Yoldaşlıq oyunu
235. Azərbaycan – Moldova
Antalya. “Mardan” stadionu. Saat 20.00
Bu gün azərbaycanlı futbol azarkeşləri üçün önəmli gündü. Belə ki, uzun müddət hər kəsin gözlədiyi məqam yetişdi. Yığma Qurban Qurbanovun rəhbərliyi altında ilk oyununu keçirəcək. 45 yaşlı mütəxəssisin millidə baş məşqçi kimi debütü böyük maraq doğurur. Qeyd edək ki, əsas komanda yoldaşlıq görüşündə Moldova ilə qarşılaşacaq. Antalyanın “Mardan” stadionunda baş tutacaq matç Bakı vaxtı ilə saat 20.00-da start götürəcək və “CBC Sport”da canlı yayınlayacaq. Onu da bildirək ki, son matçını ötən il oktyabrın 8-də səfərdə Almaniyaya qarşı keçirən milli 114 gündən sonra növbəti sınağına çıxır. Bundan başqa, yığma 10 aydan sonra yoldaşlıq matçında qüvvəsini sınayacaq. Sonuncu dəfə ötən il martın 9-da Dohada Qətəri 2:1 yenmişdik.
Yenilər qarşı-qarşıya
Yuxarıda vurğuladığımız kimi, Qurbanovun yığmadakı debütü səbirsizliklə gözlənilir. Çünki onun bu komandanı uğura daşıyacağına inam böyükdü. Hər kəs “Qarabağ”dakı uğurların millidə də təkrlanacağına inanır. Bu mənada ilk addım məhz bu gün atılacaq. Təbii, Qurbanovun da debütdə qələbə qazanmaq istəyəcəyi birmənalıdı. Hər nə qədər yoldaşlıq matçı olsa belə, mütəxəssis debütdə üzülmək istəməz. Elə futbolçuların da əlindən gələni edəcəyi şübhə doğurmur. Əcnəbi mütəxəssislərin çalışdırdığı komandadan fərqli, bu yığmanı azarkeşlər özünə daha yaxın hiss edir. Odu ki, Qurbanovun ilk “əl işi”nin yaxşı alınmasını hər kəs arzulayır. Yığmanın ən yaxşı bombardiri olan Qurbanov bu komandanın ən uğurlu baş məşqçisi olmaq yolunda ilk addımını atacaq. Düzdü, mütəxəssis ilk sınağında ideal heyətlə oynamaq imkanından məhrumdu. Çünki ölkə xaricində çıxış edən futbolçular bu görüşdə iştirak edə bilmir. Yalnız Pavel Paşayev istisnadı. Səbəb isə matçın FİFA-nın “pəncərə”sinə düşməməsidi. Bununla belə, rəqibin də təxminən eyni durumda olduğunu söyləməliyik. Milli həm də 2018-ə müsbət nəticə ilə başlamaq niyyətindədi. Maraqlı məqam rəqib baş məşqçinin də yenicə bu posta təyin olunmasıdı. Ancaq Aleksandr Spiridon artıq “siftə edib”. Onun rəhbərliyi altında Moldova yanvarın 27-də Cənubi Koreyaya yoldaşlıq oyununda uduzub (0:1). Ümid edək ki, Qurbanov həmkarından fərqli, debütdə məyus olmayacaq.
Moldovalılarla 10-cu duel
Moldova ilə oyun tərəflər arasında 10-cu dueldi. Bununla da Moldova ən çox qarşılaşdığımız rəqiblərdən biri olacaq. Milli indiyədək yalnız Özbəkistanla 10 dəfə üz-üzə gəlib. Moldova bu baxımdan asiyalılara çatacaq. Qeyd edək ki, moldovalılarla ilk duel 1994-cü ildə baş tutub. Həmin vaxt 2:1 hesabı ilə qalib gələn rəqib ümumi üstünlüyə də malikdi. Moldova indiyədək 3 dəfə qalib gəlibsə, yığma 2 dəfə rəqibindən güclü olub. Qalan 4 qarşılaşmada qalib müəyyənləşməyib. Bu oyunlarda 6 top vuran komandamız öz qapısından 8-ni buraxıb. Bu qarşılaşmalardan 7-si yoxlama, 2-si seçmə xarakteri daşıyıb. Yoldaşlıq görüşlərində hər komanda 2 dəfə sevinibsə, 3 dəfə bərabərlik yaşanıb. DÇ-2002-nin seçmə matçlarında isə rəqib üstün olub – 0:0, 0:2. 4 dəfə Bakıda, 4 dəfə Kişinyovda qarşılaşan rəqiblərin son dueli də paytaxtımızda baş tutub. 2015-ci ilin noyabrında yığma 2:1 hesablı qələbə qazanmışdı. Moldova ilə indiyədək yalnız bir dəfə neytral meydanda görüşmüşük. 8 il öncə Avstriyadakı dueldə qalib müəyyənləşməmişdi (1:1).
