Yığma martda iki yoldaşlıq oyunu keçirəcək. Qurban Qurbanovun rəhbərlik etdiyi komanda martın 23-də Belarusla qarşılaşacaq. Bu oyun Olimpiya stadionunda keçiriləcək. Millinin növbəti sınaq görüşü isə Antalyada gerçəkləşəcək. Əsas komanda martın 27-də qardaş ölkədə Makedoniya ilə üz-üzə gələcək. Belarusla matç Qurbanov üçün xüsusi əhəmiyyət daşıyır. Düzdü, bu, çalışdırıcının millinin “sükanı arxasında” debüt oyunu deyil. Qurban bəy “siftə”ni Moldova ilə Antalyadakı qarşılaşmada (0:0) etdi. Lakin Belarusla duel yığmanın onun rəhbərliyi altında ilk ev oyunudu. Sözügedən qarşılaşma 20.00-da başlayacaq. Düzdü, söhbət yoxlama matçından gedirsə, azarkeşləri stadiona səsləməyin nə qədər doğru olduğunu söyləmək çətindi. Ancaq Qurbanovlu millinin ilk ev qarşılaşması baxımından matça maraq var. Həm də Moldova ilə oyundan fərqli, Belarusla görüşdə tam heyət baş məşqçinin sərəncamında olacaq.
Xatırlayırsızsa, Antalyadakı toplanış zamanı bəzi futbolçular klubunun oyunu olduğundan yığmaya gəlməmişdi. Martdakı hazırlıq prosesi isə FİFA-nın “pəncərəsi”nə düşdüyündən komanda oyunlara tam heyətlə çıxacaq. Maraqlı məqam isə bu oyuna bilet satılıb-satılmayacağıdı. Bunu AFFA-nın Mətbuat və İctimaiyyətlə Əlaqələr Departamentinin rəhbəri Firuz Abdulladan dəqiqləşdirdik. Qurum rəsmisi qarşılaşmaya bilet satılacağını söylədi. Satışa nə vaxt başlanılacağına və qiymətlərə gəlincə, detallar hələ dəqiqləşməyib. Yaxın günlərdə bununla bağlı AFFA-nın saytında xəbər yerləşdiriləcək.
FARİZ