün İsveçrə çempionatında oynamasıdı. Məşqçimiz onları tanıyır. Bu, bizim üçün üstünlükdü. Futbolun öz sürprizləri var və çox şey yaşıl sahədə görülür. Amma şübhə etmirəm ki, o, mümkün olan işi ən yaxşı şəkildə edəcək. Dediyim kimi, iki və ya üç tanınmış məşqçi ilə danışıqlar apardıq. Onların bəziləri müvafiq təcrübəyə malik olmadı və bəziləri maddi cəhətdən uyğun gəlmirdi”.
Jurnalistlər üçün mətbuat konfransı keçirən Şalland iddialı danışıb. "Kosovo Futbol Federasiyası ilə çalışmaq mənim üçün çox xoşdu. Burdakı insanların futbola olan ehtirasını bilirəm və bu, mənim üçün çox vacibdi. Kosovo müstəqilliyinə 10 ildi qovuşan yeni dövlətdi, milli komanda isə daha gəncdi. Kosovonun bütün matçlarını izlədim və indiyə qədər böyük iş görüldüyünü deməliyəm. İndi daha çox işləmək, təcrübə qazanmaq və tərəqqiyə nail olmaq lazımdı. Komanda yeni qurulur, amma mən bir ailə yaratmaq istəyirəm. İsveçrədə və başqa ölkələrdə çıxış edən bir çox oyunçumuz var. Çox yaxşı komanda formalaşdıracağıq və bu mənim vəzifəmdi. Mənə bütün yaş qruplarına nəzarət etmək tapşırılıb, hər birinin məşqçiləri ilə əməkdaşlıq edəcəm. Ancaq mənim üçün ən önəmlisi milli komandadı. Oyunçuların düşüncələrinə yaxşı bələdəm. Kosovonun İsveçrədə oynayan bir çox oyunçusu ilə çalışdıq. Qalib mentallıqları var və belə futbolçulara rəhbərlik etmək üçün gəldim. Kosovolu futbolçular yaxşı driblinqə malik olurlar, texniki bacarıqları var, fiziki baxımdan seçilirlər. Bir neçə gündən sonra Madaqaskar və Burkina Fasoya qarşı iki yoldaşlıq görüşümüz olacaq".
Şalland şənbə günü millinin texniki heyəti və tibb personal ilə görüşüb, bundan sonra vəzifələr xüsusi olaraq ayrılıb.
Bəs Kosovonun yeni məşqçisi kimdi, onun karyerasında nə kimi uğurları var? Sözsüz ki, Şalland deyəndə ilk növbədə Ermənistan yığması yada düşür. 66 yaşlı mütəxəssis 2014-cü ilin fevralından 2015-ci ilin martına qədər bədnam qonşularımızı çalışdırıb. Baş məşqçi kimi sonuncu iş yeri də elə Ermənistan olub. Düzdü, 2015-ci ildə qısa müddətdə “Bazel”də skaut kimi fəaliyyət göstərib. Onun Ermənistandakı işini fiasko kimi dəyərləndirmək olar. Dığaları 10 oyunda meydana çıxaran isveçrəli bunların 8-də məğlubiyyətə şahidlik edib, cəmi 1 qələbə və 1 heç-heçə ilə yadda qalıb. Yeganə qələbəsi isə BƏƏ ilə yoldaşlıq görüşünə təsadüf edib. AÇ-2016-nın seçmə mərhələsini cəmi 2 xal qazanmaqla qrup sonuncusu kimi başa vuran Ermənistan tsiklin sonunu gözləmədən – 4-cü turdan sonra onu qovmağa qərar verib.
Kosovo Şallandın işləyəcəyi ikinci yığma olacaq. O, karyerasının böyük hissəsini klub məşqçisi kimi keçirib. İsveçrədə 11 klub çalışdırıb ki, aralarında sanballılar – “Sürix” (2007-2010), “Syon” (2010-2011) və “Yanq Boyz” (2013) da var. 1978-dən məşqçiliyə başlayan Bernar İsveçrənin U-17, U-18 və U-21 millilərini də çalışdırıb. Baş məşqçi kimi uğurlarına gəlincə, 2008/09 mövsümündə “Sürix”lə İsveçrə superliqasının qalibi, 2010/11-də isə “Syon”la kubokun sahibi olub. U-21 ilə AÇ-2002-nin yarımfinalçısı olub. 2009-cu ildə İsveçrədə “İlin məşqçisi” seçilib.
MİRAĞA