1/4 final, cavab görüşü
Neftçi (Bakı) – Sumqayıt 1:1 (1:1)
Neftçi: 93. Rza Cəfərov, 10. Filip Ozobiç, 8. Emin Mahmudov (k), 2. Qara Qarayev, 3. Höccət Haqverdi, 19. Azər Salahlı, 99. Ervin Koffi, 44. Yuri Matias, 9. Andre Şinyaşiki (22. Reziuan Mirzov, 67), 20. Alfa Konte (88. Brayan Moreno, 71), 77. Yeqor Boqomolski (11. Kilan Lebon, 83).
Ehtiyat oyunçular: 30. Aqil Məmmədov, 95. Rəvan Kazımov, 17. Rəhman Hacıyev, 7. Azər Əliyev, 26. Ömər Buludov, 28. Turan Vəlizadə, 16. Lukas Melano, 4. Mark Tamaş.
Baş məşqçi: Miodraq Bojoviç.
Sumqayıt: 1. Mehdi Cənnətov, 7. Rövlan Muradov, 17. Murad Xaçayev (k), 8. Səbuhi Abdullazadə, 19. Roy Kehat, 11. Kasimir Ninqa, 12. Abu Dosso (20. Ayxan Süleymanlı, 90), 4. İsa Suliman, 10. Kamran Aliev (21. Nihad Əhmədzadə, 83), 71. Masaki Murata, 60. Tresor Mossi (41. Uğur Cahangirov, 90).
Ehtiyat oyunçular: 15. Orxan Sadıqlı, 32. Murad Ağamalıyev, 14. Elvin Bədəlov, 35. Sənan Muradlı, 9. Erik Sorqa.
Baş məşqçi: Samir Abasov.
Hakimlər: KAMAL UMUDLU, Vüsal Məmmədov, Rəhman İmami, Nicat İsmayıllı (hamısı Bakı).
VAR hakimi: Elçin Məsiyev (Bakı).
VAR hakiminin köməkçisi: Kamran Bayramov (Bakı).
Hakim-inspektor: İmanxan Sultani (Bakı).
AFFA nümayəndəsi: Elgiz Abbasov (Masallı).
Qollar: F.Ozobiç, 26 (1:0). R.Kehat, 40 (1:1).
Vərəqələr: A.Dosso, 30 (qeyri-idman hərəkəti). A.Şinyaşiki, 32 (hakimin qərarına etiraz). Q.Qarayev, 45+2 (qeyri-idman hərəkəti). F.Ozobiç, 51 (hakimin qərarına etiraz). A.Konte, 60 (hakimin qərarına etiraz). B.Moreno, 87 (qeyri-idman hərəkəti). İ.Suliman, 90 (qeyri-idman hərəkəti). K.Lebon, 90+5 (qeyri-idman hərəkəti). R.Kehat, 90+6 (hakimin qərarına etiraz). S.Abdullazadə, 90+6 (hakimin qərarına etiraz) – sarı.
9 fevral. Bakı. “Neftçi Arena”. 1000 tamaşaçı.
Birinci hissəyə 3, ikinci hissəyə 6 dəqiqə əlavə olunub.
İlk oyun – 3:2.

Gözdən qaçmadı
* Stadionda “15 il çiyin-çiyinə Forza Neftçi” pankartı asılmışdı. “Neftçi”nin oyunçuları da meydana “Forza Neftçi 15” yazılan forma ilə çıxdı.
* “Kimyaçılar” azarkeş qrupu uzatma dəqiqələrində baş hakimin ünvanına kəskin təhqirlər yağdırdı.

Səfərdən qələbə ilə dönən “Neftçi”nin yarımfinala vəsiqəyə can atacağıyla yanaşı, son çempionat oyununda bu rəqibdən aldığı məğlubiyyətin təsadüf olduğunu göstərməyə çalışacağı da aydın idi. Komandalar ilk dəqiqələrdən əzmkar mübarizəyə girişdi. Artıq 3-cü dəqiqədə top torda idi. Ancaq Kehat fərqlənərkən rəqib qapıçıya qarşı kobudluq etdiyinə görə hakim qolu qeydə almadı. Tərəflər boşluq yaxalayan kimi hücuma çıxmağa can atırdı. 25-ci dəqiqədə “Neftçi” hesabı açdı. Lakin bu dəfə də hakim hücum zamanı topun meydanı tərk etdiyini bildirdi. Cəmi 1 dəqiqə sonra vurulan qola artıq söz ola bilməzdi. Ozobiç cərimə meydançası xaricindən özünəməxsus zərbə ilə gözəl qola imza atdı – 1:0. Ruhlanan meydan sahibləri bir qədər sonra növbəti qola da yaxınlaşdı. Lakin Şinyaşikinin zərbəsində azca sərtlik çatmadı. 37-ci dəqiqədə Kamranın zərbəsi təhlükəli alınsa da, azca dəqiq olmadı. Cəmi 3 dəqiqə sonra “Sumqayıt” hesabı bərabərləşdirdi. Standart vəziyyət yerinə yetirilərkən “ev tapşırığı” sonucunda Kehat yaxın məsafədən topu tora qovuşdurdu - 1:1. İlk hissəsin son dəqiqələrində maraqlı anlar yaşandı. Belə ki, Ozobiçin zərbəsindən sonra əllə oyuna görə penalti təyin olundu. Hətta Mahmudov topun arxasına keçib zərbəni vurmağa yaxın olduğu vaxt referi Umudlu VAR-a getdi. VAR-a baxandan sonra isə qərarını dəyişərək korner verdi.

49-cu dəqiqədə Ozobiçin ötürməsindən sonra Şinyaşiki toru silkələsə də, hakim ofsayd qərarı verərək qolu qeydə almadı. Bir qədər sonra isə əks-hücum zamanı Ninqanın zərbəsi təhlükə yaratdı. İrəliləyən dəqiqələrdə hansısa real qol epizodu olmadı. Beləliklə, “Neftçi” ilk oyundakı qələbə sayəsində yarımfinala adladı. Bakılıları finala vəsiqə uğrunda əzəli rəqibi “Qarabağ”la iki çətin duel gözləyir.

KAMAL SƏFƏR