“Hiss edirdim ki, o mənə yeni müqavilə təklif etmək istəmir”
“Qarabağ” qış fasiləsində əsas füqurlarından birini itirdi. Komandanın qol silahı Dino Ndlovu karyerasını Çində davam etdirəcək - “Hançjou Qrintaun”la ikiillik müqavilə bağlayıb. Bu keçid zamanı mətbuatda bəzi rəqəmlər göstərilirdi. Belə ki, “Qarabağ”ın Dinoya görə 750 min avro qazandığı deyildi. Həmçinin hücumçu Çində ilə təxminən 1 milyon dollar maaş alacaq. Qeyd edək ki, Dinonun “köhlən atlar”la müqavilə müddəti yayda bitirdi. Belə görünür ki, cənubi afrikalı “Qarabağ”dan nöbəti mövsüm üçün daha yaxşı təklif gözləyirmiş. Lakin Ağdam klubu müqavilə müddətinin sonunda danışıqlar masası arxasına oturmağı məqsəduyğun sayıb. Ndlovu isə “Hançjou Qrintaun”un olduqca sərfəli təklifini qəbul edərək, “Qarabağ”la vidalaşdı.
Ndlovu xarici mətbuata açıqlamasında yeni klubu ilə bağlı danışıb: “Komandamı dəyişməyim ən yaxşı qərarlarımdan biridi. Bunu ailəm və özüm üçün etmişəm. Çində hər şey yaxşıdı deyə, gileylənə bilmərəm. Hələ ki yüksəkliyə və yuxu rejiminə öyrəşməyə çalışıram. Məqsədim fərdi olaraq dəyişməyib. Mən superliqada çoxlu qollar vurmaqla klubuma kömək etmək və “Qarabağ”dakından daha yaxşısını burda etmək istəyirəm. Qətər, Rumıniya, BƏƏ və Rusiya klublarından təkliflərim vardı, lakin Çin komandasına görə onlardan imtina etdim. Bura təkcə pula görə gəlməmişəm, halbuki Rusiyada bundan da yaxşı maaş təklifim vardı. Asan yolu seçən oyunçu deyiləm. Bu ölkəyə müxtəlif mədəniyyəti, müxtəlif vaxt zonası, Asiya olduğu və kluba nədəsə kömək etmək üçün gəlmək istədim”.
Dino bir daha “Qarabağ”dan ayrılmasının səbəbinə toxunub: “Son günə kimi “Qarabağ”ı tərk etmək istəmirdim. Ancaq müqaviləm başa çatırdı. Baş məşqçi ilə yeni müqavilə haqda söhbətim olmuşdu. Hiss edirdim ki, o mənə yeni müqavilə təklif etmək istəmir. Halbuki orda oyunçuların müqavilələrində dəyişikliklər edilirdi. Özümə və ailəmə qarşı realist düşüncə ilə yanaşmalıydım. Daha gənc olmadığımdan, gələcəyimin təhlükəsizliyinin qayğısına qalmaq istəyirdim. Ona görə də bu imkandan yararlanmaq qərarına gəldim və bura gəldim. Bununla belə, “Qarabağ”da yaşadığım xoş anları unuda bilmərəm. Biz “Kopenhagen”ə qol vurub cütün qalibi olanda Bakı əhalisi yatmaq istəmirdi. Danimarkadan gələndə hava limanında, demək olar, 10 min adam bizi gözləyirdi. Biz Çempionlar Liqasında oynamasaydıq, hər il olduğu kimi, Avropa Liqasında çıxış edəcəkdik. ÇL-də səviyyə bir az daha yüksəkdi”.