“Skautlarımız Azərbaycanın U-19 və U-21 komandalarında forma geyən futbolçuları izləyir”
Avstriyada fəaliyyət göstərən Vyana "Qarabağ"ının baş meneceri Ramin Şükürov klubun mətbuat xidmətinə müsahibə verib. O, “qırmızı-ağlar”ın gördüyü işlərdən, hədəflərdən və başqa məsələlərdən danışıb.
- "Qarabağ"ın ilk dövrədəki çıxışını necə qiymətləndirirsiz?
- Klubumuz bu il Avstriyanın 3-cü liqasında ilk dəfə çıxış etməsinə baxmayaraq, 16 oyuna 30 xal toplayaraq ilk dövrəni 6-cı yerdə bitirib. Bu nəticə debütant üçün çox yüksək göstəricidi. Lakin qarşısına yüksək hədəflər qoyan bir klub üçün razı qalınacaq nəticə deyil. Ardıcıl 3 ildi yüksək liqaya yüksəlməyimizi, buna uyğun edilən dəyişiklikləri və yeni oyunçuların uyğunlaşma müddətini nəzərə alsaq, idarə heyəti olaraq hazırkı inkişaf prosesindən məmnunuq. Çünki liqanın ilk dövrəsindəki nəticələr həlledici deyil. Qış fasiləsini doğru dəyərləndirdik. İkinci dövrədə ümidlərin doğrulacağı nəticələr vermək istəyirik.
- Son oyunları nəzərə alaraq demək olar ki, bəzi futbolçular məşqçilərin ümidini doğrultmadı?
- Təbii ki, yeni transferlərdən qısa müddətdə istənilən səviyyədə oyun tələb etmək olmur. Biz bu il fərqli ölkə və fərqli liqalardan fərqli özəlliklərə sahib oyunçular transfer etdik. Bütün bu fərqlilikləri klubun gələcəyi naminə birləşdirmək üçün ən önəmli ehtiyac zamandı. Klub rəhbərliyi qısa müddətdə böyük nəticələr əldə etmək üçün lazımi işləri həyata keçirir. Çünki ən qısa müddətdə Avstriya bundesliqasına çıxmaq hədəfinə çatmaq üçün zamanla savaşmalısız.
- Antalya toplanışında Bakı "Xəzər"iylə qarşılaşdız. Bu, Azərbaycan klubuyla ilk görüş kimi tarixə düşdü. Rəqib haqda fikirləriniz maraqlıdı...
- "Xəzər" də bizim kimi gənc və hədəfləri olan klubdu. Bu matçda rəqib çox yaxşı mübarizə apardı. Bu inkişaf tempi ilə "Xəzər"i tezliklə premyer-liqada görəcəyimizə inanıram. Ümid edirəm ki, yaxın gələcəkdə "Xəzər" və "Qarabağ" iki ölkənin elitasında çıxış edən futbol klubları olaraq yenidən qarşılaşar.
- Klubunuzda çıxış edən azərbaycanlı futbolçuların hazırlıq səviyyəsi necədi?
- Qış transfer dönəmində heyətimizə cəlb olunan Emil Fərzəliyevin gəlişiylə komandada azərbaycanlı futbolçuların sayı 3-ə çatıb. Bildiyiniz kimi, Elvin Bədəlov və Dmitri Nağıyev mövsümün ortalarından heyətdə yer almağa başladı. Bədəlov bu mövsüm çox yaxşı formadadı və müntəzəm start heyətində yer alır. Nağıyev isə müdafiənin sağında Avstriya bundesliqasında çempionluq sevinci yaşayan Kristian Sonoferlə rəqabət aparır. Təbii ki, kimin hansı oyunda komanda üçün daha doğru seçim olduğuna baş məşqçi qərar verir. Fərzəliyev əsas heyətə düşmək üçün uyğunlaşma müddəti keçməli və üzərində çox çalışmalıdı.
- Yayda başqa azərbaycanlı futbolçuların transferi gözlənilirmi?
- Bu haqda düşünmək tezdi. Çünki mövsümün sonunda hansı liqada olacağımızı bilmirik. Sona yaxın bu suala aydınlıq gələcək. O zaman çıxış edəcəyimiz liqanın səviyyəsinə uyğun transferlər edəcəyik. Bir neçə azərbaycanlı gəncin transferi həyata keçirilə bilər. Skautlarımız Azərbaycanın U-19 və U-21 komandalarında forma geyən futbolçuları izləyir.
- "Qarabağ"ın infrastrukturu və gələcək planlar haqda nə deyə bilərsiz?
