Yığma seçmə mərhələnin son oyununda uduzmaqla imicinə növbəti zərbəni vurdu, De Byazi istefa verdi, ölkədə yeni narazılıq dalğası baş qaldırdı.

Artıq yalnız futbol camiəsi yox, digər sahələrin nümayəndələri də ölkənin əsas komandasının rüsvayçı çıxışından təngə gəlib. AJB və AYB üzvü, hüquqşünas, Milli Cəbhə Partiyasının sədr müavini Vüqar Dadaşov yığmanın son nəticələrindən sonra AFFA rəhbərliyində köklü dəyişikliklərin vacibliyini qeyd edir.

- AFFA-nın strukturunun və rəhbər heyətinin dəyişdirilməsinin vacibliyini vurğulamısız. Belə köklü dəyişiklikdən problem doğmaz?
- Etiraf edək ki, Azərbaycan futbolun problemi elə AFFA-nın yarıtmaz fəaliyyəti ilə bağlıdı. Dövlət daxilində özü də bir dövlət kimi fəaliyyət göstərən AFFA-nın nüfuzu, onun bir çox məsul vəzifəli şəxsləri ilə bağlı qalmaqallar, əlbəttə, bu təşkilatın fəaliyyətinin uğurlu nəticəsinə mənfi təsir edən əsas şərtlərdəndi. Rəsmi məlumata görə AFFA-nın prezidentinin neçə-neçə vitse-prezidenti, müavini, köməkçisi, köməkçisinin köməkçisi, köməkçisinin müavini və sair var. Üstəlik AFFA-nın hələ 7 departamenti də var. Əlbəttə, bu böyük təşkilatın rəhbərlərinin vəzifədə müddətsiz qalması, təbii ki, oturulmuş sxem yaradıb və “əvəzedilməzlik” hissi məsuliyyətsizliyə əsas verməklə cəzasızlıq da hegemonluq doğurub. Digər vacib bir məsələ də budu ki, AFFA bir qrup şəxsin sırf kommersiya təşkilatı kimi fəaliyyət göstərir və hətta futbolla bağlı digər kommersiya xidmətləri məhz həmin rəhbərliyə bağlı şirkətlər tərəfindən biznes layihəsi kimi həyata keçirilir. Heç kim inkar etməz ki, ölkə futbolu ilə bağlı kommersiya xidmətləri konkret inhisardadı. Əlbəttə, korrupsiya ilə bağlı müəyyən məlumatlar, sövdələşmələr haqda xəbərlərə də rast gəlmişik. AFFA-da seçki qəbul etdiyi Nizamnaməyə uyğun həyata keçirilir. Qurumun fəaliyyəti, iş mexanizmi isə təsdiqlənmiş Əsasnamə üzrə aparılır. Heç şübhəsiz, bu prosedur qaydalarına əməl olunsa da, formal xarakter daşıması mübahisə doğurmur. Belə olmasaydı, bir nəfərin hanslsa vəzifədə “müddətsiz” qalması necə mümkün olardı?! AFFA strukturunda və rəhbər heyətində dəyişikliklər zərurətdi, bu dəyişiliklər qısa zaman daxilində qurumun fəaliyyətində ləngimələrə səbəb olsa da, son nəticə Azərbaycanda futbolun, komanda oyununun inkişafına müsbət təsir edəcək.

- Yığmamıza ancaq milli ruhlu yerli məşqçilərin rəhbərlik etməli olduğunu deyirsiz.
- Əlbəttə, indiki vəziyyətdə mövcud imkan, oyunçu və məşqçi potensialından istifadə etməklə yığmadan qaneedici nəticələri gözləmək düzgün olmazdı. AFFA yenidən formalaşmalı, ölkədə futbolun ümumi inkişaf planı hazırlanmalı və təsdiq edilməlidi. Düzdü, qeyd etdiyim kimi, bu işin sabit və uğurlu nəticə verməsi üçün illər tələb olunur, ancaq başqa yol da yoxdu. Düşüncəmə görə, milli ruhlu baş məşqçinin rəhbərliyə gətirilməsi təkcə gəlir, əmək fəaliyyəti kimi deyil, milli qürur hissinə bağlılığı ilə adamın məsuliyyətini artıran şərtdi. Hesab edirəm ki, AFFA strukturunda müsbət dəyişikliklər aparılandan sonra yerli məşqçi ilə perspektivdə uğurlu nəticə, ümumən isə ölkədə futbolun inkişafı ilə bağlı imkan və şərait qazana bilərik.

- Bizdən daha üstün futbola və mütəxəssislərə sahib olan dost Türkiyə yenə əcnəbi mütəxəssisə ehtiyac duydu. Hazırda italiyalı Vinçenso Montella “ay-ulduzlular”a rəhbərlik edir. Yəni məşqçinin yerli ya əcnəbi olmasının nə fərqi var?
- Məncə, buna əvvəlki suallar daxilində cavab verdim. Əlavə edim ki, Azərbaycan futbolundakı problem məhz AFFA-nın özündədi, struktur, idarəçilik, şəffaflıq, məsuliyyət və hesabat məsələsindədi. AFFA-nın fəaliyyətinə nəzarət edən yoxdu və ya kağız üzərindədi. Təsəvvür edin, AFFA ilə necə deyərlər, əməkdaşlıq edən, “ictimai nəzarət” kimi ümid etdiyimiz ictimai birliklər AFFA-nın “əlçalanları”, bəlkə də “dəstək qrupları”dı. Problem böyük və dərindi, AFFA-nın fəaliyyəti şəffaf, məsuliyyətli və sözün əsl mənasında hesabat xarakterli olsaydı, biz heç milli komandamızın baş məşqçi postuna gələnin milli mənsubiyyətini müzakirə etməzdik.

ABDULLA İSMAYILOĞLU