Misli premyer-liqasının 24-cü turunun “Səbail” - “Sabah” oyunu Adil Nağiyev ücün əlamətdar oldu. 29 yaşlı müdafiəçi ölkə futbolu tarixinə çempionatda 200 oyun həddinə çatann 149-cu futbolçu kimi düşdü.

Onunla əlaqə saxlayıb, bəzi suallarımıza cavab aldıq.

- Adil, sirr deyilsə, karyeranı neçə yaşına kimi davam etdirmək fikrindəsən?
- Futbol elə sahədi ki, sabah necə olacağını bilmək olmur. Amma özümü yaxşı hiss edirəm. Bacardıqca davam edəcəm, hələ ki karyeramı bitirmək haqda düşünmürəm.

- “Səbail”ə qədər “Zirə”də, “Sumqayıt”da, “Şamaxı”da oynamisan. Karyeranın ən yaxşı dönəmi hansı klubda olub?
- Məncə, ən yaxşı dönəmi “Zirə”də keçirmişəm. Bu klubla hər il yaxşı nəticəyə imza atmışıq, gümüş medal qazanmışıq. Avropa Liqasında mərhələ atlamışıq. Orda 100 oyun keçirmişəm. Karyeramda qazandığım uğurlarda “Zirə”nin payı çoxdu.

- 200 oyunda 5 qolun var. Bu qolların sayı daha çox ola bilərdimi? Yoxsa məşqçilər sənə hücuma qoşulmağa icazə verirmi?
- Əslində fürsətləri nəzərə alsam, daha çox qol vura bilərdim. Sadəcə, yararlana bilməmişəm. Mən mərkəz müdafiəçisiyəm, məşqçinin də tələbi müdafiədə etibarlı oynamağımdı, qol vurmaq hücumameyilli futbolçulardan tələb edilir.

- Bir ara yığmada oynadın, lakin sonra dəvət olunmadın. Yığmada özünü lazımi səviyyədə göstərə bildinmi? Bir daha milli komandadan dəvət gözləyirsənmi?
- Robert Prosinecki də məni dəvət etmişdi gənc yaşlarımda, sadəcə, onda zədələndim deyə, meydana çıxa bilmədim, sonra isə Canni de Byazi məni dəvət elədi. Meydanada buraxdı, amma uğurlu olmadı deyə, bir daha çağrılmadım. Komandamda göstərdiyim oyunla həmişə millidən dəvət gözləyirəm. Hər kəs orda canla-başla oynamaq istəyər.

- Səncə, “Səbail” cari mövsüm avrokuboklara vəsiqə qazana biləcəkmi?
- Əlbəttə, bu il iddialı “Səbail” var. Baş məşqçimiz də təcrübəlidi, iddialı heyət qurub. Bu yerə kimi komanda öz gücünə gəlib çıxıb. İstəyirik bu il avrokubokda həm ölkəmizi, həm də “Səbail”i layiqincə təmsil edək.

- Umumiyyətlə, komandanın bu mövsüm ücün hədəfi nədi? Avrokuboklara vəsiqə yolunda kimləri özünüzə rəqib görürsüz?
- Bu il komanda yenidən quruldu. Baş məşqçimiz istəyir ki hər bir kluba başağrısı olaq, hər kəslə mübarizə aparacaq gücdə olaq. Artıq bütün klublar bizdən çəkinir, hörmət edir. 8-ci yerdən 2-ci yerə kimi qızğın mübarizə gedir. Avropa Liqasına vəsiqə qazanmağ ücün hər bir rəqibin şansı var. Kim daha çox mübarizə aparsa, qələbə ücün meydanda canı qoysa, o da vəsiqə qazanacaq.

ELMİN İSKƏNDƏRLİ