Alesio yenə həmyerlilərinə arxalandı
Dünən Bakı İdman Sarayında futzal üzrə yüksək liqanın 15-ci turunun oyunları start götürdü. Heç şübhəsiz, turun mərkəzi qarşılaşması "Ekol" - "Araz" dueli idi. Bu komandalar arasında ilk iki dövrədə baş tutan hər iki oyunda son çempion 2:1 hesabı ilə qalib gəlmişdi. Avropa çempionatından yorğun, ən əsası psixoloji zədə ilə dönən "Araz"ın oyunçularının (hər halda, yığmada əsas yük Naxçıvan təmsilçisinin üzvlərinin üzərinə düşüb) yüksək liqa matçına necə çıxacağı maraq doğururdu. Əvəzində "Ekol" fasilədən yararlanıb Qubada hazırlıq keçmişdi. Joze Alesio da Silva həmçinin qitə birinciliyində zədələnən İsa Atayevin xidmətindən məhrum idi. Bununla belə, "Araz" yeni transferi, iranlı Rza Toloyinin adını ilk dəfə protokola daxil etmişdi. Hadisələri qabaqlayaraq qeyd edək ki, baş məşqçi nə güneyli soydaşımıza, nə də FK.İD-dən icarədən dönən Adil İsmayılova bir dəqiqə belə şans vermədi. Ümumiyyətlə, Alesionun heyət seçimi "qırmanclanmalıdı”. O, çempionat matçına da ilk dəqiqələrdən üç braziliyalı ilə çıxdı. Halbuki "Araz"ın qarşısındakı komanda tam yerlilərdən qurulub. O başqa məsələdi ki, görüşün taleyini əsasən "sambaçılar” həll etdi. Üç qoldan ikisini məhz baş məşqçinin həmyerliləri vurdu.
İnsafən, "Ekol" pis təsir bağışlamadı. Naxçıvanlıların qol arayışı ilk yarının başa çatmasına saniyələr qalmış nəticə verdi. Tyaqo "şirkət təmsilçisi"nin müdafiəsini yarmağı bacardı. Buna qədər Xətai Bağırovun zərbəsi dirəkdən dönmüşdü. Ümumiyyətlə, birinci hissədə hər iki komandanın erkən qol vurmaq imkanı oldu. “Ekol”dan Namiq Məmmədkərimov rəqib torunu silkələyə bilərdi. İkinci hissənin əvvəlində isə Eduardo rəqibin cərimə meydançasında yaranan qarışıqlıqdan yararlanıb dabanıyla topu qapıdan keçirdi. “Ekol” standart vəziyyətdən sonra dərhal bu qollardan birinin əvəzini çıxmağa yaxın oldu. Radik Əhmədovun dirəyin dibinə ötürməsini kapitan qapıya istiqamətləndirsə də, son anda Rövşən Hüseynli rəqibin fərqlənməsinə imkan vermədi. Qalan dəqiqələrdə Tyaqo iki dəfə dirəyi nişan aldı. Hesab isə sonuncu dəqiqədə dəyişdi. Alesionun yetirmələrinin son qolu boş qapıdan keçirdiyini də qeyd edək. Əslində son bir neçə dəqiqəni "Araz" qapıçısız oynayırdı. Final fitinə 36 saniyə qalmış rəqib qolkiperin irəli çıxdığını görən Çovdarov aşırma zərbə ilə “çərçivə”yə düşdü. Beləliklə, naxçıvanlılar günün ikinci oyununun nəticəsindən asılı olmayaraq, lider mövqeyində möhkəmləndi.