- Fevralda klubumuzun infrastruktur imkanları baxımından çox önəmli hadisə baş verdi. 3 aydı Şvexat şəhərinin meriyası ilə apardığımız rəsmi danışıqlar fevralın 15-də bəhrə verdi. Belə ki, klubla şəhər meriyası arasında razılığa əsasən "Qarabağ" artıq ev oyunlarını Avstriyanın tarixi “Rudolf Ton” stadionunda keçirəcək. Bu arena 1980-ci ildə inşa edilib və 7 min yerlik tribunaya sahibdi. Komandamız martın 3-də (sabah) həmin stadionda ilk rəsmi ev oyununa çıxacaq. İdman mərkəzimiz isə klubumuzun futbol məktəbi və əsas komandalar üçün təlim-məşq meydançaları olaraq qalacaq. İdarə heyəti olaraq maliyyə imkanlarımızı genişləndirərək, bazamızı yaxın gələcəkdə müasir idman kompleksi formasında inşa etməyi planlaşdırırıq.
- Cari mövsüm üçün hədəf nədi? Hazırkı heyətin səviyyəsi daha yüksək liqaya vəsiqə qazanmağa imkan verir?
- Hər il olduğu kimi, bu il də hədəf yüksək liqaya vəsiqə qazanmaqdı. Bu il 2-ci liqaya yüksəlmək bizim üçün daha böyük önəm daşıyır. Bununla da bundesliqanın üzvü olacağıq. Bundesliqa özündə Avstriyanın 1-ci və 2-ci liqalarını birləşdirir. Azərbaycanlılar tərəfindən yeni qurulan və qısa müddətdə sürətlə irəliləyən Vyana "Qarabağ"ının bundesliqada mübarizə aparmasının nə qədər qürurverici uğur olacağını, yəqin ki, izah etməyə ehtiyac yoxdu.
- Komandanın gücü, nəticələri Avstriya futbolunda necə qarşılanır?
- “Qarabağ”ın gücü gənc, yenilikçi və müasir klub olmasıdı. Avstriyada klublar və futbolsevərlərin böyük hissəsi mühafizəkardı. Bu önəmli amil ilk vaxtlar “Qarabağ”ın Avstriya cəmiyyətində qəbul edilməsində böyük sədd kimi görünürdü. Təbii ki, idarə heyəti olaraq bilirdik ki, Avstriyada əcnəbi statusda olan azərbaycanlılar tərəfindən qurulan və yerli cəmiyyətdə "Azərbaycan klubu”, "Azərbaycanlıların klubu" kimi tanınan futbol klubunu cəmiyyətin futbolsevər kütləsi qısa zamanda sevməyəcək. Əksinə, buna qarşı çıxa bilərdilər. Biz bu çətinliklərlə yola başlayaraq inandıq ki, əldə edəcəyimiz uğurlar və cəmiyyət həyatında pozitiv görəcəyimiz işlər "Qarabağ"ı müəyyən müddət sonra yerli cəmiyyətdə sevilən klublardan biri edəcək. Bu inancımız və əzmkar fəaliyyətimiz bu gün bəhrə verir. Artıq yerli cəmiyyətdə futbolsevər kütlənin önəmli bir hissəsi “Qarabağ”ı uğurla yüksələn və inkişaf edən bir klub kimi tanıyır. Komandamızın oyununu izləməyə gələn tamaşaçıların sayı gündən-günə artır. Biz gözəl futbol nümayiş etdirməklə, nizam-intizamlı davranmaqla yanaşı, həm də sosial layihələrlə çalışırıq ki, yerli cəmiyyətdə adımız və fəaliyyətimiz hər zaman insanlarda müsbət fikirlər oyatsın və dəstəklənilsin. Fərqindəyik ki, idarə heyəti olaraq fəaliyyətimiz və davranışlarımız Avstriya cəmiyyətində, sadəcə, "Qarabağ" yox, bilavasitə Azərbaycan və xalqımız haqda da fikir yaradacaq. Bu amil bizim üçün çox böyük məsuliyyətdi və bunu layiqincə daşımağa çalışırıq. Fürsətdən istifadə edib bizə Azərbaycandan dəstək olan azarkeşlərə təşəkkür edirəm. Sosial mediada bizə çoxlu məktublar gəlir. Klubun formasını əldə etmək istəyən insanlar Bakıda rəsmi mağazamızın açılmasını istəyirlər.
- Yayda nəticədən asılı olaraq klubda islahatlar ola bilərmi?
- Siz uzunmüddətli inkişaf planı hazırlayıb və qarşınıza bunu həyata keçirmək üçün hədəf qoymusuzsa, hədəfə çatana qədər daim islahatlar və dəyişikliklər gözləniləndi.