Yunis Hüseynov: “Meydanda bildim ki, rəqibimiz polşalılardı”
“Neftçi” kimi “Kəpəz” də Antalyadakı ikihəftəlik təlim-məşq toplanışını başa vurdu. Dünən sonuncu oyununu keçirən gəncəlilər bu gün Bakıya ayaq basacaq. Sonuncu oyun demişkən, “sarı-göylər”in budəfəki rəqibi Subotiça “Spartak”ı idi. “Vitorul”la heç-heçədən (1:1), “Daejeon Sitizen” üzərindəki qələbən (1:0) sonra “Yagelloniya”ya biabırçı hesabla (1:8) uduzan qərblilərin psixoloji durumu maraq doğururdu.
Yunis Hüseynov yetirmələrinə polşalılara acı yenilgini unutdura bilmişdi. Bunun nəticəsidi ki, artıq ilk hissədə hesab açıldı. İlkin Sadıqov rəqib qapısına yol tapmaqla Antalya toplanışında ikinci qolunu vurdu. İkinci hissənin gedişində isə Dario Federiko hesab arasındakı fərqi artırıb, oyunda son nöqtəni qoydu. Bu isə o deməkdi ki, “Kəpəz” Bakıya qələbəylə qayıdır. Antalya toplanışının ümumi göstəricisi isə belədi: 2 qələbə, 1 heç-heçə, 1 məğlubiyyət.
Qarşılaşma başa çatandan sonra jurnalistlərin əhatəsinə düşən Yunis Hüseynov sualları cavabladı. Təcrübəli mütəxəssisin verdiyi açıqlamalar xeyli gülüşə səbəb oldu.
- Oyunla bağlı nə deyə bilərsiz?
- Açığı, qələbə mənim üçün o qədər də önəmli deyil. Amma qalib gəlməyin də öz yeri var. Qalib gəlmək futbolçuların psixoloji durumuna da yaxşı təsir edir. Mənim üçün əsas məsələ komandanın düzgün oynamasıdı. İlk hissədə komandamın çıxışı 70-80 faiz xoşuma gəldi. Fasilədən sonra 50-60 faizə düşdü. Rəqib ikinci hissədə daha üstün oynadı və təzyiqi artırdı. Nöqsanlar hələ də qalsa da, ümumilikdə oyundan razı qaldım.
- Düzdü, “Kəpəz” 2 qol vurdu. Amma təhlükəli vəziyyətlər elə də çox deyildi.
- Özünüz də bilirsiz ki, komandamız yeni yığılıb. 11 oyunçunun iki-üçü eyni vaxtda oynayıb, qalanları yeni qoşulublar. Bu heyətlə cəmi 4 oyuna çıxmışıq. Ona görə də xətlərarası əlaqə zəifdi, çatışmazlıqlar görünür. İlk yarıda imkanlarımız daha çox idi. İstəyimizə çatmağa təcrübəsizlik mane oldu. Zamanla düzələcək.
- Hücumçu axtarışı nə yerdədi?
- Hələ də axtarırıq. Bu gün son cavabı deməlidilər. Bəli, ən zəif yerimiz hücum xəttidi. Digər mövqelərdən rahatam, rəqabət var.
- “Yagelloniya”ya məğlubiyyətdən sonra komanda üzvlərinin psixoloji durumu nə yerdə idi?
- Açığı, mən həmin oyunda səhv elədim. Elə bilirdim bugünkü komanda ilə oynayırıq. Futbolçulara da yükləmə vermişdim. Meydanda bildim ki, rəqibimiz polşalılardı. Bunları deməklə bəhanə axtarmıram. Uşaq səhvlərindən qollar buraxmışdıq. Həmin nəticəyə görə futbolçularla iclas keçirdik. Özlərinə de dedim ki, bu cür hesabla uduzmaq yolverilməzdi.
- İkinci yarının ilk oyununda rəqibiniz “Neftçi” olacaq. Azarkeşlərə sözünüz var?
- Bilsinlər ki, meydanda əzmkar, mübariz komanda görəcəklər. Meydanda əvvəldən sona qədər mübarizə aparan, rəqibə çətin anlar yaşadan komanda izləyəcəklər.
- “Neftçi” keçirdiyi 6 yoldaşlıq görüşünün hamısında məğlub oldu. Bu sizə qəribə gəlmir?
- Bu dəqiqə hazırlıq dövrüdü. Nəticə o qədər önəmli deyil. Yadınıza gəlirsə, “Qarabağ” Çempionlar Liqasının qrup mərhələsinə vəsiqə qazanmamış Antalyadakı bütün oyunlarında uduzmuşdu. Amma sonra layiqli nəticələrlə azarkeşləri sevindirə bildi. Ona görə də komandaların gücünü burdakı oyunların nəticələrinə əsasən müəyyənləşdirmək olmur.
Bu arada təlim-məşq toplanışında olan “Kəpəz”in əsas komandasının üzvləri üçün hakimlər tərəfindən seminar keçirilib. Seminarda eyni məqsədlə Türkiyədə olan ədalət təmsilçilərindən baş hakim İnqilab Məmmədov və yan xətt hakimi Mübariz Haşımov iştirak edib. Onlar oyun qaydaları barədə ətraflı məlumatlar verərək, iştirakçıları maraqlandıran sualları cavablayrıblar. Mübahisə doğuran müxtəlif oyun epizodları ilə bağlı müzakirələr aparılıb.
Qeyd edək ki, məlum seminarın bütün premyer-liqa təmsilçiləri üçün keçirilməsi nəzərdə tutulub.
HƏBİB, Bələk