Futbol deyəndə insanların ağlına bir qədər sərt oyun növü gəlir. Halbuki hər nə qədər kişilərə xas oyun olsa da, bir o qədər də özünəməxsus gözəllikləri var. Məhz futbolun sayəsində neçə-neçə yaralı qəlbə dərman tapılıb, şikəst insanlar özlərinə diqqət görüblər, ailələr qurulub və s. Yəni “futboldu da” deyib keçmək mümkün deyil.
Təxminən iki ay əvvəl videoçarxda izlədiyim hadisə hələ də gözümün önündən getmir. Almaniyada yaşayan “Barselona” azarkeşi kluba məktub yazaraq futbolçularla üzbəüz görüşmək istədiyini bildirmişdi. Klub rəhbərliyi nə etmişdi? Üzərində “Barselona” yazılan avtobusu İspaniyadan birbaşa Almaniyaya yollayıb, həmin əlil xanımın Kataloniyaya gəlməsinə nail olmuşdu. Daha sonra stadionla yaxından tanış olmuş, ulduz futbolçularla canlı ünsiyyət qurmuşdu. Həmin an qızın hansı hisslər keçirdiyini görmək üçün gözlərinə baxmaq kifayət edirdi.
Azərbaycanda da buna bənzər olaylara rast gəlirik. Əlil və valideyn himayəsindən məhrum olan uşaqlar daim futbolçuların diqqət mərkəzindədi. Bayramlarda onların yanına gedir, sovqat aparırlar. Bir neçə futbolçu və məşqçi var ki, şəxsi imkanları hesabına kasıb və xəstəlikdən əziyyət çəkənlərə yardım əllərini uzadıblar. Hansısa tərdbirlər təşkil edir, oyunlara dəvət edir, bir sözlə, qayğılarını əsirgəmirlər. Bir neçə gün öncə də sevindirici hadisə yaşanıb.
Belə ki, “Binə”nin stajlı azarkeşi sayılan Canbaxış Qəniyev yeni əlil arabasına qovuşub. Qəsəbə təmsilçisi hələ həvəskarlar liqasında oynayan vaxtlardan komandanın yanında olan 67 yaşlı Qəniyevin arabasının yaxşı vəziyyətdə olmadığını görən “Binə”nin məşqçilər heyəti və futbolçuları öz aralarında “atışaraq”, əlil fanata sürpriz etmək qərarına gəliblər. “Xəzər”lə çempionat oyununundan əvvəl Canbaxış bəyə təxminən 500 manat dəyərində olan əlil arabası və klubun şərfini bağışlayıblar.
Təbii, bu cür xeyirxah əməlin qarşısında baş əyməmək olmur. Amma tək əldən səs çıxmaz. Yaxşı olar ki, premyer-liqada oynayıb yaxşı pullar qazanan, fikri-zikri bahalı maşınların, yeni tikilən evlərin, brend paltarların yanında olan futbolçular də bu cür addımla qəlbiqırıq insanları sevindirməyi bacarsınlar. Odu ki, kef-damaqdan başı açılmayan futbolçular həmin anın videosuna baxsınlar, bu cür xəbərləri oxusunlar. Bəlkə onda gözlərinə işıq gələr...
HƏBİB
