AFFA İntizam Komitəsinin dünən keçirilən növbəti iclasında ötən həftəsonu Topaz premyer-liqasında və əvəzedicilərin çempionatında keçirilən 15-ci turun oyunlarında yaşananlar müzakirə olunub və hüquqi qiymət verilib.
Premyer-liqada yalnız mərkəzi oyunda intizam pozuntusu qeydə alınıb. “Qarabağ” – “Qəbələ” matçının 72-ci dəqiqəsində yerli azarkeşlər meydana kənar əşyalar atıb. Komitə buna görə Ağdam təmsilçisini 1600 manat cərimələyib.
Əvəzedicilərə gəlincə, “Səbail”lə oyunda “Keşlə”nin 5, “Zirə” ilə qarşılaşmada isə “Sumqayıt”ın 4 futbolçusu sarı vərəqə ilə cəzalanıb. Bu da adı çəkilən klubların hərəyə 400 manat cərimələnməsinə şərait yaradıb.
Beləliklə, iclasda klublara 2400 manat cərimə kəsilib. Bu isə mövsümün əvvəlindən cərimə sanksiyaları üzrə nəzərdə tutulan məbləğin 57340 manata çatması deməkdi.