“Uşaq və gənclərin fiziki və mənəvi inkişafı” istiqaməti üzrə layihə çərçivəsində yazılarımız davam edir.

Nəzər Cəfərov Azərbaycanın gənc və istedadlı reqbiçilərindən sayılır. Müsahibimiz vətənə təkcə idmançı kimi xidmət etməyib. 44 günlük Vətən Müharibəsinə qatılan qəhrəmanımız doğma torpaqlarımızın düşmən tapdağından azad olunmasında yaxından iştirak edib. Onunla söhbətimiz xeyli maraqlı alındı. Gənc idmançı ona ünvanladığımız sualları təvazökarlıqla cavabladı.

- Nəzər bəy, əvvəlcə səni oxucularımıza daha yaxından tanıtmaq istərdik. Reqbiylə məşğul olmağa necə başladın? Ümumiyyətlə, reqbiyə maraq hardan yarandı? İlk məşqçin və klubun haqda bizə danışardın.
- Reqbidə ilk addımlarımı 2015-ci ildə atmışam. Bu oyunla məşğul olmağa “Qarabağ” Reqbi Klubunda başladım. Reqbiyə marağımın yaranmasında qardaşımın da böyük rolu oldu. O da komandaya yazılmamışdan əvvəl məşqlərə kənardan baxırmış, idmançıların hərəkətlərini maraqla izləyirmiş. Bir gün mənə də təklif etdi. Uşaq idik, heç reqbinin nə olduğunu da düz-əməlli bilmirdik. Amma digər uşaqlar kimi bizim də futbola həvəsimiz var idi, istəyirdik ki, futbolla məşğul olaq. Yəqin ki, həmin yaşda bütün uşaqların həvəsi bu cür olur. Reqbini izlədim, məndə böyük maraq yarandı. Sanki reqbi məni özünə cəlb etdi. Beləcə bu oyunun sehrinə düşdüm, “Qarabağ”ın məşqlərinə qatıldım. Məndə reqbiyə marağın yaranmasına əsas səbəb topun fərqli görünüşü oldu. Baxdım ki, reqbi topu futbol topundan fərqlidi. Bizdə maraq yarandı, məşq edənlərə yaxınlaşdıq. Bizə dedilər ki, məşq keçənlər “Qarabağ” Reqbi Klubudu, istəsək, məşqlərə qoşula bilərik. Beləcə reqbidə ilk addımlarımızı atmağa başladıq. İlk komandamız da elə “Qarabağ” oldu. Müəllimlərimiz Eldar Kərimov və Nizami Mahmudov idi. Onlar bizə yaxşı münasibət göstərirdilər, bizə çox şey öyrədirdilər. İndiyə kimi də onlardan öyrənirik. Mən hər ikisinin qarşısında baş əyirəm, çünki üzərimizdə böyük zəhmətləri var. Bizə təkcə idmanı yox, həyatda necə davranmağı, komandada birlik olmağı öyrədirdilər.



- Azərbaycanda reqbi o qədər də populyar deyil, uşaqlar daha çox fərdi idman növlərinə, yaxud da futbola yönəlir. Reqbiylə məşğul olmaq hansı baxımdan çətin, hansı baxımdan asandı?
- Bəli, ola bilsin, reqbi Azərbaycanda o qədər də populyar deyil. Çünki reqbi bir qədər fərqli idman növüdü. İndi bizdə insanlar daha çox futbola, boksa, güləşə maraq göstərirlər. Reqbi bir növ bütün idman növlərinin qarışığıdı. Reqbidə birlik, komanda oyunu, dirəniş göstərmək vacibdi. Reqbidə hansısa idmançı düşünə bilməz ki, mən təkbaşına mübarizə aparım, rəqibin üstünə gedib uğur qazanım. Bu baxımdan reqbi başqa idman növlərindən tam fərqlənir. Bütün bu fərqlilikləri reqbiylə məşğul olduqca öyrənirsən, öyrəndikcə də reqbini sevirsən. Bəlkə də indi adamlarda reqbiylə bağlı məlumat azdı, ona görə də reqbi onlara bir qədər yad idman növü kimi gəlir. İnşallah, zaman keçdikcə bu da aradan qalxacaq, reqbi daha çox tanınacaq və seviləcək. Biz də bunun üçün əlimizdən gələni edəcəyik. Reqbinin çətin tərəfi odu ki, zədələr olur, əzilmək-zədələnmək ehtimalı var. Futboldan fərqli burda özünəməxsus qaydalar var. Onlara əməl etməsən, zədələnə bilərsən. Asan tərəfi isə odu ki, reqbidə komanda şəklində mübarizə ön plandadı. Mehribançılıq və birlik olur. Hara gediriksə, komanda şəklində gedirik. Həm irəli, həm də geri. Topu qabağa verə bilməzsən. Bir sözlə, xeyli özünəməxsus qaydalar var.



