“Uşaq və gənclərin fiziki və mənəvi inkişafı” istiqaməti üzrə layihə çərçivəsində yazılarımız davam edir.

Yenidən diqqətimizi Gəncə idmanına yönəltmişik. Amma bu dəfə futboldan yox, basketboldan bəhs edəcəyik. Həmsöhbətimiz gəncəli basketbol mütəxəssisi, əməkdar məşqçi Rizvan Səfərovdu.

- Rizvan müəllim, sizi oxucularımıza daha yaxından tanıtmaq istərdik. Basketbolla məşğul olmağa necə başladız? İlk məşqçinizi və komandanızı necə xatırlayırsız? Hansı uğurları qazanmaq sizə qismət olub?
- 1978-ci ilin mayında doğma Gəncə şəhərində dünyaya göz açmışam. Basketbolla da elə Gəncədə, uşaq yaşlarımdan məşğul olmağa başlamışam. 19 saylı idman məktəbində bədən tərbiyyə fənnini tədris edən Mahir müəllim ilk məşqçim olub. Məndə basketbolçu üçün vacib olan bəzi fərdi keyfiyyətləri gördüyü üçün məni məşqlərə dəvət etdi. Axşamlar idman dərnəkləri keçirilirdi. Həmin dərnəklərdə həvəslə məşq edirdik. O vaxtlar dərnəklərarası, məktəblərarası, eləcə də Gəncə şəhərinin Nizami və Kəpəz rayonlarının arasında yarışlar keçirilirdi. Bundan başqa, Spartakiadalarda iştirak edirdik, Bakıya, Xaçmaza müxtəlif yarışlara gedirdik. Sözün düzü, fiziki göstəricilərim həmyaşıdlarımdan fərqləndiyi üçün başqa idman növləri üzrə məşqçilər də mənə dəvət göndərirdilər. Amma mən gələcəyimi basketbola bağladım, bu idmanı daha çox sevdim. Məşqlərdə ruh yüksəkliyi ilə iştirak etdim, basketbolda yüksək nəticələr qazandım.

- Basketbolu sizə sevdirən, onu başqa idman növlərindən fərqləndirən nədi?
- Həyatda bir prinsipim var. Həmişə işin çətin olanını seçirəm. Bu çətinliyi göz önünə alır, ona qalib gəlmək üçün çalışıram. Basketbol da mürəkkəbliyi ilə məni özünə cəlb etdi. Elmlər arasında riyaziyyat necə mürəkkəbdisə, idman növləri arasında da basketbol mürəkkəbliyi ilə seçilir. Sanki cavabı bilinməyən idman növüdü. Mən də bu idman növünü mükəmməl öyrənmək üçün öz üzərimdə çox çalışdım. Mənə bu idman növünü az əvvəl qeyd etdiyim kimi, Mahir müəllim sevdirib. İndinin özündə də onunla məsləhətləşirəm, onun tövsiyyələrini qəbul edirəm.

- Məşqçiliyə necə başladız? Hazırda harda çalışırsız? Məşqçi kimi fəaliyyətinizdən, uğurlarınızdan danışmağınızı xahiş edirik.
- 1994-cü ildə Azərbaycan Dövlət Aqrar Universitetinə qəbul olundum. Elə həmin ildən də Gəncə şəhərinin komandasında çıxış etdim, komandanın kapitanı seçildim. Bu da bir xoş təsadüfdü ki, mən 2-ci kursda oxuyanda Gəncə şəhərində böyüklər arasında yarış keçirilirdi. Həmin yarışda biz qalib olduq. Şəhərimizdə fəaliyyət göstərən “Təhsil” İdman Məktəbinin yerli bölməsinin rəhbəri də həmin yarışı izləyirdi. Oyunumi bəyənmişdi. 1998-ci ildən məni idman məktəbinə müəllim götürdülər. O vaxtdan da məşqçi-müəllim kimi fəaliyyət göstərirəm. Azərbaycanda yeganə məşqçiyəm ki, həm yeniyetmə oğlan və qızlar, həm də böyüklər arasında nəticə verməyi bacarmışam. Yeniyetmə qızlarla Azərnbaycan birinciliyinin qalibi olmuşam. Qadınlarla isə Azərbaycan çempionatında fərqlənmişik, eləcə də Gürcüstanda, İranda keçirilən beynəlxalq turnirlərdə mükafatçı olmağı bacarmışıq.

- Hazırda Gəncədə basketbolun vəziyyət necədi? Gənclərin və yeniyetmələrin basketbola marağı sizi qane edirmi?
- Əminliklə deyə bilərəm ki, indiyə qədər çəkdiyimiz zəhmətin bəhrəsini görmüşük. Müntəzəm müxtəlif yaş qrupları üzrə yığmalara, eləcə də əsas milliyə gəncəli basketbolçuları göndərmişik. Yetirmələrimdən Mirməcid İsmayılov, Əli Həsənov gənclər arasında keçirilən Avropa çempionatında 3-cü yerə layiq görülüb. Amil Həmzəyev kişilərdən ibarət yığmanın heyətində ilk dəfə Bakıda keçirilən İslam Həmrəyliyi Oyunlarının qalibi olub, Konyada keçirilən yarışda isə 2-ci yeri tutan yığmanın heyətində yer alıb. “Gəncə” Azərbaycan kubokunun qalididi, ötən mövsüm keçirilən ölkə çempionatında isə gümüş medal qazandıq. Hazırda da “Gəncə”də məşqçi kimi fəaliyyət göstərirəm.

- Son sualım ümumlikdə Azərbaycan basketbolunun vəziyyəti ilə bağlıdı. Sizi hansı problemlər narahat edir, onların həlli yolları hansılardı?
- Bildiyiniz kimi, komanda idman növünü inkişaf etdirmək fərdi idman növündən xeyli çətindi. Fərdi idman növündə zalda minimal şərait kifayət edir. Amma komanda idman növündə idman zalının tələbatı yüksək səviyyədə olur. Həmin parametr və ölçülər qorunmalıdı. Əlimizdəki imkanlardan maksimum istifadə etməyə çalışırıq. Həm Gəncə Olimpiya Kompleksinin idman zalından, həm məktəblərin idman zallarından yararlanırıq, müxtəlif idman yarışları keçiririk. Gəncədə qızlar və oğlanlar arasında kütləviliyə nail olmuşuq. İstənilən idman növündə kütləvilik vacib şərtdi. Kütləvilik olanda seçim etmək, yığma komandalara layiqli idmançılar yetişdirmək də asan olur. Təhsil naziri Emin Əmrullayev Azərbaycan Basketbol Federasiyasının prezidenti seçildikdən sonra xeyli müsbət dəyişikliklər var. Artıq problemlərin həlli istiqamətində də böyük işlər görülür. Orta məktəblərdə, idman məktəblərində və klublarda canlanma yaşanır. Müxtəlif yaş qrupları üzrə liqalar təşkil olunur. Kişilər arasında həvəskarların liqası yaradılıb. Ali məktəblərin komandaları var. Bizim də “Gəncə” komandası ölkə çempionatında uğurla təmsil olunur, yüksək səviyyədə çempionat keçirilir. Bunun özü də ölkədə basketbolun inkişafına böyük töhfədi. Sosial şəbəkələrdə yarışlar geniş şəkildə işıqlandırılır, idman televiziyalarında canlı yayınlar verilir. Belə tədbirlər basketbolun təbliği üçün çox vacibdi. Mən də bu sahənin mütəxəssisi kimi çalışıram ki, əlimdən gələni edim, ölkə basketbolunun inkişafına fayda verim.

İLKİN SULTANLI