“Bu seminar AFFA rəhbərliyinin təşəbbüsü ilə keçirilir. Klublar Komitəsi platformasında bu məsələ müzakirə olunurdu. Son 3-4 ayda qərara gəldik ki, AFFA belə bir seminarı UEFA ilə keçirsin. Müxtəlif modullar üzərində danışıqlar apardıq. Üç modul üzərində dayandıq. Bildiyiniz kimi, birinci modul artıq iki gündü paytaxtımızda keçirilirdi və dünən başa çatdı. Bakı modulunda idarəçilik, yəni futbolun təşkili, idarəetmə strukturu, qaydaların tənzimlənməsi müzakirə olundu. Həmçinin liderlik, yəni liderlik üslubları, qərarvermə və problemin həlli bacarıqları, dəyişkən və yüksək stressli mühitdə idarəçilikdən söhbət açıldı. Bundan başqa, marketinq - brendin yaradılması və inkişaf etdirilməsi, sponsorluq, azarkeşlərin cəlb edilməsi, rəqəmsal marketinq müzakirə olundu. Biz də üzləşdiyimiz bəzi məsələlərlə bağlı UEFA-dan dəvət olunan üç mütəxəssisə məlumat verdik. Onlar öz tövsiyələrini verdilər. Seminarda AFFA və PFL-dən sırf klublarla işləyən nümayəndələr iştirak edirdi. PFL və AFFA əməkdaşı klublarla sıx əlaqədədirsə, deməli, onların gündəlik üzləşdiyi nüanslarla daha yaxından tanışdılar. Klubların bu məsələyə öz baxışı varsa, PFL və biz də məsələyə öz prizmamızdan yanaşırıq. Yəni çox maraqlı fikir mübadiləsi oldu. Bir məsələyə üç tərəfdən baxış gələcəkdə məsələlərin həllinə, yaxud da daha yaxşı təcrübənin qazanılmasına yol açır. Şükürlər olsun, premyer-liqada mübarizə aparan 10 klubun hər birindən bu seminarda iştirak edən nümayəndələr var. Klublardan müxtəlif vəzifəli şəxslər – klub prezidenti, icraçı direkor, akademiyaya cavabdeh olan şəxslər seminarda iştirak edir. Onlar bu seminardan özləri üçün də faydalana bilərlər. İkinci modul dekabrın əvvələrində Almaniyanın Frankfurt şəhərində keçiriləcək. Bunu həmin şəhəri təmsil edən “Ayntraxt”ın bazasında təşkil etməyi planlayırıq. Orda klubun infrastrukturu, akademiyanın yaradılması ilə yaxından tanış olmaq mümkündü. Və müxtəlif proqramlara da baxacağıq. Həmçinin də bir bundesliqa matçını izləməyi planlayırıq. Bu, sırf futbol modulu olacaq. Üçüncü modulu isə gələn ilin yanvar və ya fevral ayında Bakıda keçirməyi nəzərdə tuturuq".