Kaprara keçmişlə bağlı danışmaq istəmədi
Qadın voleybolçulardan ibarət yığmamızın italiyalı sabiq baş məqşçisi Covanni Kaprara ilə ölkəmizdə işlədiyi dövr haqda danışmaq istədik.
Əslində 61 yaşlı mütəxəssis keçmiş barədə danışmağı xoşlamadığını desə də, qısaca fikirlərini bildirdi:
“Keçmişdən danışmağı sevən biri deyiləm. İnanın ki, hətta mənə Rusiyada, İtaliyada, Niderlandda işlədiyim dönəmdən sual versəz belə, cavablamaq istəməyəcəm. Azərbaycan voleybolunu izləmirəm. Sadəcə, bunu deyə bilərəm ki, sizin yığmanın oyunçuları ilə bağlı yaxşı xatirələrim var. Həqiqətən də ölkənizdə işləmək gözəl idi. Millinizlə uğursuz çıxış etdiyimizi deyə bilmərəm. Faiq Qarayevi də məmnuniyyətlə xatırlayıram. Amma artıq bunlara əhəmiyyət vermirəm”.
Qeyd edək ki, 2019-cu ilin mayında yığmanın başına gətirilən Kaprara həmin ilin noyabrında müqaviləsinin bitməsindən sonra komandanı tərk etmişdi. Millimiz onun rəhbərliyi altında 3 rəsmi turnirdə iştirak edib. Qızıl Avropa Liqasında 6 məğlubiyyət alan əcnəbi məşqçi Olimpiya Lisenziyalı Tunirdə 3 oyuna cəmi 1 qələbə sevinci yaşayıb. Onun son sınağı isə Avropa çempionatına təsadüf edib. Belə ki, qızlarımız bu yarışın qrup mərhələsində 5 görüşün 4-də qələbə qazanıb, 1-də uduzaraq 1/8 finala yüksəlib. Amma bu mərhələdə Bolqarıstan səddi keçilməz olub. Bir sözlə, millimiz Kapraranın rəhbərliyi altında keçirdiyi 15 matçda 5 qələbə qazanıbsa, 10 məğlubiyyətə üzülüb.
CAVİD
Digər xəbərlər