Digər qarşılaşmada debütantlar münasibətləri aydınlaşdırdı. Turnir cədvəlinin fərqli mövqelərində yer alan komandaların duelində favorit “Marafon” idi. Qış fasiləsində iki iranlı futzalçı ilə vidalaşan, əvəzində Belarusdan 2 oyunçu dəvət edən komanda matçda hesabı açan tərəf oldu. Üstünlüyünü 10-cu dəqiqədə qola çevirən “Marafon”un heyətində Omid fərqləndi. Komandaların çabalarına baxmayaraq, nə fasiləyədək, nə də ikinci yarıda başqa qol vurulmadı və beləcə qarşılaşma futzal üçün ənənəvi olmayan hesabla başa çatdı.
Qeyd edək ki, “Neftçi” – “Yasamal” FK oyunu qeyri-müəyyən müddətə təxirə salınıb.
15-ci tur
Ekol – Araz 0:3 (0:1)
Ekol: 99. Emin Kürdov, 4. Fərid Atakişiyev, 9. Əsgər Abasov, 11. Namiq Məmmədkərimov (k), 14. Zaur Fərziyev; 1. İntiqam Babayev, 2. Radik Əhmədov, 7. Sərxan Məstiyev, 10. Samir Həmzəyev, 13. Taleh Ağayev, 17. Fərid Ələkbərov, 33. Ələsgər Ələsgərli.
Baş məşqçi: Radik Əhmədov.
Araz: 1. Rövşən Hüseynli, 6. Eduardo, 3. Tyaqo, 8. Rizvan Fərzəliyev (k), 13. Qallo; 19. Anar Məmmədov, 7. Ramiz Çovdarov, 11. Xətai Bağırov, 9. Oktay Rüstəmli, 10. Rza Toloyi, 18. Adil İsmayılov.
Baş məşqçi: Joze Alesio da Silva.
Qollar: Tyaqo, 20 (0:1). Eduardo, 25 (0:2). R.Çovdarov, 40 (0:3).
Vərəqələr: X.Bağırov, 8. R.Çovdarov, 17. N.Məmmədkərimov, 33. Eduardo, 40 – sarı
Hakimlər: Yusif Nurullayev, Hikmət Qafarlı, Azad Hüseynov.
Hakim-inspektor: Ağarza Rzayev.
14 fevral. Bakı İdman Sarayı.

FK.İD – Marafon 0:1 (0:1)
FK.İD: 1.Ümid Paşayev, 7. Rəcəb Fərəczadə, 8. Nihad İsmayılov, 9. Elşən İbrahimxəlilov, 10. Faiq Əliyev; 12. Ramil Həsənzadə (k), 4. Elvin Quliyev, 5. Asif Zeynalov, 6. Anar Ağayev, 13. Ağatahir Əzimov.
Baş məşqçi: Rəfael Adbulov.
Marafon: 12. Kəsra Mehdipur, 10. Seymur Məmmədov, 7. İlkin Hacıyev, 9. Omid Talebi, 13. Məcid Moravati; 2. Kamran Hacıyev, 8. Renat Sultanov (k), 11. Vasili Jarikov, 20. Sergey Çumakov, 4. İbrahim Zeynalov, 22. Tofik Əliyev, 77. Vyaçeslav Tservo, 99. Rüstəm Bağırzadə.
Baş məşqçi: Elşad Quliyev.
Qol: O.Talebi, 10.
Vərəqələr: R.Fərəczadə, 1. S.Çumakov, 1. F.Əliyev, 32 – sarı.
Hakimlər: Elçin Səmədli, Ramil Namazov, Kənan Məlikov.
Hakim-inspektor: Şahin Cəfərov.
14 fevral. Bakı İdman Sarayı.
1. Araz 13 12 1 0 82-14 37
2. Marafon 13 10 0 3 46-23 30
3. Ekol 13 7 1 5 42-35 22
4. FK.İD 13 4 3 6 43-43 15
5. Neftçi 12 4 3 5 33-34 15
6. Yasamal 12 2 0 10 32-81 6
7. Xəmsə 12 0 2 10 29-77 2
Bombardir: Renat Sultanov (Marafon) – 16.
MİRAĞA