"Traktor"un futbolçularına silahlı hücum - İran Futbol Liqası bəyanat yaydı
"Traktor"un yaşı 23-dən aşağı olan oyunçularının Kirmanşahdakı stadiona daxil olarkən naməlum şəxslər tərəfindən fiziki hücuma məruz qalaraq, əşyalarının oğurlandığı bildirilir.
"Football-plus.az" xəbər verir ki, İran mediasında dərc olunan məlumata əsasən, hadisədə "Traktor"un dörd oyunçusunun bıçaqlandığı və xəstəxanaya yerləşdirildiyi qeyd olunub.
"Traktor"un meneceri Kazım Mahmudinin mediaya verdiyi açıqlamaya görə, komandanın oyunçuları Kirmanşah şəhərinin "Besət"lə matçın keçiriləcəyi yerə daxil olarkən naməlum şəxslər tərəfindən soyuq silahla hücuma məruz qalıb. O həmin şəxslərin futbolçuların şəxsi əşyalarını, idman formaları və ayaqqabılarını oğurlayaraq qaçdıqlarını bildirib.
Mahmudinin sözlərinə görə, "Kirmanşah" rəsmiləri stadionda olmayıb. Təbriz "Traktor" klubunun baş direktoru Huşəng Nəsirzad insidentlə bağlı açıqlama verib.
"Bu gün Traktor komandasının 23 yaşdan aşağı üzvlərini daşıyan avtobus stadiona daxil olmazdan əvvəl onlar naməlum şəxslərin hücumuna məruz qalıb. Hadisəyə polis və təcili yardım qüvvələri müdaxilə edib. Liqa təşkilatı düzgün şəkildə dərhal məsələni həll edib ki əslində daha çox mənfi nəticələrə səbəb olmasın".
İran Futbol Liqası Təşkilatı bu barədə bəyanat yayaraq, həmin təşkilatın və Futbol Federasiyasının Besət və Traktor komandalarının 23 yaşdan aşağı oyunçuları arasında keçiriləcək matçı ləğv etdiyini və hadisə ilə bağlı hesabatı qərar verilməsi üçün Futbol Federasiyasına göndərdiyini açıqlayıb.
Bəyanatda vilayət polisi və təhlükəsizlik qüvvələrinin Traktor komandasının avtobusuna hücum edənləri axtardığı qeyd olunub.
Digər xəbərlər