- İndiyə qədər hansı uğurlara imza atmısan, ümumiyyətlə, beynəlxalq və yerli turnirlərin hansında iştirak etmisən?
- 2016-cı ildə Dövlət Bayrağı Gününə həsr olunmuş beynəlxalq turnirin iştirakçısı olmuşam. Komandamız həmin turnirdə 2-ci yeri tutub. Bir il sonra isə Milli Qəhrəman Allahverdi Bağırovun xatirəsinə keçirilən turnirdə iştirak etmişəm. Bizim reqbi beynəlxalq yarışlara yeni addımlar atır. Əminəm ki, gələcəkdə daha böyük uğurlarımız olacaq.

- Məşqçiliyə başlamaq istəyin haqda da məlumat almışıq. Bu qərar hardan yarandı? Məşqçi kimi hansı planların var?
- Reqbiylə bir müddət vidalaşdım, 2020-ci ildə hərbi xidmətə yollandım. Üç ay idi ki, hərbi xidmətə yollanmışdım, Vətən Müharibəsi başladı. Məni də xüsusi təyinatlı qüvvələrə seçmişdilər. 44 günlük müharibədə sonadək iştirak etdim. Hərbi xidmətdən qayıdandan sonra reqbidən uzaqlaşmadım. Məşqçilik üçün tələb olunan 1-ci dərəcəli beynəlxalq sertifikatı da almışam. Artıq qərarımı vermişəm, məşqçi kimi fəaliyyət göstərməyə hazırlaşıram. Hansı komandanı çalışdaracağım hələ dəqiqləşməyib. Özümün məşqçi olmağa böyük həvəsim var idi. Müəllimlərim də mənə təklif etdilər, həvəslə razılaşdım. Onlar da dedilər ki, mən məşqçi kimi çalışmağa hazırlıqlıyam. Müəllimlərim bildirdilər ki, onlar da nə vaxtsa reqbiylə məşğul olublar, kimlərdənsə öyrəniblər. İndi də sıra bizim bildiklərimizi uşaqlara öyrətməyimizə gəlib. Əl-ələ verib, Azərbaycanda reqbinin inkişafına çalışacıq. Bunun üçün meydanda olduğu kimi komanda şəklində iş görməliyik. Bildiyini başqalarına öyrətmək çox gözəl işdi. Buna böyük həvəsim var. 2015-ci ildən bəri reqbinin içindəyəm. Mənim məşqçilərim mənə nə öyrədibsə, mən də onu uşaqlara öyrətməyə çalışacam.

- Son sualım reqbinin problemləri və onların həlli yolları ilə bağlı düşüncələrinlə bağlıdı. Hansı problemlər sizi narahat edir?
- Hər sahədə problem olanda onun çarəsini axtarırıq. Həyatda belədi. Reqbi də bizim həyatımızdı. Biz reqbini öz həyatımıza salmışıq. Bu idman növüylə yaşayırıq. Hansısa problemlərlə qarşılaşırıqsa, köməkləşib, komanda şəklində bu problemləri də həll edəcəyik. Problemlərdən qorxmaq lazım deyil. Mən hər kəsə səslənmək istəyirəm. Beş yaşından yuxarı hər kəs bu idman növüylə məşğul ola bilər. Reqbini sevmək lazımdı. Çünki reqbi insana komandada mübarizə aparmaq, möhkəmlənmək öyrədir. Mən özüm 44 günlük Vətən Müharibəsinin veteranıyam. Müharibədə reqbidə öyrəndiyim köməyimə gəlib. Reqbi məni möhkəmləndirmişdi. Ona görə də hamını reqbiylə məşğul olmağa çağırıram. Əminəm ki, problemlərin həllinə nail olub, Azərbaycanda reqbini yüksək səviyyəyə çatdıracaq, Azərbaycanı reqbi ölkəsi kimi dünyaya tanıdacağıq.

İLKİN SULTANLI



Yazı Azərbaycan Respublikasının Medianın İnkişafı Agentliyinin maliyyə dəstəyi ilə, “Uşaq və gənclərin fiziki və mənəvi inkişafı” istiqaməti üzrə hazırlanıb.