“Ağ-qaralar”ın qış hazırlığı: 6 məğlubiyyət və 2-17
Bu gün vətənə qayıdacaq “Neftçi” yanvarın 17-də üz tutduğu Antalyanı ənənəvi məğlubiyyətlə tərk etdi. Buna qədər yanvarın 14-də “Keşlə”yə (1:2), sonra “SKA-Xabarovsk”a (1:8), “Konkordiya”ya (0:1), “Slaviya”ya (0:1) və “Krılya Sovetov”a (0:2) uduzan bakılılar srağagün Makedoniya təmsilçisi “Sileks”in qarşısında “dizlərini yerə atdı” – 0:3. 6 oyunun yekunundakı göstərici faciəvidi. “Ağ-qaralar” rəqib qapılarından cəmi 2 top keçirə bilib. Əvəzində öz qapılarından 17 top buraxıblar.
Əslində sonuncu məğlubiyyət hardasa başadüşüləndi. 6 futbolçu – Rəşad Əzizli, Məhəmməd Mirzəbəyov, Ruslan Abışov, Emin Mahmudov, Rəhman Hacıyev, Anton Krivotsyuk millinin düşərgəsindəydi deyə Tərlan Əhmədovun sərəncamında cəmi 15 futbolçu qalmışdı. Onlardan ikisi isə yeni transferlər idi. “Neftçi” heyətdəki təcrübəli futbolçuların hesabına makedoniyalılar qarşısında cəmi 35 dəqiqə tab gətirə bilib. Başla fərqlənən rəqib futbolçunun ardından 39-cu dəqiqədə “Sileks” hesab arasındakı fərqi artırıb. İkinci yarının gedişində isə darmadağın rəsmiləşib.
Səlahət Ağayevin qapıda dayandığı, Lukas Qomeslə Mayk Kampasın ikinci 45 dəqiqədə meydanda olduğu qarşılaşmada Tərlan Əhmədov start heyətində bu futbolçulara güvənib: Səlahət Ağayev, Fərid Abbaslı, Kiril Petrov, Elvin Sərkərov, İlkin Qırtımov, Rəşad Sadiqov (k), Derlis Meza Kolli, İqnasio Errera, Namiq Ələsgərov, Fransisko Qarsiya, Mirabdulla Abbasov.
İkigünlük fasilədən sonra komanda üzləri fevralın 3-də Bakıda yenidən bir araya gəlib, “Kəpəz”lə oyunun son hazırlıqlarını davam etdirəcək.
HƏBİB, Bələk