Oyundan sonra “Qəbələ”nin vitse-prezidenti Fariz Nəcəfov brifinqdə jurnalistlərin suallarını cavabladı.
- Qış fasiləsindən sonra “doğma divarlar” arasında baş tutan ilk oyun barədə fikirləriniz maraqlıdı...
- Oyundan-oyuna irəliləyiş var, bunu hiss edirik. Əlbəttə, səhvlərimiz də var. Qarşılaşma kifayət qədər gərgin məcrada davam etdi. Sevinirik ki, 3 xalı qazanan tərəf biz olduq.
- Kifayət qədər qol imkanı yaradılsa da, komanda sanki son nöqtəni qoymaq baxımından əziyyət çəkir...
- Düzdü, yaratdığımız qol imkanlarından lazımınca istifadə edə bilmirik. Ancaq bu, tək bu qarşılaşmada görünən problem deyil. Ötən mövsümdən etibarən belə problemləri yaşayırıq. Məşqçilər korpusu da bunu görür.
- Təmkin Xəlilzadə mövsümün ilk yarısında sərgilədiyi futbolu ortaya qoymur. Milli üzvü “Zirə”də daha xoş təsir bağışlayırdı.
- Məncə, normaldı. Yeni komandaya gəlib, qarşısına fərqli tələblər qoyulub. “Qarabağ”la oyunda Təmkini bəyənmişdim. Bugünkü görüşdə, ola bilər, hansısa məqamda uğursuz oldu. Yenə deyirəm, təbiidi. Uyğunlaşma üçün bir qədər zamana ehtiyac var.
- Matçdan sonra futbolçular arasında münaqişə yaşandı.
- Bu barədə dolğun məlumatım yoxdu. Tapşırıq vermişəm ki, araşdırılsın. Günah bizim uşaqlardadısa, mütləq cəzalandırılacaqlar.
- Ayxan Abbasov mətbuat konfransında bildirdi ki, Ruslan Qurbanov dayanmadan söyüş söyürdü.
- Belə hal yaşanıbsa, Ruslan mütləq cəzalandırılacaq.
MİRAĞA