Bir qədər stajlı futbolsevərlər, yəqin ki, Darko Kovaçeviçi gözəl xatırlayır.

"Football-plus.az" xəbər verir ki, “Srvena Zvezda”, “Yuventus”, “Latsio”, “Olimpiakos”da top qovmuş sabiq serbiyalı forvard ən çox “Real Sosyedad”da iz buraxıb və bu klubda iki fərqli dönəmdə (1996-99, 2001-07) ümumilikdə 107 qol vurub. Onun “Real Sosyedad”da xüsusilə Nihat Kahveci ilə dueti yaddaşlarda böyük iz buraxmışdı. 50 yaşlı Kovaçeviç 2010-cu ildən bəri “Olimpiakos”da müxtəlif vəzifələrdə çalışıb. Hazırda o, həm “Olimpiakos”da, həm də Serbiya yığmasında idman direktoru vəzifəsini icra edir. “Olimpiakos”, məlum olduğu kimi, “Fənərbaxça”nın Konfrans Liqasındakı növbəti rəqibidi. Bu üzdən türkiyəli həmkarlarımız Kovaçeviçlə söhbətləşmək qərarına gəlib.

- KL-də “Fənərbaxça” ilə qarşılaşacaqsız. Bu duellə bağlı düşüncələriniz necədi?
- Hər şeydən öncə çox maraqlı və qəribə oyunlar olacaq. “Fənərbaxça” həqiqətən çətin rəqibdi. Onların da oyun fəlsəfəsi bizimkinə bənzərdi. Biz “Olimpiakos” olaraq, hər oyunda meydana qələbə qazanmaq üçün çıxırıq. Təbii ki, hər iki oyunda hər iki klubun üzərində böyük təzyiq olacaq. Amma iki tərəfin də hücum potensialı güclüdü. Bu məqam hər iki oyunun baxımlılığını artıracaq.

- “Fənərbaxça”nın heyətində bir çox dünya ulduzu yer alır. Ümumiyyətlə, rəqibiniz haqda nə düşünürsüz?
- Bəli, “Fənərbaxça”nın heyətində dünya səviyyəli, təcrübəli futbolçular var. Tadiç ilə Ceko onların başında gəlir. Bu futbolçular bu tərz oyunlardakı atmosferi, matçların necə keçdiyini gözəl bilirlər. Onlardan başqa istanbulluların heyətində avrokuboklarda böyük təcrübəyə malik olan Batşuayi və Fred də yer alır. Bu cür futbolçulara sahib olan komanda təbii ki, sürətli oynamağa, topu mümkün qədər tez irəlidəki oyunçulara çatdırmağa çalışır. Bütün bu məqamları nəzərə alanda işimiz heç də asan olmayacaq.

- Həm yunanıstanlı, həm də türkiyəli fanatlar bənzər mədəniyyətə sahibdilər. Azarkeşlər haqda nə düşünürsüz?
- Bəli, eynilə Yunanıstanda və vətənim Serbiyada olduğu kimi, Türkiyədə də fanatlar klublarına böyük coşqu ilə dəstək verirlər. Balkan ölkələrində belə azarkeşlik mədəniyyəti çoxdan var. Amma hər şeyin bir sərhəddi, çərçivəsi olmalıdı. Bu, Trabzondakı son qarşılaşmada baş verən olayların yaşanmaması üçün çox vacibdi. Mən öz klublarına qəlbən və böyük coşqu ilə bağlı olan azarkeşləri sevirəm. Həm “Fənərbaxça”, həm də “Olimpiakos” məhz belə fanatlara sahibdi. Bizimkilərin “Fənərbaxça”ya qarşı ilk oyunda “Karaiskakis”də möhtəşəm atmosfer yaradacaqlarına əminəm. Bizə lazım olan dəstəyi verəcəklərinə inanıram.

- Yeri gəlmişkən, Türkiyə mətbuatında sizin aprelin 18-də İstanbulda baş tutmalı olan cavab oyununun başqa ölkədə keçirilməsi üçün UEFA-ya müraciət edəcəyinizlə bağlı şayiələr yayılıb. Bu həqiqətdimi?
- Meydanda xoşagəlməz olaylar zaman-zaman bir çox ölkələrdə olur. Amma bizim cavab oyununda təhlükəsizliyin yüksək səviyyədə təmin olunacağı ilə bağlı heç bir narahatlığımız yoxdu. Qısası, bu şayiələrin reallıqla heç bir əlaqəsi yoxdu. Uydurma xəbərlərdi. Cavab oyununu Türkiyədə keçirəcəyik.

- Daniel Podense Təl-Əviv “Makkabi”si ilə cavab oyununda sarı vərəqə alaraq cəzalı duruma düşdü. Onan yoxluğu komandanızın oyununa necə təsir edəcək?
- Podense “Olimpiakos” üçün çox mühüm futbolçudu və təəssüf ki, ilk oyunu buraxmalı olacaq. Amma heyətimiz genişdi və onun yerini tuta biləcək çox futbolçumuz var. Ona görə də bu durumun bizə ciddi problem yaradacağını düşünmürəm.

- Ümumiyyətlə, şansları necə qiymətləndirirsiz? Kimin mərhələni adlamaq şansı daha yüksəkdi?
- Təbii ki, bizi asan oyunlar gözləmədiyini bilirik. Komanda halında bunun fərqindəyik. Ona görə də özümüzü ən ciddi mübarizəyə hazırlayırıq. Mən həmişə belə cür məqamlarda poztiv düşünməyə çalışmışam. Özümüzə güvənirik. Hər iki oyunda da qalib gələrək KL-in yarımfinalına yüksəlməyi hədəfləmişik. Ümid edirəm ki, bu hədəfə çatacağıq.

- VAR sisteminin futbola gətirilməsinə rəğmən, hakim səhvləri bitmək bilmir. Yunanıstanda artıq neçə müddətdi çempionat oyunlarına əcnəbi hakimlər dəvət olunur. Bu qərardan sonra Yunanıstan futbolunda hakim səhvləri azalıbmı?
- Ümumiyyətlə, hakimlik mövzusu barədə çox danışmağı sevmirəm. Çalışıram ki, kənara çıxmayım və daim meydanın içində qalım. Yunanıstan Futbol Federasiyası bu cür məsləhət bildiyi üçün belə bir qərar qəbul etdi. Amma hakimlər hansı səviyyədə olmalarından asılı olmayaraq, həmişə öz üzərində işləməli, daha da inkişaf etməyə çalışmalıdılar.

- Ən böyük rəqibiniz “Panatinaikos”u Fatih Terim çalışdırır. Onun haqda nə düşünürsüz?
- Fatih Terim Türkiyə futbolunun və Avropanın əfsanəsidi. Çox uzun və uğurlu bir futbol keçmişinə sahibdi. Həmişə hörmətə layiq olan futbol mütəxəssislərindəndi. Elə mənim də onun kimi insanlara böyük hörmətim var.

- Türkiyə yığmasından “Olimpiakos”a hansısa futbolçunu transfer etmək fürsətiniz olsaydı, kimə üstünlük verərdiz?
- Türkiyə futbolunu hər zaman yaxından təqib edirəm. Türkiyədə istedadlar çoxdu. Birini seçmək məcburiyyətində qalsam, təbii ki, düşünmədən Arda Gülərə üstünlük verərəm. Çünki hələ çox gəncdi və qarşıda onu böyük gələcək gözləyir. Konkret hücumçulardan birini seçməli olsam, Enes Ünalın adını çəkərdim.