Dünən Dərnəgül Voleybol Mərkəzində qadınlar arasında ölkə çempionatının 3-cü turunun oyunları keçirildi. İlk görüş daha böyük maraqla gözlənilirdi. Çünki proqnozlara əsasən çempionluq uğrunda “Azərreyl” və “Abşeron” mübarizə aparacaq. Hər halda, bu komandalarda daha təcrübəli voleybolçular cəmləşib. Ancaq Eldar Yusubovun yetirmələri yalnız ilk setdə özünü göstərə bildi. Sonrakı setlərdə daha güclü hücumçulara malik Famil Ağayevin komandası sevinən tərəf oldu və ilk dövrəni məğlubiyyətsiz başa vurdu. Növbəti qarşılaşmanın nəticəsini isə sürpriz kimi dəyərləndirə bilərik. Debütant “Loko”ya heç bir şans tanımadı.
Abşeron – Azərreyl 1:3 (26:24, 12:25, 15:25, 19:25), Lokomotiv – AVF 0:3 (12:25, 19:25, 14:25)
1. Azərreyl 3 3 0 9-1 9
2. Abşeron 3 2 1 7-3 6
3. AVF 3 1 2 3-6 3
4. Lokomotiv 3 0 3 0-9 0
4-cü turun oyunları fevralın 9-da keçiriləcək: 15.00 AVF – Azərreyl, 17.00 Abşeron – Lokomotiv.

Reaksiyalar
Eldar Yusubov, “Abşeron”un baş məşqçisi: “Oyuna yaxşı başlasaq da, sonra oyunumuzda müəyyən problemlər üzə çıxmağa başladı. “Azərreyl”in ehtiyat oyunçular skamyası daha genişdi. Komandanın oturuşmağına vaxt lazımdı. Məncə, bir-iki turdan sonra daha yaxşı formada olacağıq”.
Famil Ağayev, “Azərreyl”in baş məşqçisi: “Hücum xəttimiz məni çox sevindirir. Yekaterina Jidkova ilə Anna Dovqopolyuk çox məhsuldar oyun nümayiş etdirir. Viktoriya Dedkova da yavaş-yavaş formaya düşmək üzrədi”.
Adnan Kistak, AVF-in baş məşqçisi: "Üçüncü oyunumuzu keçirdik. Təbii ki, hələ də tam oturuşmuş komanda deyilik. Ancaq oyundan-oyuna güclənirik və daha yaxşı oynayırıq. Hədəfimiz həm çempionatda yüksək yerlərdən birini tutmaq, həm də gənc oyunçulara təcrübə və güc qazandırıb, onları yığma üçün tam hazırlamaqdı".