Futzal yığmamız Avropa çempionatına hazırlığı davam etdirir. Joze Alesio da Silvanın yetirmələri dünən iki məşqlə kifayətlənib. Bu gün də həmçinin iki məşq nəzərdə tutulub. Baxmayaraq ki, komanda artıq sabah Sloveniyaya yollanır. Joze Alesio turnirdə ilk oyunun fevralın 2-də baş tutacağını nəzərə alıb, hələ ki yükləməni azaltmaq istəmir.
Artıq ölkəmizi AÇ-nin final mərhələsində təmsil edəcək futzalçıların tam siyahısı bəllidi. Braziliyalı mütəxəssis toplanışda iştirak edən 16 nəfərdən 14-nü səfərə aparır. “Araz”ın 2-ci, yığmanın 3-cü qapıçısı olan Anar Məmmədovla FK.İD-in oyunçusu Nihat İsmaylov siyahıdan kənarda qalıb. Beləliklə, yanvarın 30-da start götürüb fevarlın 10-dək davam edəcək Avropa çempionatının final mərhələsində iştirak edəcək futzalçılar bunlardı:
1. Rövşən Hüseynli - Araz
2. Rizvan Fərzəliyev - Araz
3. Eduardo Mello Borges - Araz
4. Everton Kardoso (Qallo)- Araz
5. Ramiz Çovdarov - Araz
6. Tyaqo Teles Martins - Araz
7. İsa Atayev - Araz
8. Xətai Bağırov - Araz
9. Samir Həmzəyev - Ekol
10. Emin Kürdov - Ekol
11. Namiq Məmmədkərimov - Ekol
12. Villiams Oliveyra do Nasimento (Vassura) – “Əl Dafra”, BƏƏ
13. Fineo de Araujo – “Agleymina Hamamatsu”, Yaponiya
14. Vitali Borisov – “Ekonomaç”, Serbiya
Komandanın səfər planları da bəllidi. Milli Sloveniyaya yanvarın 28-i, saat 14.30-da yola düşəcək. Bakı – İstanbul - Lyublyana reysi ilə hərəkət edəcək komandada 21 nəfər yer alacaq ki, bunlardan 14-ü futzalçı heyəti, 7-si isə məşqçi korpusunun üzvləri və texniki işçilər, həmçinin rəhbərlikdən olacaq. Komandamızın final mərhələsi müddətində Lyublyanadakı “Austria Trend Hotel”də qalacağını da qeyd edək. Mənzil başına axşam saatlarında yetişəcək futzalçılarımız sabahı məşqsiz başa vuracaq. Yanvarın 29-da isə yığmamızın baş məşqçisinin, eləcə də bütün iştirakçıların çalışdırıcılarının iştirakı ilə mətbuat konfransı olacaq ki, tədbirin yerli vaxtla saat 15.45-16.45 aralığında keçirilməsi planlaşdırılıb. Buna qədər, konkret səhər saat 10.00-da isə futzalçılarımız final mərhələsinə evsahibliyi edəcək “Arena Stozice” ilə tanış olacaq, zala ayaq basacaqlar. Fransa ilə açılış qarşılaşmasına kimi qalan günlərin məşq cədvəli isə belədi: yanvarın 30-u saat 11.00-da (Peperka), yanvarın 31-i saat 17.00-da (Peperka), fevralın 1-i saat 11.00-da (Arena Stozice).
Bu arada İspaniya millisinin baş məşqçisi Xose Valensio Lopes ölkəsinin mətbuatına açıqlamasında qrupu dəyərləndirib. Avropa çempionatında Fransa və Azərbaycanla eyni qrupda mübarizə aparacaq qitə nəhənginin çalışdırıcısı yığmamızdan çəkindiyini büruzə verib: “Fransa oyunçularının fərdi keyfiyyətlərinə görə çox güclüdü. Təcrübəli futbolçuları var. Ola bilsin ki, yanvarın 31-də qarşılaşacağımız fransızlar taktiki cəhətdən bizim qədər güclü deyil. Azərbaycan yığması isə son dünya çempionatında bizə çətin anlar yaşatdı. Onlar həmin vaxt dünyanın ən yaxşı 8 komandası arasında yer aldılar. Azərbaycanlılar bizə öz oyunumuzu göstərməyə mane olmağa çalışacaqlar. Onların dünya futzalında öz yerləri var”.
MİRAĞA
