Qadınlar arasında Millətlər Liqası, C divizionu
3-cü qrup
Azərbaycan – Farer adaları 1:0 (0:0)
Azərbaycan: 1. Aytac Şərifova (22. Nərgiz Əliyeva, 88), 3. Jalə Məhsimova (23. Yeliz Acar, 78), 4. Nigar Mirzəliyeva, 5. Ayşən Əhmədova, 20. Pəritan Bozdağ (17. Fidan Cəfərova, 88), 18. Alina Dorofeyeva, 2. Diana Məmmədova (21. Aysun Əliyeva, 78), 9. Sevinc Cəfərzadə (k), 10. Kristina Bakarandze, 13. Nərgiz Hacıyeva (11. Vüsalə Seyfəddinova, 67), 6. Əsra Manya.
Ehtiyat oyunçular: 12. Günay İsmayılova, 8. Firəngiz Teymurova, 14. Coşqunə Əliyeva, 15. Kamilla Məmmədova, 16. Milana Rəhimova, 18. Sona Rəhimova.
Farer adaları: 1. Oluva Yohensen, 13. Yensa Kannuberq, 20. Sara Lamage, 3. Birita Rayan (k), 15. Torunn Yohensen, 2. Malena Olsen, 5. Sunniva Dal Kristiansen, 8. Eydvor Klakşteyn, 6. Heydi Sevdal (9. Rebekka Benbakura, 73), 21. Runa Yakobsen (11. Fridrikka Klemensen, 62), 14. Mona Rasmusdottir.
Ehtiyat oyunçular: 23. Valborq Ostero, 4. Asa Karlsen, 17. Tora Mor, 18. Maria Yohansen, 22. Marqit Maqnusdottir.
Qol: N.Mirzəliyeva, 68.
Hakimlər: LOVİSA YOHANSSON, Cilan Tayer, Tild Larsson, Maral Mirzai Beni (hamısı İsveç).
5 dekabr. Bakı. “Dalğa Arena”. 100 tamaşaçı.
Birinci hissəyə 1, ikinci hissəyə 3 dəqiqə əlavə olunub.

9 (4) qapıya (“çərçivə”yə) zərbə 2 (0)
5 künc zərbəsi 1
8 ofsayd 0
2 qayda pozuntusu 6

Yığma ötən oyundakı qələbə ilə qrup birinciliyini təmin etmişdisə, Farer adalarının sonuncu olması da rəsmiləşmişdi. Qadınların tarixi uğura imza atması da azarkeşlərin stadiona gəlişinə təkan vermədi. “Dalğa Arena”da yalnız “Göyqurdlar”ın yer aldığı tribunada fanatları görmək olurdu. Onların da sayı heç 100-ü ötməzdi.

Gözlənildiyi kimi, oyun komandamızın üstünlüyü şəraitində başladı. Futbolçularımız ilk dəqiqələrdən qol axtarışında idi. Oyunun ilk yarımsaatı, demək olar ki, meydanın Farer adalarına aid hissəsində keçdi. İrəlidə Cəfərzadə ilə Bakarandzenin fəallığı özünü göstərirdi. Rəqib qapıçı və müdafiəçilər də tez-tez özünü itirib topu bizə qaytarırdı. Bunların birində Cəfərzadə qolkiperlə üz-üzə qalsa da, zərbəsi qapının üstündən keçdi. İlk yarıda ən real qol vəziyyəti isə 41-ci dəqiqədə yaşandı. Hacıyevanın cinah asmasını Mirzəliyeva başla tamamlasa da, top qapı tirinə tuş gəldi.
İkinci yarı da eyni ssenari ilə keçdi. Millimiz hücumda, rəqibsə müdafiədə olan tərəf idi. Bizimkilər qol istəyinə 68-ci dəqiqədə çatdı. Cəfərzadənin kornerdən ötürdüyü top Əhmədovaya dəyib Mirzəliyevanın önünə düşdü. Nigar dəqiq zərbə ilə hesabı açdı – 1:0. Qoldan sonra tərəflərin səyinə baxmayaraq, hesab dəyişmədi.

Beləliklə, Siyasət Əsgərovun komandası Millətlər Liqasında mövsümü qələbə ilə bitirərək qrup birincisi oldu və B divizionuna yüksəldi. Bu qrupun digər oyununda Monteneqro evdə Cənubi Kiprə qalib gəlib – 2:0.

1. Azərbaycan 6 5 1 0 9-2 16
2. Monteneqro 6 4 0 2 14-4 12
3. C.Kipr 6 2 1 3 3-6 7
4. Farer ad. 6 0 0 6 1-15 0

İSMAYIL XEYRULLAYEV