Emin Kürdov “ehtiyat qapıçı” ifadəsini xoşlamır
Son vaxtlar millidə “bir nömrə” Rövşən Hüseynlidi. Ancaq Joze Alesio da Silva İranla ikinci oyunda “çərçivə”ni Emin Kürdova etibar etdi və sona qədər (qapıçını meydan oyunçusu ilə əvəz etdiyi dəqiqələr istisna olmaqla) dəyişmədi. İnsafən, Kürdov pis təsir bağışlamadı. O olmasaydı, hesab arasındakı fərq daha da arta bilərdi. Çimərlik yığmasında da çıxış edən qolkiperlə bu yöndə danışdıq.
- Oyunla bağlı nə deyə bilərsən? Niyə məğlub olduq?
- İran kimi güclü rəqiblə üz-üzə gəlmək bizim üçün ciddi məşqdi. Bu oyunların komandamıza xeyri olacaq. Bu matçlar oyun təcrübəmizi artırmağa da imkan verəcək. Çıxışımıza əsaslanıb deyə bilərəm ki, istənilən rəqibə qarşı mübarizə aparmaq mümkündü. Razıyam, İranla ilk oyunda daha inamlı təsir bağışlamışdıq. İkinci matçda həm oyunumuz alınmadı, həm də uşaqlarda yorğunluq var idi. Ardıcıl 2 gün ərzində belə güclü rəqiblə eynisəviyyəli oyun keçirmək çox çətindi. Bundan başqa, baş məşqçimiz müəyyən eksperimentlərə əl atdı. Hamıya meydana çıxmaq şansı verdi. Maraqlıdı ki, İranın oyun üslubu Avropa çempionatının qrup mərhələsindəki rəqiblərimizdən olan Fransanın oyun üslubuna yaxındı. İranla qarşılaşmaq bu baxımdan xeyrimizə oldu. Məğlub olsaq da, nəticə əhəmiyyətli deyildi. İran dünya çempionatında Braziliya, bir ay əvvəlki turnirdə Rusiya kimi komandaları yenib. Belə güclü rəqiblə oyunda qazanılan təcrübə çox əhəmiyyətlidi. Həm də onlar bir yerdə çox oynayıblar. Bakıya da əsas heyətlə gəlmişdilər. Asiya çempionatına hazırlaşırlar.
- Uzun fasilədən sonra millinin formasında oyuna qoşuldun və kifayət qədər inamlı təsir bağışladın. Çətin deyildi?
- Ümumiyyətlə, ehtiyat qapıçı olmağı heç xoşlamıram. Klubumda da daim əsas heyətdə meydana çıxıram. Millidə vəziyyət fərqlidi. Baş məşqçinin öz fikri, taktikası var. Təbii ki, hər ikimizi eyni vaxtda qapıya qoya bilməz. Özü də hər dəfə deyir ki, iki güclü qapıçım var, hər ikinizə inanıram, başqa qapıçıya da ehtiyacım yoxdu. Yəni bizə inanır. Nə vaxt şans verilib, maksimum dərəcədə qarşılıq verməyə çalışmışam. İranla oyunda da istisna olmadı. Baş məşqçi kimə şans versə, məsuliyyətlə bu etimadı doğrultmağa çalışacaq. Bildiyim odu ki, Alesio hər ikimizdən razıdı. Həm də komandada birinci, ikinci qapıçı olmur. Dəvət olunmusansa, deməli, hər ikimiz lazımlıyıq. Böyük futboldan fərqli, futzalda belə bölgü olmur. İran yığmasının heyətində də birinci oyunda bir, digərində başqa qapıçı “çərçivə”ni qorudu. İsfahandakı turnirdə hətta üçüncü qapıçı meydana çıxmışdı. Alesio da bilir ki, qapıçıların “artırması” üçün daim rəqabət mühiti yaradılmalıdı.
- Necə düşünürsən, Fransa və İspaniya ilə qarşılaşmalara hazırsız?
- Sloveniyaya hazır yollanacağımızı qeyd edə bilərəm. Fransanın oyunlarının videosuna baxırıq. Təbii ki, baş məşqçi rəqibi təhlil edir, zəif-güclü tərəflərini deyir. Hər gün videoya baxırıq, necə oynamalı olduğumuzu, kimlərə qarşı diqqətli yanaşmağımızı bildirir.
- Maraqlıdı, Alesio da Fransa ilə oyunu qabartdı, sanki İspaniyanı yaddan çıxarıb...
- İndi futzal o səviyyəyə çatıb ki, əvvəlcədən proqnoz verməkdə çətinlik çəkirsən. Məsələn, Misir İtaliya kimi titullu komandanı, İran Braziliyanı məğlub edir. Əlbəttə, heç bir komandanı zəif hesab etmək və saymazyana yanaşmaq olmaz. Bizim də ispanlar kimi iki ayağımız, iki əlimiz var. Onların adını çəkməməklə meydana uduzmaq üçün çıxacağımızı heç kim düşünməsin. Bacardığımız qədər mübarizə aparacağıq, onlara qarşı olan uğursuz statistikanı dayandırmağa çalışacağıq. Hər şey mümküdü. Əsas inamdı, özünəinam olan yerdə istənilən komanda ilə dueldən qalib ayrıla bilərsən. Həm də qarşımıza qrupdan çıxmaq tapşırığı qoyulub. Bunun birinci və ya ikinci yerlə olacağı ciddi əhəmiyyət kəsb etmir.
MİRAĞA