Qurbanovun cəzalandırdığı tanış rəqib
Bugünkü matç Qurbanov üçün ilklə əlamətdar olmaqla yanaşı, rəqib ona tanışdı. Belə ki, yığmanın çalışdırıcısı hələ futbolçu olarkən moldovalılarla üz-üzə gəlib. O iki oyunda bu rəqibə qarşı forma geymək imkanı qazanıb. 1998-ci ildə Bakıdakı görüşdə milli 1:0 hesabı ilə qələbə qazanıb. 2004-cü ildə Kişinyovdakı qarşılaşmada hesabı məhz Qurbanov açıb. Amma yığma daha sonra iki top buraxaraq vətənə məğlub qayıdıb. Qurbanov 14 ildən sonra yeni statusda moldovalılarla görüşəcək
Yanvar uğursuzluğu
Qurbanov daha bir ilkə imza ata bilər. Belə ki, buna qədər yığma tarixi ərzində iki dəfə yanvarda meydana çıxıb. Hər iki görüşdə rəqib Trinidad və Tobaqo olub. O vaxt Karlos Alberto Torresin baş məşqçisi olduğu milli hər iki qarşılaşmada meydanı məğlub tərk edib. Yanvarın 21-də Trinidad və Tobaqoya 1, iki gün sonra isə 2 cavabsız qolla məğlub olmuşuq. Yığma 13 il sonra yenidən yanvarda meydana çıxacaq. Təmsilçimiz 3-cü cəhdində uğursuz statistikaya son qoysa, ilin ilk ayında ilk dəfə qələbə qazanacaq. Elə heç-heçə və ya vurulan qol da bu mənada yenilik anlamına gəlir.
Antalya Qurbanova düşərli olacaq?
Tarixində 3-cü dəfə Antalyada oyun keçirəcək yığmanın ilk belə matçı 2008-ə təsadüf edib. Fevralın 3-də keçirilən oyunda rəqib Qazaxıstan olub. Həmin qarşılaşma "sülh"lə yekunlaşıb. 8 ildən sonra yığmanın yolu yenidən Antalyaya düşdü. 2016-cı il martın 26-da keçirilən matçda rəqib yenə Qazaxıstan idi. Komandamız bu dəfə də meydanı qolsuz tərk etdi. Amma Qazaxıstan minimalhesablı qələbəyə (1:0) sevindi. Bir sözlə, Antalyada nəinki qələbəyə, hətta qola da həsrət qalan yığma bu gün Moldova ilə qarşılaşmada uğursuz ənənəni qırmağa çalışacaq.
Heyətlər
Sonda isə hər iki komandanın bu oyunda iştirakı gözlənilən heyətini diqqətinizə çatdıraq.
Azərbaycan: qapıçılar - Kamran Ağayev (Keşlə), Şahruddin Məhəmmədəliyev (Qarabağ), Rəşad Əzizli (Neftçi); müdafiəçilər - Maksim Medvedev, Elvin Yunuszadə, Abbas Hüseynov (hamısı “Qarabağ”), Ruslan Abışov, Məhəmməd Mirzəbəyov, Anton Krivotsyuk (hamısı “Neftçi”), Təmkin Xəlilzadə (Qəbələ), Bəhlul Mustafazadə (Sumqayıt), Pavel Paşayev (“Aleksandriya”, Ukrayna); yarımmüdafiəçilər - Qara Qarayev, Əfran İsmayılov, Rahid Əmirquliyev, Coşqun Diniyev, Riçard Almeyda (hamısı “Qarabağ”), Rəhman Hacıyev, Emin Mahmudov (hər ikisi “Neftçi”), Cavid Hüseynov (Qəbələ), Cavid İmamverdiyev (Sumqayıt); hücumçular -Mahir Mədətov, Ramil Şeydayev (hər ikisi “Qarabağ”), Ruslan Qurbanov (Qəbələ).
Moldova: qapıçılar - Nikolay Kalança ("KSU Krayova", Rumıniya), Sergey Paşenko (Şerif), İlya Çebanu (klubsuz); müdafiəçilər - Radu Roqak ("Dinamo", Özbəkistan), Patru Raku, Vyaçeslav Posmak, Artyom Rozqonyuk (hamısı "Şerif"), Dinu Qraur (Milsami), Andrey Makritski, Valeri Makritski (hər ikisi "Petrokub"), İon Jardan (klubsuz); yarımmüdafiəçilər - Aleksandr Paşenko ("Kızıl-Jar", Qazaxıstan), Aleksandr Antonyuk, Andrey Kojokar, Aleksandr Dedov (hamısı "Milsami"), Maksim Mixaylov (Zarya), Vadim Pairel (Şerif), Sergey Pletike (Sperantsa), Dan Taras (Petrokub), Danu Spetaru, Vladislav İvanov (hər ikisi klubsuz); hücumçular - Vladimir Ambros (Petrokub), Vitali Damaşkan (Şerif).
FARİZ